ရထားပေါ်မှ ဖြစ်စဉ်နှင့်ပတ်သက်၍ လူမှုကွန်ရက်ပေါ်တွင် စည်းကမ်း၊ ယဉ်ကျေးမှုနှင့် ဂုဏ်သိက္ခာဆိုင်ရာ အယူအဆများ အငြင်းပွားဖွယ်ဖြစ်ပေါ်
မော်လမြိုင်ဘူတာမှ ရန်ကုန်ဘူတာကြီးသို့ ထွက်ခွာသည့် အမှတ် (၈၄) အဆုန် DEMU လူစီးအမြန်ရထားပေါ်တွင် ဆူညံစွာ အော်ဟစ်သီချင်းဆိုခြင်းနှင့် စည်းကမ်းမဲ့ အပြုအမူများ ပြုလုပ်ကာ အခြားခရီးသည်များအား စိတ်အနှောင့်အယှက် ဖြစ်စေခဲ့သည့် ဒေါ်မြသန်း ပါဝင်သော အမျိုးသား၊ အမျိုးသမီး စုစုပေါင်း (၅၄) ဦးတို့အား မီးရထားဌာနက တရားလိုပြုလုပ်၍ ရထားပို့ဆောင်ရေးဥပဒေဖြင့် အမှုဖွင့် အရေးယူထားကြောင်း သိရသည်။
ဖြစ်စဉ်မှာ ပြီးခဲ့သည့် ဇူလိုင်လ ၂၃ ရက်နေ့က အဆိုပါ အမှတ် (၈၄) အဆုန် DEMU ရထားပေါ်တွင် လိုက်ပါလာသည့် ခရီးသည်များအနက် ဦးမြင့်ကြည်၊ ဒေါ်မြသန်း အပါအဝင် လူဦးရေ (၅၄) ဦးတို့သည် ရထားတွင်း ဆူညံစွာ အော်ဟစ်သီချင်းဆိုခြင်း၊ ရထားထိုင်ခုံ လက်တန်းပေါ်တွင် တက်ထိုင်ခြင်း၊ ရထားကြမ်းခင်း လျှောက်လမ်းအား ပိတ်ဆို့၍ ထမင်းဝိုင်းဖွဲ့ စားသောက်ခြင်းနှင့် TikTok ဗီဒီယိုများ ရိုက်ကူးခြင်း စသည့် စည်းကမ်းမဲ့ ပြုမူဆောင်ရွက်မှုများ ပြုလုပ်ခဲ့ကြခြင်းဖြစ်သည်။
ထိုသို့ လိုက်ပါစီးနင်းသူ ခရီးသည်များ စိတ်အနှောင့်အယှက် ဖြစ်ပေါ်စေခဲ့သည့် အဆိုပါ ဖြစ်စဉ်နှင့် ပတ်သက်၍ ဇူလိုင်လ ၂၆ ရက်နေ့တွင် မြန်မာ့မီးရထား၊ တိုင်းအမှတ် (၈) (မော်လမြိုင်) မှ အထူးတန်း ရုံပိုင်ကြီး ဦးသန်းစိုးက တရားလိုပြုလုပ်၍ မော်လမြိုင်မြို့မ ရဲစခန်းတွင် သွားရောက် တိုင်တန်းခဲ့ခြင်း ဖြစ်သည်။
လက်ရှိတွင် အဆိုပါ ပါဝင်သူ (၅၄) ဦးလုံးအား မော်လမြိုင်မြို့မ ရဲစခန်း၌ (ပ) ၁၂၉/၂၀၂၆၊ ရထားပို့ဆောင်ရေးလုပ်ငန်း ဥပဒေပုဒ်မ ၈၈ (က) ဖြင့် အမှုဖွင့်လှစ်ကာ ဥပဒေနှင့်အညီ ထိရောက်စွာ အရေးယူနိုင်ရေး ဆောင်ရွက်လျက်ရှိကြောင်း သိရှိရသည်။
အများသုံး ပို့ဆောင်ဆက်သွယ်ရေး ယာဉ်များဖြစ်သည့် ရထား၊ မော်တော်ယာဉ်နှင့် လေယာဉ်များ စီးနင်းရာတွင် ပြည်သူပိုင် ပစ္စည်းများနှင့် သတ်မှတ်စည်းကမ်းများကို လိုက်နာစောင့်ရှောက်ရန် တာဝန်ရှိသကဲ့သို့၊ အမှားအယွင်းများ ဖြစ်ပေါ်ပါကလည်း ဆဲဆိုစော်ကားခြင်း မဟုတ်ဘဲ ယဉ်ကျေးသည့် အသိုင်းအဝိုင်းအတိုင်း ထောက်ပြပြုပြင်ပေးသည့် လူမှုယဉ်ကျေးမှုကို ထိန်းသိမ်းရန် လိုအပ်ကြောင်း အဆိုပါ ဖြစ်စဉ်က အသိပညာပေးလျက်ရှိသည်။