လက်ရှိအချိန်ထိ မူဆယ် – လားရှိုး ပြည်ထောင်စု လမ်းပြန်မပွင့်သေးဘဲ ကွင်းရှောင်လမ်းမှသာ သွားလာနေရသည့်အ တွက် မန္တလေးနှင့် မူဆယ် ယာဉ်စီးခနှင့် တန်ဆာခဈေးများကြီးမြင့်နေပြီး မူဆယ်မြို့တွင် အခြေခံစားကုန်ဈေးနှုန်းများ မြင့်တက်လျက် ရှိနေသည်ဟု မူဆယ်ဒေသခံသတင်းအရင်းအမြစ်တစ်ဦးက ပေါ်ပြူလာနယူးစ်သို့ ပြောသည်။
မူဆယ်သို့ တင်ပို့သော အခြေခံစားကုန်များမှာ လမ်းခရီး ကြမ်းတမ်းပြီး လမ်းကြောင်းပိုရှည်သည့် ကွင်းရှောင်လမ်း များမှတဆင့် သယ်ယူနေရသည့်အတွက် ကုန်တန်ဖိုး၏ ထက်ဝက်နီးပါး ပိုမိုကြီးမြင့်နေကြောင်း ၎င်းက ဆိုသည်။
“မူဆယ်မှာ ဆန်ချောတစ်အိတ်နှစ်သိန်းရှစ်သောင်း ရှိတယ်။ အဲဒီဆန်အိတ်တန်ဖိုးရဲ့ တစ်သိန်းလောက်က တန်ဆာခပဲ။ ဒီလိုပဲ ဆီတို့ အခြားအခြေခံစားကုန်တွေကို ပေးဝယ်နေရတဲ့တန်ဖိုးရဲ့ထက်ဝက်နီးပါးက တန်ဆာခတွေဘဲ”ဟု ၎င်းက ရှင်းပြသည်။
အလားတူ ယခင် မန္တလေး-မူဆယ် ယာဉ်စီးခ ကျပ် (၃၀,၀၀၀) ကျော်ပေးရသည့် အခြေအနေမှ ယခုတွင် ကျပ်နှစ်သိန်းခွဲမှ သုံးသိန်းခွဲအထိ ယာဉ်အမျိုးအစားပေါ်မူတည်၍ ဈေးနှုန်းမြင့်တက်လာကြောင်းဆိုသည်။
“အေဒီဗင် ကားလေးဆိုရင် တစ်ဦးကို ကျပ်နှစ်သိန်းခွဲ၊ ပါဂျဲရိုးဆိုရင် သုံးသိန်းခွဲ၊ အာရာဖတ်ဆိုရင်လည်း ကျပ်နှစ်သိန်းခွဲလောက်ပေးရတယ်။ အရင် မူဆယ်ကို သုံးသောင်းကျော်လောက်ပေးရင်ရတဲ့ အခြေအနေက အခု အဲဒီလိုတွေဖြစ်ကုန်တာ။ “ဟု ထပ်မံ ရှင်းပြသည်။
ရှမ်းပြည်မြောက်ပိုင်း တိုက်ပွဲများကြောင့် မူဆယ် – လားရှိုး – မန္တလေး ပြည်ထောင်စုလမ်းမကြီး လားရှိုး – မူဆယ် လမ်းပိုင်းမှာ ပိတ်ဆို့နေခြင်းဖြစ်ပြီး တောင်ကြီး-နမ္မတူ -နမ့်ခမ်းလမ်းပိုင်းနှင့် ကျောက်မဲ – သီပေါ – နမ္မတူ – မန်တုံ – မူဆယ် လမ်းပိုင်းတို့မှ သွားလာနေကြရခြင်း ဖြစ်သည်။
“တောလမ်းတွေကနေ ကွေ့ပတ်သွားရတော့ လောင်စာဆီပိုကုန်တယ်။ ကားတွေပိုနာတယ်။ အင်ဂျင်မထိပေမယ့် တစ်ခါဆိုတစ်ခါ အောက်ပိုင်းတွေ အရမ်းထိကြတာ။ အခုစဉ့်အင်တို့ ၊ ကျင်သီတံတားတို့ကလည်း ယာယီဆောက်ထားတာ။ အခုဆောက်ထားတဲ့ပုံနဲ့ မိုးတွင်းချောင်းရေကြီးတာနဲ့ဆို အဲဒီတံတားတွေ အကုန်မျောနိုင်တယ်။ ကျွန်တော်အထင် ခြောက်လပိုင်းမိုးကောင်းချိန်လောက်ဆိုရင် အဲဒီတံတားတွေက နေဖြတ်လို့ရမယ်မထင်တော့ဘူး။ အခုတည်းက အောက်ခြေကို အခိုင်အမာဆောက်နိုင်မှပဲ ရမယ်။”ဟု ၎င်းကဆိုသည်။
ထို့ကြောင့် မူဆယ်ဘက်သို့ သွားလာမည်ဆိုပါက အရေးကြီး ကိစ္စများမှလွဲ၍ အခြားကိစ္မများအတွက် မသွားလာကြရန်နှင့် အလုပ်အကိုင်ရှာဖွေသူများအနေဖြင့်လည်း အလုပ်ရှင်၏ ခေါ်စာအဆက်အသွယ်ရရှိမှသာ သွားရောက်ရန် ဒေသခံများက တိုက်တွန်း ပြောကြားကြသည်။