“ဘိုးတော်ကင်း” လား ၊ “နို့ထမင်း” လား

ယနေ့ ဖေဖေါ်ဝါရီ (၉) ရက် ညပိုင်းတွင် ကျင်းပတော့မည့် ၂၀၂၄ ခုနှစ်အတွက် မြန်မာရုပ်ရှင်ထူးချွန်ဆု ချီးမြှင့်ပွဲ အခမ်းအနားတွင် အကယ်ဒမီရွေးချယ်ချီးမြှင့်မည့် ဆန်ကာတင်ဇာတ်ကား (၁၈) ကားထဲတွင် အကယ်ဒမီ မြင့်မြတ် ပါဝင်သရုပ်ဆောင်ထားသည့် ရုပ်ရှင်ဇာတ်ကား (၂) ကားပါဝင်နေသည်။

“ဘိုးတော်ကင်း” နှင့် ” နို့ထမင်း” ရုပ်ရှင်းဇာတ်ကား (၂) ကားတွင် အဓိက ဇာတ်ကောင်နေရာမှ ပါဝင်ထားသည့် မြင့်မြတ် ၏ သရုပ်ဆောင်ပီပြင်မှုများကြောင့် ၂၀၂၄ ခုနှစ်အတွက်အကောင်းဆုံး ဇာတ်ကောင် အကယ်ဒမီဆု ရရှိမည်ဟု ထင်ကြေးပေးခံရသူများထဲတွင် မြင့်မြတ်လည်း ပါဝင်နေခြင်းဖြစ်သည်။

အကယ်၍ ယနေ့ည ကျင်းပမည့် ၂၀၂၄ ခုနှစ် မြန်မာ့ရုပ်ရှင် ထူးချွန်ဆု ချီးမြှင့်ပွဲတွင် သရုပ်ဆောင်မြင့်မြတ်သာ အကယ်ဒမီရရှိပါက ၎င်းအနေဖြင့် အကယ်ဒမီ (၃) ဆုရှင် လူငယ်သရုပ်ဆောင်တစ်ယောက်ဖြစ်လာမည် ဖြစ်သည်။

မြင့်မြတ်သည် ၂၀၁၇ ခုနှစ်တွင် ရုံတင်ပြသခဲ့သည့် “အမှောင်တွေရွာချတဲ့မိုးတိမ်” ဇာတ်ကားဖြင့် အမျိုးသားဇာတ်ပို့ဆုကို ပထမဆုံးရရှိခဲ့ပြီး ၂၀၁၉ ခုနှစ်တွင် ရုံတင်ပြသခဲ့သည့် “ရိုးမပေါ်ကျတဲ့ မျက်ရည်” ဇာတ်ကားဖြင့် အကောင်းဆုံး အမျိုးသားဇာတ်ဆောင်ဆုကို ထပ်မံရရှိထားသည့် အကယ်ဒမီ နှစ်ဆုရှင် လူငယ်သရုပ်ဆောင်တစ်ဦး ဖြစ်သည်။

လတ်တလော အကယ်ဒမီရရန် ထင်ကြေးပေးခံထားရသည့် “နို့ထမင်း” ဇာတ်ကားကို ဒါရိုက်တာ ဝင်းထွန်းထွန်း က ဖန်တီး ပုံဖော်ထားပြီး မြင့်မြတ် ၊ ဖြိုးငွေစိုး ၊ ချာလီ ၊ ဖြိုးလေး ၊စစ်နိုင် ၊ ထူးခြား ၊စိုးမြတ်သူဇာ ၊ ခင်ဝင့်ဝါ ၊ ဝေလာရီ ၊ ဦးဇော်ဝင်းနိုင် ၊ K ညီ ၊ ဝါဝါအောင် ၊ အံ့မင်းညို ၊ ရှိုင်းလတ် ၊ သီဟ တို့ ပါဝင်အားဖြည့် သရုပ်ဆောင်ထားသည်။

အလားတူ ” ဘိုးတော်ကင်း ” ဇာတ်ကားကို ဒါရိုက်တာ ကိုဇော် (အရုဏ်ဦး)က ဖန်တီးပုံဖော်ပေးထားပြီး မြင့်မြတ် ၊အိချောပို ၊ခြူးလေး ၊ စည်သူဝင်း ၊ ထက်ထက်ထွန်း ၊ ဥဩသံသာ ၊ သံစဉ်ဆည်းဆာ ၊ လှနုထွန်းတို့ ပါဝင်အားဖြည့်သရုပ်ဆောင်ထားကြသည်။