ယခုနှစ် ကမ္ဘာ့ဖလားဘောလုံးပြိုင်ပွဲတွင် အာဂျင်တီးနားအသင်းခေါင်းဆောင် လီယွန်နယ်မက်ဆီသည် ပြိုင်ပွဲ၏ ပထမဆုံး Hat-trick ကို သွင်းယူနိုင်ခဲ့ပြီး ကမ္ဘာ့ဖလားပြိုင်ပွဲသမိုင်းတစ်လျှောက် ဂိုးသွင်းအများဆုံးစံချိန်ကိုလည်း လိုက်မီသွားခဲ့ကြောင်း သိရသည်။
Ballon d’Or ဆု ရှစ်ကြိမ်ရရှိထားသည့် အသက် ၃၈ နှစ်အရွယ် ဝါရင့်တိုက်စစ်မှူး မက်ဆီသည် အုပ်စု(ည)ပွဲစဉ်တွင် အယ်လ်ဂျီးရီးယားအသင်းကို ၃-၀ ဂိုးဖြင့် အနိုင်ရရှိခဲ့သည့်ပွဲ၌ အာဂျင်တီးနားအသင်း၏ သုံးဂိုးစလုံးကို တစ်ဦးတည်း သွင်းယူပေးခဲ့ခြင်းဖြစ်သည်။
အဆိုပါသွင်းဂိုးများနှင့်အတူ မက်ဆီသည် ကမ္ဘာ့ဖလားပြိုင်ပွဲများတွင် စုစုပေါင်း ၁၆ ဂိုးအထိ သွင်းယူထားနိုင်ခဲ့ပြီး ဂျာမနီဂန္ထဝင်တိုက်စစ်မှူး မီယိုဆလပ် ကလိုဆေး (Miroslav Klose) ၏ ကမ္ဘာ့ဖလားဂိုးသွင်းအများဆုံးစံချိန်ကို လိုက်မီကာ ပူးတွဲစံချိန်ရှင် ဖြစ်လာခဲ့သည်။
ကလိုဆေးမှာ ကစားသမားဘဝမှ အနားယူထားပြီးဖြစ်သော်လည်း မက်ဆီမှာ ယခုနှစ်ပြိုင်ပွဲတွင် ဆက်လက်ယှဉ်ပြိုင်နေဆဲဖြစ်ရာ စံချိန်သစ်တင်နိုင်ရန် အခွင့်အရေးကောင်းများ ပိုင်ဆိုင်ထားကြောင်း သုံးသပ်မှုများလည်း ထွက်ပေါ်လျက်ရှိသည်။
မက်ဆီသည် ၂၀၀၆ ခုနှစ်မှစတင်၍ ကမ္ဘာ့ဖလားပြိုင်ပွဲ ခြောက်ကြိမ်ဆက်တိုက် ပါဝင်ယှဉ်ပြိုင်ထားသူဖြစ်ပြီး ပြိုင်ပွဲစုံ ၂၇ ပွဲအထိ ကစားထားကာ ၂၀၂၂ ကာတာကမ္ဘာ့ဖလားတွင်လည်း အာဂျင်တီးနားအသင်းကို ချန်ပီယံဆုရရှိအောင် ဦးဆောင်ပေးခဲ့သူဖြစ်သည်။
တစ်ဖက်တွင်လည်း ဆီနီဂေါအသင်းကို ၃-၁ ဂိုးဖြင့် အနိုင်ရရှိခဲ့သည့်ပွဲတွင် နှစ်ဂိုးသွင်းယူခဲ့သော ပြင်သစ်တိုက်စစ်မှူး ကိုင်လီယန် အမ်ဘက်ပီသည် ကမ္ဘာ့ဖလားသွင်းဂိုး ၁၄ ဂိုးအထိ ရရှိထားပြီဖြစ်ကြောင်း သိရသည်။
အသက် ၂၇ နှစ်အရွယ်သာရှိသေးသည့် အမ်ဘက်ပီသည် ပြင်သစ်လက်ရွေးစင်အသင်းအတွက် စုစုပေါင်း ၅၈ ဂိုးအထိ သွင်းယူထားနိုင်ခဲ့သဖြင့် အိုလီဗီယာ ဂီရူး၏ ၅၇ ဂိုးစံချိန်ကို ကျော်ဖြတ်ကာ ပြင်သစ်အသင်းသမိုင်းတစ်လျှောက် ဂိုးသွင်းအများဆုံးကစားသမားအဖြစ် မှတ်တမ်းသစ် ရေးထိုးနိုင်ခဲ့သည်။
ထို့ပြင် အမ်ဘက်ပီသည် ကမ္ဘာ့ဖလားဂိုးသွင်းအများဆုံးကစားသမားစာရင်းတွင် ဂျာမနီဂန္ထဝင်တိုက်စစ်မှူး ဂတ် မူလာနှင့်အတူ ပူးတွဲတတိယနေရာ၌ ရပ်တည်လျက်ရှိကြောင်း သိရသည်။
ဓာတ်ပုံ – FIFA