မအူပင်-တွံတေး-ရန်ကုန်လမ်းအား ပြည်သူများ အဆင်ပြေချောမွေ့စွာ အသုံးပြုနိုင်ရေးအတွက် ဧရာဝတီတိုင်းဒေသကြီး၊ မဲဆန္ဒနယ်အမှတ် (၄)၊ အမျိုးသားလွှတ်တော်ကိုယ်စားလှယ် ဦးအောင်ကျော်မင်း ဧပြီလ ၂၄ရက်နေ့တွင် အမျိုးသားလွှတ်တော်တွင် မေးမြန်းခဲ့သော မေးခွန်းအား ပြည်ထောင်စုဝန်ကြီး (ကိုယ်စား) (မျိုးမြင့် ၊ ဒုတိယဝန်ကြီး) မှ ဖြေကြားချက်ပေးပို့ခဲ့ကြောင်း သိရသည်။
ဆောက်လုပ်ရေးဝန်ကြီးဌာန၏အဆိုပါဖြေကြားချက်အား စာတိုက်မှတဆင့် ရရှိခဲ့ခြင်းဖြစ်ကြောင်း သိရသည်။
ဧရာဝတီတိုင်း ဒေသကြီး၊ မအူပင်မြို့နယ်အပိုင်းတွင် မိုင် (၀/၀-၁၅/၁) အထိ (၁၅) မိုင် (၁) ဖာလုံအရှည်နှင့် ရန်ကုန်တိုင်းဒေသကြီး၊ တွံတေးမြို့နယ်အပိုင်းတွင် မိုင် (၁၅/၁-၃ဝ/၁) အထိ (၁၅) မိုင် အရှည်ရှိပြီး စုစုပေါင်းလမ်းမိုင် အရှည်မှာ (၃၀) မိုင် (၁) ဖာလုံဖြစ်သည်။
အဆိုပါလမ်းပိုင်းတွင် ၃၁-၃-၂၀၂၆ ရက်နေ့ရှိ လမ်းအခြေအနေမှာ (၁၈) ပေအကျယ် ကွန်ကရစ်လမ်း (ဝ) မိုင် (၅) ဖာလုံ၊ (၂၄) ပေ အကျယ် ကွန်ကရစ်လမ်း (၀) မိုင် (၂) ဖာလုံ (၅၀၀) ပေ၊ (၁၈) ပေ အကျယ် ကတ္တရာလမ်း (၂၉) မိုင် (၁)ဖာလုံ (၁၆ဝ) ပေ ဖြစ်သည်။
၂၀၂၆-၂၀၂၇ ဘဏ္ဍာရေးနှစ် ဧရာဝတီတိုင်းဒေသကြီးအပိုင်းတွင် တိုင်းဒေသကြီးငွေလုံး ငွေရင်းရန်ပုံငွေဖြင့် ကတ္တရာထပ်ပိုးလွှာခင်းခြင်း (၇) ဖာလုံ၊ တိုင်းဒေသကြီး ပြင်ဆင်ထိန်းသိမ်းခြင်း ရန်ပုံငွေဖြင့် လမ်းအနိမ့်အမြင့်ဖြေညှိ၍ ကတ္တရာရေပိတ်လွှာလောင်းခြင်း (၂.၄) ဖာလုံ ဆောင်ရွက်သွားမည်ဖြစ်ပြီး ရန်ကုန်တိုင်းဒေသကြီးအပိုင်းတွင် တိုင်းဒေသကြီးငွေလုံးငွေရင်းရန်ပုံငွေဖြင့် ကွန်ကရစ်လမ်းခင်းခြင်း (၃) မိုင် (၁) ဖာလုံ (၁၆ဝ) ပေ နှင့် လမ်းတလျှောက် ပြုပြင်ရန်လိုအပ်လျက်ရှိသည့် လမ်းအပိုင်းများကို ပြင်ဆင်ထိန်းသိမ်းခြင်းလုပ်ငန်းများ ပြုပြင်ဆောင်ရွက်သွားမည်ဖြစ်ကြောင်း ဆောက်လုပ်ရေးဝန်ကြီးဌာနမှ ပြန်လည်ဖြေကြားထားသည်။
သို့ဖြစ်ရာ မအူပင်-တွံတေးလမ်း၏ ဧရာဝတီတိုင်းဒေသကြီးလမ်းပိုင်းတွင် ကျန်ရှိနေသော လမ်းပိုင်း (၁၄) မိုင် (၄) ဖာလုံနှင့် ရန်ကုန်တိုင်းဒေသကြီးအပိုင်းတွင် ကျန်ရှိနေသောလမ်းပိုင်း (၁၁) မိုင် (၄) ဖာလုံ၊ စုစုပေါင်း (၂၆) မိုင် အား ကွန်ကရစ်လမ်းအဖြစ် အဆင့်မြှင့်တင်ဆောင်ရွက်နိုင်ရေးအတွက် ဘဏ္ဍာရေးနှစ်အလိုက် တိုင်းဒေသကြီးရန်ပုံငွေ လျာထားတင်ပြပြီး ရန်ပုံငွေခွဲဝေရရှိမှုအပေါ် မူတည်၍ အကောင်အထည်ဖော်ဆောင်ရွက်သွားမည်ဖြစ်ပါကြောင်း ဆောက်လုပ်ရေးဝန်ကြီးဌာနမှ ပြန်လည်ဖြေကြားထားသည်။