ဗြိတိန်အဂတိဝန်ကြီး ဟာဆီနာအမှု၌အဂတိရှိသည်ဆို၍နုတ်ထွက်

ရာထူးမှဖြု-တ်ချခံခဲ့ရသည့် အဒေါ်ဖြစ်သူ ဘင်္ဂလားဒေ့ရှ်ဝန်ကြီးချုပ်ဟောင်း ရှိတ်ဟာစီနာနှင့် ဘဏ္ဍာ‌ငွေ‌ကြေးဆိုင်ရာ ဆက်ဆံမှုရှိခဲ့သည့်အပေါ် မေးခွန်းထုတ်ခံခဲ့ရအပြီး ရက်သတ္တပတ်များအကြာတွင် ဗြိတိန် ဘဏ္ဍာရေးဝန်ဆောင်မှုနှင့် အဂတိတိုက်ဖျက်ရေးဝန်ကြီးသည် ရာထူးမှ နုတ်ထွက်လိုက်ကြောင်း သိရသည်။

သူ့အနေဖြင့် မည်သည့်အမှားအယွင်းမျှ မလုပ်ခဲ့ကြောင်း အသက် ၄၂ နှစ်အရွယ် ဝန်ကြီး တူလစ် ဆစ်ဒစ်က အကြိမ်ကြိမ်ငြင်းဆိုခဲ့သကဲ့သို့ ဝန်ကြီးချုပ် ကီယာ စတာမာကလည်း သူ့ဝန်ကြီးအပေါ် အပြည့်အ၀ ယုံကြည်မှုရှိကြောင်း ပြောဆိုထားသည်။

အင်္ဂါနေ့က ဝန်ကြီး၏ နုတ်ထွက်မှုသည် နှစ်လအတွင်း ဒုတိမြောက် အစိုးရဝန်ကြီးတစ်ဦးနုတ်ထွက်မှုဖြစ်ခဲ့ပြီး ဇူလိုင်လက အထွေထွေရွေးကောက်ပွဲတွင် သူ၏ လေဘာပါတီ အနိုင်ရခဲ့ပြီးနောက်ပိုင်း လူထုထောက်ခံမှုနှုန်း ကျဆင်းလာမှုကို ရင်ဆိုင်နေရသည့် စတာမာအတွက် ထိုးနှက်ချက်ဖြစ်ခဲ့သည်။

သူ့အနေဖြင့် အမှားအယွင်းမလုပ်ခဲ့ကြောင်း သို့သော်လည်း ဘဏ္ဍာရေးဌာနတွင် အလုပ်တာဝန်ကို ဆက်လက်ထမ်းဆောင်နေပါက အစိုးရ၏ လုပ်ငန်းကို အာရုံမစိုက်နိုင်ဖြစ်လာနိုင်သည်ဟု ဝန်ကြီးချုပ်ထံ တင်ခဲ့သော နုတ်ထွက်စာတွင် ဆစ်ဒစ်က ပြောဆိုခဲ့သည်။

သူ၏ နုတ်ထွက်မှုကို စိတ်မကောင်းစွာဖြင့် လက်ခံလိုက်ကြောင်း စတာမာက ပြောဆိုခဲ့သည်။
သူလုပ်ဆောင်ခဲ့မှုအတွက် ကျေးဇူးတင်ကြောင်းနှင့် သူအနေဖြင့် ငွေကြေးမလျော်မကန်လုပ်သည့် အထောက်အထားမျိုးမရှိကြောင်းကို လက်ခံကြောင်း စတာမာက ဆက်လက်ပြောဆိုခဲ့သည်။

ဘင်္ဂလားဒေ့ရှ်နိုင်ငံကို ၂၀၀၉ ခုနှစ်ကတည်းက အုပ်ချုပ်ခဲ့သော ဟာစီနာသည် အကျင့်ပျက်ခြစားမှု၊ ငွေကြေးခဝါချမှု သံသယများဖြင့် စုံစမ်းစစ်ဆေးခံနေရသည်။ ဟာစီနာနှင့် သူ၏ ပါတီကမူ အမှားအယွင်းမလုပ်ခဲ့ကြောင်း ငြင်းဆိုထားခဲ့ကြသည်။

ဘင်္ဂလားဒေ့ရှ် စုံစမ်းစစ်ဆေးမှု၏ တစ်စိတ်တစ်ပိုင်းအဖြစ် ဘင်္ဂလားဒေ့ရှ်၏ အခြေခံအဆောက်အဦဆိုင်ရာ စီမံကိန်းများမှ ရန်ပုံငွေများထုတ်ယူရာတွင် သူ၏ မိသားစုပါဝင် ပတ်သက်ခဲ့မှု ရှိ မရှိနှင့် ပတ်သက်၍ ဆစ်ဒစ်ကို စစ်ဆေးရန် ဒီဇင်ဘာလတွင် အမည်စာရင်းထည့်သွင်းခံခဲ့ရသည်။

ဒေါ်လာ ၁၂ ဒဿမ ၆၅ ဘီလျံတန် နျူကလီးယားစွမ်းအင်ဆိုင်ရာ စာချုပ်ချုပ်ဆိုနိုင်ခဲ့ရာတွင် ဒေါ်လာဘီလျံနှင့်ချီ၍ ငွေကြေးပိုင်းဆိုင်ရာ အမှားအယွင်းများရှိခဲ့ကြောင်းနှင့် ဟာစီနာနှင့် ဆစ်ဒစ်တို့သည် အကျိုးအမြတ်ရခဲ့နိုင်ကြောင်း အကျင့်ပျက်ခြစားမှု တိုက်ဖျက်ရေးကော်မရှင်က စွပ်စွဲထားသည်။

Ref: အယ်ဂျာဇီးယား