ယူကရိန်းတပ်ဖွဲ့များက ဖမ်းဆီးရမိထားသည့် မြောက်ကိုရီးယား စစ်သားနှစ်ဦးကို ရုရှားရှိ ယူကရိန်း စစ်သုံ့ပန်းများနှင့်လဲလှယ်၍ ပြုံယမ်းသို့ လွှဲပြောင်းပေးရန် မိမိအနေဖြင့် ဆန္ဒရှိကြောင်း ယူကရိန်းသမ္မတ ဇလန်းစကီး ပြောကြားလိုက်သည်။
“မပြန်ချင်တဲ့ မြောက်ကိုရီးယားစစ်သားတွေအတွက် တခြားရွေးချယ်စရာတွေ ရှိနိုင်ပါသေးတယ်” ဟုလည်း ဇလန်းစကီးက X တွင် ပြောကြားခဲ့ပါသည်။ “ကိုရီးယားမှာ ဒီစစ်ပွဲနဲ့ပတ်သက်တဲ့ အမှန်တရားကို ဖြန့်ကျက်ပြီး ငြိမ်းချမ်းရေးကို လိုချင်တဲ့သူတွေအတွက် အခွင့်အရေးတွေပေးသွားမှာပါ”ဟုလည်း သူကဆက်ပြောသည်။
ဖမ်းမိထားသော မြောက်ကိုရီးယား စစ်သားနှစ်ဦးအနက်မှ တစ်ဦးသည် တိုက်ခိုက်ရန်ထက် ရုရှားနိုင်ငံသို့ “လေ့ကျင့်ရေး” သွားရမည်ဟုသာ ထင်မှတ်ထားကြောင်း တာဝန်ရှိသူများအား ပြောကြားခဲ့သည်ဟု ယူကရိန်းလုံခြုံရေးဝန်ဆောင်မှုဌာန(SBU)က ဆိုသည်။
သူ့ထံတွင် အခြားသူတစ်ဦး၏အမည်ဖြင့် ထုတ်ပေးထားသော ရုရှားစစ်တပ် ID ကတ်တစ်ခုကို တွေ့ရှိခဲ့သည်။ ကျန်စစ်သားတွင်မူ မည်သည့် စာရွက်စာတမ်းမျှမရှိချေ။
ဇန်နဝါရီလ ၉ ရက်နေ့က ဖမ်းဆီးခံခဲ့ရသော အဆိုပါ မြောက်ကိုရီးယား စစ်သားနှစ်ဦးသည် ယခုအခါကိယက်ဗ်မြို့တွင် နေထိုင်နေပြီး ဆေးကုသမှု ခံယူနေကြသည်ဟုလည်း SBU က ပြောသည်။
၎င်းတို့သည် ကိုရီးယားဘာသာစကားကိုသာ ပြောဆိုတတ်ကြပြီး တောင်ကိုရီးယား အမျိုးသားထောက်လှမ်းရေးဌာန၏ အကူအညီဖြင့် စစ်ဆေးမေးမြန်းခြင်းများ ပြုလုပ်နေရကြောင်းကိုလည်း SBU က ပြောသည်။
ယူကရိန်းနှင့် စစ်ပွဲတွင် မြောက်ကိုရီးယားတပ်များ အသုံးပြုခြင်းကို ရုရှားက ငြင်းဆိုထားခြင်းမရှိချေ။ ယင်းသို့ တပ်များချအသုံးပြုခြင်း ရှိ၊မရှိဆိုသည်မှာ မိမိတို့နိုင်ငံ၏ “အချုပ်အခြာအာဏာပိုင်ဆုံးဖြတ်ချက်” ဖြစ်သည်ဟု သမ္မတ ဗလာဒီမာပူတင်က ပြီးခဲ့သည့်နှစ် အောက်တိုဘာလက ပြောကြားခဲ့သည်။