မြစ်ဆုံစီမံကိန်း ပြန်လည်အကောင်အထည်ဖော်ရေး တရုတ်ခရီးစဉ်အတွင်း ဆွေးနွေးခဲ့ဟုဆိုဒေသခံများ၏ စိုးရိမ်မှုများကို ပညာရှင်များဖြင့် ဆန်းစစ်ပြီး ရလဒ်တရားဝင်ထုတ်ပြန်မည်

မြစ်ဆုံရေအားလျှပ်စစ်စီမံကိန်း ပြန်လည်အကောင်အထည်ဖော်ရေးနှင့်ပတ်သက်၍ နိုင်ငံတော်သမ္မတ၏ တရုတ်နိုင်ငံခရီးစဉ်အတွင်း ဆွေးနွေးမှုများ ပြုလုပ်ခဲ့ပြီး၊ ကချင်ပြည်နယ်ရှိ ဒေသခံပြည်သူများနှင့်လည်း မြေပြင်တွေ့ဆုံဆွေးနွေးမှုများ ဆက်လက်ဆောင်ရွက်လျက်ရှိကြောင်း၊ စီမံကိန်းအပေါ် ပြည်သူလူထု၏ စိုးရိမ်ပူပန်မှုများကို ပညာရှင်များဖြင့် အသေးစိတ်ဆန်းစစ်သုံးသပ်ကာ ရလဒ်များကို တရားဝင်ထုတ်ပြန်သွားမည်ဖြစ်ကြောင်း သမ္မတရုံးပြောရေးဆိုခွင့်ရှိသူ ဒေါက်တာခိုင်ခိုင်စိုးက ပြောကြားသည်။

ဇွန် ၃၀ ရက်က နေပြည်တော်ရှိ နိုင်ငံတော်သမ္မတရုံးတွင် ကျင်းပသည့် သတင်းစာရှင်းလင်းပွဲ၌ ပြည်တွင်းမီဒီယာတစ်ခု၏ မေးမြန်းချက်ကို ဖြေကြားရာတွင် ဒေါက်တာခိုင်ခိုင်စိုးက အထက်ပါအတိုင်း ပြောကြားခဲ့ခြင်းဖြစ်သည်။

ဒေါက်တာခိုင်ခိုင်စိုးက နိုင်ငံတော်သမ္မတ၏ တရုတ်နိုင်ငံခရီးစဉ်အတွင်း မြစ်ဆုံစီမံကိန်း ပြန်လည်စတင်ရေးနှင့်ပတ်သက်၍ ဆွေးနွေးမှုများရှိခဲ့ကြောင်း၊ အမျိုးသားလျှပ်စစ်ဓာတ်အားရရှိရေးစီမံကိန်းအရ ၂၀၃၀ ပြည့်နှစ်တွင် တစ်နိုင်ငံလုံး လျှပ်စစ်ဓာတ်အား ၁၀၀ ရာခိုင်နှုန်းရရှိစေရန် ရည်မှန်းဆောင်ရွက်လျက်ရှိကြောင်း ပြောကြားသည်။

ထို့ပြင် နိုင်ငံတော်သမ္မတက မြစ်ဆုံစီမံကိန်းကို ယခင်ကတည်းက အကောင်အထည်ဖော်နိုင်ခဲ့ပါက လက်ရှိအချိန်တွင် နိုင်ငံတစ်ဝန်း လျှပ်စစ်ဓာတ်အား လုံလောက်စွာရရှိနိုင်ပြီး စီးပွားရေးဖွံ့ဖြိုးတိုးတက်မှုကိုလည်း များစွာအထောက်အကူပြုနိုင်မည်ဖြစ်ကြောင်း အစည်းအဝေးအတွင်း ထည့်သွင်းပြောကြားခဲ့သည်ဟု ဆိုသည်။

မြစ်ဆုံစီမံကိန်းသည် ဧရာဝတီမြစ်ညာမြစ်ဝှမ်းရှိ ရေအားလျှပ်စစ်စီမံကိန်း (၇) ခုအနက် အဓိကစီမံကိန်းဖြစ်ပြီး၊ မြစ်ဆုံစီမံကိန်းတစ်ခုတည်းမှ မဂ္ဂါဝပ် ၅,၆၀၀ ထုတ်လုပ်နိုင်မည်ဖြစ်ကြောင်း၊ စီမံကိန်း (၇) ခုလုံး အကောင်အထည်ဖော်နိုင်ပါက နိုင်ငံ၏ လျှပ်စစ်ဓာတ်အားလိုအပ်ချက်ကို အဓိကဖြည့်ဆည်းပေးနိုင်မည်ဖြစ်ကြောင်းလည်း ပြောကြားခဲ့သည်။

စီမံကိန်းနှင့်ပတ်သက်၍ ဒေသခံပြည်သူများ၏ သဘောထားကို အလေးထားဆောင်ရွက်လျက်ရှိပြီး၊ ၂၀၂၆ ခုနှစ် ဇန်နဝါရီလတွင် အဖွဲ့ဝင် (၂၄) ဦးပါ ကော်မတီကို ဖွဲ့စည်းကာ ကချင်ပြည်နယ်အစိုးရအဖွဲ့နှင့် ပူးပေါင်း၍ ဒေသခံများနှင့် မြေပြင်တွေ့ဆုံဆွေးနွေးမှုများ ပြုလုပ်ခဲ့ကြောင်း သိရသည်။

လက်ရှိအချိန်အထိ ဆွေးနွေးပွဲရလဒ်များကို တရားဝင်မထုတ်ပြန်ရသေးသော်လည်း ဒေသခံအများစုက လျှပ်စစ်ဓာတ်အား ပိုမိုရရှိလိုသည့် ဆန္ဒရှိကြပြီး၊ အခြားတစ်ဖက်တွင် စီမံကိန်းကြောင့် အသက်အိုးအိမ်စည်းစိမ်နှင့် သဘာဝပတ်ဝန်းကျင် ထိခိုက်နိုင်မည်ကို စိုးရိမ်ပူပန်မှုများလည်း ရှိနေကြောင်း ဒေါက်တာခိုင်ခိုင်စိုးက ပြောကြားသည်။

ယင်းကြောင့် စီမံကိန်း၏ ကောင်းကျိုးနှင့် ဆိုးကျိုးများကို Check and Balance နည်းလမ်းဖြင့် ပညာရှင်များက ဘက်မလိုက် ဆန်းစစ်သုံးသပ်သွားမည်ဖြစ်ပြီး၊ ကောင်းကျိုးများက ပိုမိုများပြားကြောင်း အထောက်အထားများဖြင့် အတည်ပြုနိုင်ပါက စီမံကိန်းကို ဆက်လက်အကောင်အထည်ဖော်သွားမည်ဖြစ်ကြောင်း၊ ဖြစ်ပေါ်လာနိုင်သည့် ဆိုးကျိုးများကိုလည်း အနည်းဆုံးဖြစ်စေရန် ဆောင်ရွက်ကာ သုံးသပ်ရလဒ်များကို တရားဝင်ထုတ်ပြန်သွားမည်ဖြစ်ကြောင်း ၎င်းက ပြောကြားခဲ့သည်။