၂၀၂၃ ခုနှစ် ဧပြီလ ၁ ရက်မှ ၁၅ ရက်အထိ ပြည်ပသို့ ပင်လယ်ရေကြောင်း၊ တရုတ်-မြန်မာ နယ်စပ် ကုန်သွယ်ရေးနှင့် ထိုင်း-မြန်မာ နယ်စပ် ကုန်သွယ်ရေးတို့မှတစ်ဆင့် ပို့ကုန်တင်ပို့ခဲ့ပြီး ပို့ကုန်ရငွေ ပြန်လည် ဝင်ရောက်ရန် ကျန်ရှိသည့် ကုမ္ပဏီ (၁၅၇) ခုကျန်ရှိနေသေးကြောင်း ကြားသိနေရသည်။
အဆိုပါ ကုမ္ပဏီများကို ဩဂုတ်လ ၁၁ ရက်နောက်ဆုံးထား၍ ပို့ကုန်ရငွေများကို စာရင်းရှင်းလင်းပေးရမည်ဖြစ်ပြီး စာရင်းရှင်းလင်းခြင်းမရှိပါက ၁၄ ရက်နေ့တွင် ပို့ကုန်သွင်းကုန်လိုင်စင်ပိတ်သိမ်းသည်အထိ အရေးယူခံရနိုင်ဖွယ်ရှိကြောင်း သိရသည်။
ယင်းကြောင့် အဆိုပါ ကုမ္ပဏီ (၁၅၇) ခု စာရင်းတွင် မိမိတို့ ကုမ္ပဏီများ ပါ/မပါ စစ်ဆေးကြရန်လည်းလိုအပ်မည်ဖြစ်သည်။
“ပြည်ပကိုတင်ပို့ပြီး ရလာတဲ့နိုင်ငံခြားဝင်ငွေကို မြန်မာ့စီးပွားရေးဘဏ်အပါအဝင် လိုင်စင်ရဘဏ် ၆ ခုမှာ သူတို့သတ်မှတ်ထားတဲ့အတိုင်း လုပ်ဆောင်ရတယ်။ တစ်နေ့ဟာ တစ်နေ့ရှင်းတယ်။နောက်ရက်ကူးသွားရင်အဆင်မပြေဘူး”ဟု မူဆယ်ဆန်စပါးကုန်စည်ဒိုင်မှ ဒုဥက္ကဌ ဦးမင်းသိမ်းကပြောသည်။
ပို့ကုန်တင်ပို့သူသည် ပို့ကုန်ရငွေ အားလုံးကို ပို့ကုန် တင်ပို့သည့်နေ့မှ (၃)လအတွင်း နိုင်ငံတော်အတွင်းရှိ ယင်း၏ ဘဏ်ငွေစာရင်းသို့ နိုင်ငံခြားသုံးငွေဖြင့် မပျက်မကွက်ထည့်သွင်းရန် ပြဋ္ဌာန်း သတ်မှတ်ထားကြောင်း၊ သို့ဖြစ်ပါ၍ ပို့ကုန်တင်ပို့သူများ အနေဖြင့် နိုင်ငံခြားသုံးငွေ စီမံခန့်ခွဲမှုဥပဒေ၊ နိုင်ငံခြားသုံးငွေစီမံခန့်ခွဲမှု စည်းမျဉ်းတို့တွင် ပြဋ္ဌာန်းသတ်မှတ်ထားသည့်အတိုင်း ပို့ကုန်ရငွေများအားလုံးကို ပို့ကုန်တင်ပို့သည့်နေ့မှ (၃)လအတွင်း နိုင်ငံတော် အတွင်းရှိ ပို့ကုန်တင်ပို့သူ၏ ဘဏ်ငွေစာရင်းသို့ မပျက်မကွက် ထည့်သွင်းရန်နှင့် လိုက်နာဆောင်ရွက်ရန် ပျက်ကွက်ကြောင်း စိစစ်တွေ့ရှိရပါက နိုင်ငံခြားသုံးငွေ စီမံခန့်ခွဲမှု ဥပဒေပုဒ်မ ၄၂-က အရ အရေးယူ ဆောင်ရွက်သွားမည်ဟု ဗဟိုဘဏ်မှ ၂၀၂၂ ခုနှစ်တွင်အသိပေးကြေညာထားပြီးဖြစ်သည်။
ထို့ပြင် ပို့ကုန်တင်ပို့သူများအနေဖြင့် ပို့ကုန်တင်ပို့ခြင်းမှရရှိသည့် ပို့ကုန်ဝင်ငွေ ၆၅ အစား ၅၀ ရာခိုင်နှုန်းကိုဗဟိုဘဏ်မှ ဇူလိုင် ၁၃ ရက်တွင် ပြောင်းလဲသတ်မှတ်ထားသည်။