မကွေးတိုင်းတွင် မိုးရာသီနှမ်း GAP အသိအမှတ်ပြုလက်မှတ်ပေးအပ်ကာ သိုလှောင်ရုံကုန်အပ် ချေးငွေစနစ် စတင်

မကွေး၊ စက်တင်ဘာ ၁၀

မကွေးတိုင်းဒေသကြီးအတွင်း ဘေးကင်းလုံခြုံပြီး အရည်အသွေးကောင်းမွန်သည့် စိုက်ပျိုးရေးထွက်ကုန်များ ထုတ်လုပ်နိုင်ရေးနှင့် တောင်သူများအတွက် ဈေးကွက်နှင့် ငွေကြေးအထောက်အပံ့ရရှိရေး ရည်ရွယ်၍ ၂၀၂၆–၂၀၂၇ ခုနှစ် မိုးရာသီနှမ်း GAP အသိအမှတ်ပြုလက်မှတ်များ ပေးအပ်ခဲ့ပြီး GAP စနစ်ဖြင့် စိုက်ပျိုးထားသည့် မိုးရာသီနှမ်းများ စုပေါင်းရောင်းဝယ်ရေးနှင့် သိုလှောင်ရုံကုန်အပ် ချေးငွေစနစ်ကို စတင်အကောင်အထည်ဖော်ခဲ့ကြောင်း သိရသည်။

၂၀၂၆–၂၀၂၇ ခုနှစ် မကွေးတိုင်းဒေသကြီး မိုးရာသီနှမ်း GAP အသိအမှတ်ပြုလက်မှတ်ပေးအပ်ပွဲနှင့် GAP စနစ်ဖြင့် စိုက်ပျိုးထားသော မိုးရာသီနှမ်းများအတွက် စုပေါင်းရောင်းဝယ်ရေးလုပ်ငန်း အခမ်းအနားကို စက်တင်ဘာ ၁၀ ရက်က မကွေးမြို့၊ ကံလှကျေးရွာရှိ GBS စိုက်ပျိုးရေးထွက်ကုန် ရောင်းဝယ်ရေးစက်ရုံ၌ ကျင်းပခဲ့ခြင်းဖြစ်သည်။

အခမ်းအနားသို့ မကွေးတိုင်းဒေသကြီးဝန်ကြီးချုပ် ဦးတင်ကိုကို၊ တိုင်းဒေသကြီးအစိုးရအဖွဲ့ဝင် ဝန်ကြီးများ၊ သက်ဆိုင်ရာဌာနဆိုင်ရာ တာဝန်ရှိသူများ၊ နှမ်းဝယ်ယူမည့် ကုန်သည်နှင့် လုပ်ငန်းရှင်ကိုယ်စားလှယ်များ၊ နှမ်းစိုက်တောင်သူကိုယ်စားလှယ်များနှင့် မကွေးမြို့သစ်မှ မိုးရာသီနှမ်း GAP အသိအမှတ်ပြုလက်မှတ် ရရှိထားသည့် တောင်သူများ တက်ရောက်ခဲ့ကြသည်။

မကွေးတိုင်းဒေသကြီးဝန်ကြီးချုပ်က ဘေးကင်းလုံခြုံပြီး အရည်အသွေးကောင်းမွန်သည့် စိုက်ပျိုးရေးထွက်ကုန်များ ထုတ်လုပ်နိုင်ရေးအတွက် ကောင်းမွန်သော စိုက်ပျိုးရေးအလေ့အကျင့် (GAP) စနစ်ဖြင့် စံချိန်စံညွှန်းနှင့်အညီ စိုက်ပျိုးထုတ်လုပ်ရန် အရေးကြီးကြောင်း ပြောကြားသည်။

GAP စနစ်ကို အကောင်အထည်ဖော်ရာတွင် စားသုံးသူများ၏ အစားအသောက်ဘေးကင်းလုံခြုံရေးနှင့် စိုက်ပျိုးရေးထွက်ကုန် အရည်အသွေးသာမက သဘာဝပတ်ဝန်းကျင်ထိန်းသိမ်းရေး၊ လုပ်ငန်းခွင်အတွင်း လုပ်ကိုင်သူများ၏ ကျန်းမာရေးနှင့် ဘေးကင်းလုံခြုံရေး၊ လူမှုဘဝကောင်းမွန်ရေးတို့ကိုပါ ထည့်သွင်းစဉ်းစားရန် လိုအပ်ကြောင်း ၎င်းက ပြောကြားသည်။

GAP စနစ်ကို ကျယ်ကျယ်ပြန့်ပြန့် ဆောင်ရွက်ခြင်းဖြင့် စိုက်ပျိုးရေးထွက်ကုန်များ၏ အရည်အသွေး မြင့်မားလာနိုင်သည့်အပြင် တောင်သူများအတွက် စီးပွားရေးအကျိုးအမြတ်ရရှိစေနိုင်ပြီး စားသုံးသူများအနေဖြင့်လည်း ပိုမိုသန့်ရှင်းလတ်ဆတ်သည့် အစားအစာများ ရရှိစားသုံးနိုင်မည်ဖြစ်ကြောင်း သိရသည်။

မကွေးတိုင်းဒေသကြီး စိုက်ပျိုးရေးဦးစီးဌာန ညွှန်ကြားရေးမှူးကလည်း GAP စနစ်ဖြင့် စိုက်ပျိုးထုတ်လုပ်ရာတွင် လက်တွေ့အကောင်အထည်ဖော်ရမည့် နည်းပညာပိုင်းဆိုင်ရာအချက်များကို ရှင်းလင်းပြောကြားခဲ့သည်။

GAP စံချိန်စံညွှန်းများနှင့်အညီ စိုက်ပျိုးထုတ်လုပ်ခြင်းဖြင့် တည်ငြိမ်သည့် ဈေးကွက်နှင့် ရောင်းချရေးလမ်းကြောင်းများ ဖော်ဆောင်နိုင်မည်ဖြစ်သည့်အပြင် စိုက်ပျိုးရေးထွက်ကုန်များ၏ ဈေးကွက်တန်ဖိုး မြင့်တက်လာစေရန်နှင့် တောင်သူများ၏ ဝင်ငွေတိုးမြှင့်ရေးအတွက် အခွင့်အလမ်းများ ပိုမိုရရှိစေနိုင်ကြောင်း ရှင်းလင်းပြောကြားသည်။

ဆက်လက်၍ GAP စီမံကိန်း၏ လုပ်ငန်းစဉ်တစ်လျှောက် အကောင်အထည်ဖော်ဆောင်ရွက်ထားရှိမှုများကို သက်ဆိုင်ရာတာဝန်ရှိသူများက ရှင်းလင်းတင်ပြခဲ့ကြပြီး GBS Finance Co., Ltd မှ Deputy General Manager က ကုမ္ပဏီ၏ လုပ်ငန်းဆောင်ရွက်မှုနှင့် သိုလှောင်ရုံ ကုန်အပ် ချေးငွေစနစ် အကောင်အထည်ဖော်မည့် အစီအစဉ်များကို ရှင်းလင်းတင်ပြခဲ့သည်။

ထို့နောက် မကွေးတိုင်းဒေသကြီးဝန်ကြီးချုပ်နှင့် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးတို့က မကွေးမြို့သစ်မှ GAP အသိအမှတ်ပြုလက်မှတ် ရရှိထားသည့် တောင်သူများအား မိုးရာသီနှမ်း GAP အသိအမှတ်ပြုလက်မှတ်များ တစ်ဦးချင်း ပေးအပ်ခဲ့သည်။

တောင်သူကိုယ်စားလှယ်များကလည်း GAP စံချိန်စံညွှန်းနှင့်အညီ စိုက်ပျိုးထုတ်လုပ်ရာတွင် ရရှိခဲ့သည့် အတွေ့အကြုံများကို မျှဝေခဲ့ကြပြီး စိုက်ပျိုးထုတ်လုပ်ရေးနှင့် စီးပွားရေးလုပ်ငန်းများတွင် ကြုံတွေ့နေရသည့် လက်တွေ့လိုအပ်ချက်များကို တင်ပြခဲ့ရာ သက်ဆိုင်ရာဌာနများက ပြန်လည်ရှင်းလင်းဖြေကြားခဲ့ကြောင်းသိရှိရသည်။

အဆိုပါအခမ်းအနားကို G.B.S Agricultural Services Public Co., Ltd (ASPGB 00010.YSX) က ပူးပေါင်းဆောင်ရွက်ခဲ့ခြင်းဖြစ်ပြီး အခမ်းအနားကျင်းပရေးအတွက် လိုအပ်သည့် ကုန်ကျစရိတ်များကိုလည်း ကုမ္ပဏီဘက်မှ ကျခံပေးခဲ့ကြောင်း သိရသည်။ ကုမ္ပဏီအနေဖြင့် မြန်မာနိုင်ငံ၏ စိုက်ပျိုးရေးကဏ္ဍတွင် နှစ်ရှည်ဆောင်ရွက်လာခဲ့ပြီး ပြည်တွင်းစိုက်ပျိုးရေးလုပ်ငန်းများ ခေတ်မီဖွံ့ဖြိုးတိုးတက်ရေးနှင့် တောင်သူများ ဈေးကွက်၊ ဘဏ္ဍာရေးဝန်ဆောင်မှုများ ပိုမိုရရှိနိုင်ရေးအတွက် ပူးပေါင်းဆောင်ရွက်လျက်ရှိကြောင်း သိရသည်။