မန္တလေးတိုင်း၊ အင်းဝမြို့ဟောင်းရှိ မဟာဇေယျပထ-မောင်အိုတံတားနှင့် အုတ်လမ်းတို့အား ပြန်လည်ပြင်ဆင်မည်ပါက စနစ်တကျသုတေသနပြုပြီးမှဆောင်ရွက်ရန် နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်က မှာကြားသည်။
နစက ဥက္ကဋ္ဌနှင့် ဇနီးတို့သည် ဖေဖော်ဝါရီ ၇ ရက်မွန်းလွဲပိုင်းက အင်းဝမြို့ဟောင်း၊ တံတားဦး-အင်းဝလမ်းပိုင်းရှိ မဟာဇေယျပထ-မောင်အိုတံတားနှင့် အုတ်လမ်းတို့အားထိန်းသိမ်းထားရှိမှုအခြေအနေများကိုကြည့်ရှုစစ်ဆေးစဉ် မှာကြားခဲ့ခြင်းဖြစ်သည်။
မောင်အိုတံတားအား ရှေးမူလလက်ရာအတိုင်း ပြန်လည်ပြုပြင်ထိန်းသိမ်းမွမ်းမံနိုင်ရန် ပြင်ဆင် ဆောင်ရွက်ပါက ဖြစ်ပေါ်လာနိုင်သည့် အကျိုး- အပြစ်များအား စနစ်တကျသုတေသနပြုလုပ်၍ တင်ပြရမည်ဖြစ်ပြီး မောင်အိုအုတ်လမ်း၏ မူလအုတ်လမ်းကိုလည်း သုတေသနပြုလုပ်ရန် နစက ဥက္ကဋ္ဌကမှာကြားကာ မောင်အိုတံတားနှင့် အုတ်လမ်းတို့အား ကြည့်ရှုစစ်ဆေးခဲ့သည်။
ထို့ပြင် နစက ဥက္ကဋ္ဌနှင့် ဇနီးတို့သည် အင်းဝမြို့ဟောင်းရှိ မြို့ရိုးနှင့် ကျုံးတို့ကိုကြည့်ရှုစစ်ဆေးပြီး မြို့နေရာနှင့် မြို့ရိုးတို့အား စဉ်ဆက်မပြတ် ထိန်းသိမ်းစောင့်ရှောက်မှုများပြုလုပ်ရန်၊ ကျုံးအားရှေးမူမပြတ်မွမ်းမံ၍ ပြန်လည်ထိန်းသိမ်းရန်လည်း မှာကြားခဲ့သည်။