စစ်ကိုင်းတိုင်းဒေသကြီး အစိုးရအဖွဲ့နှင့် မုံရွာမြို့ရှိ ပုဂ္ဂလိကဆေးရုံများ၊ ကမ်းနားလမ်းသာယာရေးနှင့် MSME လုပ်ငန်းများ ဖွံ့ဖြိုးတိုးတက်ရေးညှိနှိုင်းအစည်းအဝေးကို မေလ (၂) ရက်က မုံရွာမြို့စစ်ကိုင်းတိုင်းဒေသကြီး အစိုးရအဖွဲ့ရုံး အစည်းအဝေးခန်းမတွင် ကျင်းပသည်။
“ပုဂ္ဂလိကဆေးရုံများအနေနဲ့ ဆေးရုံအတွင်းအပြင်နဲ့ ဆေးရုံပတ်ဝန်းကျင်သန့်ရှင်းသပ်ရပ်အောင် ဆောင်ရွက်သွားဖို့ ဆေးရုံသုံးစွန့်ပစ်ပစ္စည်းတွေကို သတ်မှတ်နေရာတွေကို စနစ်တကျ ထုတ်ပိုးစွန့်ပစ်သွားဖို့ မှာကြားလိုပါတယ်။ ဆေးရုံသုံးရေဆိုးတွေကို သန့်ရှင်းအောင်ဆောင်ရွက်ပြီး ပတ်ဝန်းကျင်ထိခိုက်မှုမရှိအောင် ဆောင်ရွက်သွားဖို့တွေကို ဆေးရုံတာဝန်ရှိသူတွေက ဝိုင်းဝန်းပူးပေါင်းဆောင်ရွက်သွားကြဖို့ လိုအပ်ပါတယ်။ ချင်းတွင်းမြစ်သန့်ရှင်းသာယာလှပစေရေးအတွက် မြို့နေပြည်သူတွေ၊ ဌာနဆိုင်ရာတွေ မော်တော်တည်ဆောက်သူတွေနဲ့ မြစ်သဲ၊ ကျောက်လုပ်ငန်းရှင်တွေအနေနဲ့ပတ်ဝန်းကျင်ထိခိုက်မှုမရှိအောင် ဆောင်ရွက်သွားဖို့ ကမ်းနားလမ်း အမြဲသန့်ရှင်းသပ်ရပ်စေရေးအတွက် အမှိုက်တွေ စနစ်တကျ စွန့်ပစ်သွားသွားကြဖို့ လိုအပ်ပါတယ်။ MSME လုပ်ငန်းရှင်တွေအနေနဲ့လည်း လုပ်ငန်းတွေပိုမို ဆောင်ရွက်နိုင်စေဖို့အတွက် စစ်ကိုင်းတိုင်းဒေသကြီးအစိုးအဖွဲ့တာဝန်ရှိသူတွေနဲ့ ပူးပေါင်းကာ ညှိနှိုင်းပေါင်းစပ် ဆောင်ရွက်ပေးသွားမှာဖြစ်ပါတယ်” ဟု စစ်ကိုင်းတိုင်းဒေသကြီးဝန်ကြီးချုပ် ဦးကိုလေးက ပြောကြားသည်။
အစည်းအဝေးသို့ တက်ရောက်လာကြသည့် မုံရွာမြို့ပေါ်ရှိ ပုဂ္ဂလိက ဆေးရုံများမှ တာဝန်ရှိသူများ၊ မြစ်သဲ၊ ကျောက်လုပ်ငန်းရှင်များ၊ ပုဂ္ဂလိကရေယာဉ်များ စနစ်တကျပြေးဆွဲရေး ကြီးကြပ်မှုကော်မတီ အဖွဲ့ဝင်များ၊ MSME လုပ်ငန်းရှင်များမှ မိမိတို့ လုပ်ကိုင်ဆောင်ရွက်နေသည့် လုပ်ငန်းအခြေအနေများအား ရှင်းလင်းတင်ပြကြပြီး တိုင်းဒေသကြီးအစိုးရအဖွဲ့ဝင်များက ဖြည့်စွက်ဆွေးနွေး တင်ပြကြသည်။
ထို့နောက် တိုင်းဒေသကြီး ဝန်ကြီးချုပ်က အစည်းအဝေးသို့ တက်ရောက်လာသူများ၏ ဆွေးနွေးတင်ပြချက်များအပေါ် လိုအပ်သည်များကို တာဝန်ရှိသူများနှင့် ဖြည့်ဆည်းပေါင်းစပ်ဆောင်ရွက်ပေးခဲ့သည်။