တရုတ်ကုန်စည်များအပေါ် ထပ်တိုးအခွန်ကောက်ခံမှု ချမှတ်မည်ဆိုသည့် အမေရိကန်ရွေးကောက်ခံ သမ္မတ ဒေါ်နယ်ထရမ့်ပ်၏ ပြောကြားချက်နှင့် ပတ်သက်၍ တရုတ်နိုင်ငံပိုင်မီဒီယာက နိုဝင်ဘာ ၂၆ ရက်တွင် အယ်ဒီတာ့အာဘော်များမှတဆင့် တုန့်ပြန်ချေပခဲ့ရာ၌ ဖန်တာနိုင်းမူးယစ်ဆေးပြသနာကို အမေရိက,က ဖြေရှင်းရန် ပျက်ကွက်မှုအတွက် သမ္မတဟောင်းသည် တရုတ်ကို အပြစ်ပုံချနေသည်ဟု စွပ်စွဲခဲ့သည်။
ဇန်နဝါရီ ၂၀ ရက်တွင် သမ္မတတာဝန်ထမ်းဆောင်မည့် ထရမ့်ပ်က နိုဝင်ဘာ ၂၅ ရက်နေ့တွင် ပြောဆိုခဲ့ရာ၌ တရုတ်နိုင်ငံမှ သွင်းကုန်များအပေါ် ထပ်တိုးစည်းကြပ်ခွန် ၁၀ ရာခိုင်နှုန်း ကောက်ခံသွားမည်ဟု ဆိုခဲ့သည်။ တရုတ်ကုန်စည်များအပေါ် အခွန် ၆၀ ရာခိုင်နှုန်းကျော် စည်းကြပ်သွားမည်ဟု ယခင်ကလည်း ထရမ့်ပ်က ပြောဆိုထားခဲ့သည်။
အခွန်ခြိမ်းခြောက်မှုကြောင့် အမေရိကသို့ နှစ်စဉ် ကန်ဒေါ်လာ ၄၀၀ ဘီလျံကျော်သော ကုန်ပစ္စည်းများ ရောင်းချနေသည့် တရုတ်စက်မှုကဏ္ဍနှင့် အခြားနေရာများမှ အမေရိကန်များဝယ်ယူနေသည့် နောက်ထပ် ဘီလျံရာနှင့်ချီသော ထုတ်ကုန်အစိတ်အပိုင်းများအတွက် လှုပ်ခတ်မှုဖြစ်စေသည်။
တရုတ်ကွန်မြူနစ်ပါတီ အာဘော်များဖြစ်သော ချိုင်းနားဒေးလီးနှင့် ဂလိုဘယ်တိုင်းမ်တို့၏ အယ်ဒီတာအာဘော်များသည် အခွန်းစည်းကြပ်မှုအတွက် ထရမ့်ပ်ထောက်ပြခဲ့သော ဖန်တနိုင်းဆိုသည့်အကြောင်းပြချက်အပေါ် အလေးပေးတုန့်ပြန်ခဲ့သည်။
“အခြားသူများကို ဓါးစာခံရှာခြင်းဖြင့် အမေရိက၏ မူးယစ်ဆေးအကြပ်အတည်းကို အဆုံးမသတ်နိုင်” ဟူသော ခေါင်းစည်းဖြင့် ချိုင်းနားဒေးလီး အယ်ဒီတာ့အာဘော်တွင် ဖော်ပြခဲ့ပြီး ဂလိုဘယ်တိုင်းမ်က ထရမ့်ပ်၏ မှတ်ချက်ကြောင့် အမေရိကအနေဖြင့် မူးယစ်ဆေးဝါးတိုက်ဖျက်ရာတွင် ပူးပေါင်းဆောင်ရွက်နေသော တရုတ်၏ စေတနာကို မစော်ကားရန် တိုက်တွန်းခဲ့သည်။
ရွေးကောက်ခံသမ္မတက တရုတ်နိုင်ငံမှ သွင်းကုန်များအပေါ် ထပ်တိုးအခွန်ကောက်ခံမည့် သူ၏ ခြိမ်းခြောက်မှုအတွက် ပေးခဲ့သော အကြောင်းပြချက်ဆင်ခြေသည် အရမ်းဝေးကွာလွန်းသည်ဟု ချိုင်းနားဒေးလီးက ဆိုသည်။ အမေရိကန်တွင် ဖန်တနိုင်းမူးယစ်ဆေးဝါး အကျပ်အတည်း၏ မူလဇာစ်မြစ်သည် အမေရိကကိုယ်တိုင်ဖြစ်သည်ကို ကမ္ဘာက ရှင်းရှင်းလင်းလင်း သိမြင်သည်ဟုလည်း ဆိုခဲ့သည်။
အမေရိကသည် အခွန်စည်းကြပ်ခြင်းကို လက်နက်အဖြစ်သုံးကာ စီးပွားရေးနှင့် ကုန်သွယ်ရေးကို နိုင်ငံရေးအသုံးချစရာအဖြစ် ဆက်လုပ်နေပါက အခွန်စစ်ပွဲတွင် အနိုင်ရသူ ရှိမည်မဟုတ်ဘဲ ပတ်သက်သူအားလုံး ထိခိုက်နစ်နာမည်သာဖြစ်သည်ဟု ချိုင်းနားဒေးလီးက သတိပေးခဲ့သည်။
Ref: သည်စထရိတ်တိုင်းမ်