ပြည်ပထွက်ခွာသူများ နိုင်ငံခြားငွေသားဝယ်ယူနိုင်ရန် ရန်ကုန်လေဆိပ်ရှိ ဘဏ်ကောင်တာတွင်ရောင်းချပေးမည်

ရန်ကုန်လေဆိပ်မှတဆင့် ပြည်ပသို့အမှန်တကယ်ထွက်ခွာမည့်သူများ အသေးသုံးနိုင်ငံခြားငွေ ငွေသားဝယ်ယူရာတွင် အဆင်ပြေလွယ်ကူစေရန် နိုင်ငံခြားသုံးငွေများရောင်းဝယ်ဖောက်ကားသည့်လုပ်ငန်း(AD)လိုင်စင်ရဘဏ် ၁၂ ခုမှ ရန်ကုန်လေဆိပ်ရှိ ဘဏ်ကောင်တာ ၃ခုတွင် နေ့စဥ်အလှည့်ကျရောင်းချပေးသွားမည်ဖြစ်ကြောင်း ဗဟိုဘဏ်ကကြေညာခဲ့သည်။

ကမ္ဘောဇဘဏ်လီမိတက်၊ AYA Bank PCL၊ CB Bank PCL ၊ မြန်မာ့ရှေ့ဆောင်ဘဏ်၊ ဧရာဝတီတောင်သူလယ်သမားများဖွံ့ဖြိုးရေးဘဏ်လီမိတက်၊ ရိုးမဘဏ်လီမိတက်၊ ယူအေဘီ ဘဏ်လီမိတက်၊ အာရှစိမ်းလန်းမှုဖွံ့ဖြိုးရေးဘဏ်လီမိတက် ၊ မြန်မာအရှေ့တိုင်းဘဏ်လီမိတက်၊ မြန်မာနိုင်ငံသားများဘဏ်လီမိတက်၊ ကမ္ဘာ့ရတနာဘဏ်လီမိတက်နှင့်အင်းဝဘဏ်လီမိတက်တို့မှ ရောင်းချပေးသွားမည်ဖြစ်သည်။

အဆိုပါ ဘဏ်များ၌ နိုင်ငံခြားသုံးငွေ ငွေသားများအား လေဆိပ်ကောင်တာများအပြင် အသေးသုံးနိုင်ငံခြားငွေ ငွေသားရောင်းချပေးသည့်အစီအစဉ်အရလည်းဝယ်ယူနိုင်ကာ ယင်း ဘဏ်များ၏ Website နှင့်လူမှုကွန်ယက်စာမျက်နှာများတွင်လည်း ကြေညာထားသည်။

ဗဟိုဘဏ်မှ AD လိုင်စင်ရဘဏ်များအား ငွေကြေးအမျိုးအစား ၇ မျိုးဖြစ်သည့် အမေရိကန်ဒေါ်လာ၊ ယူရို၊ စင်္ကာပူဒေါ်လာ၊ ထိုင်းဘတ်၊ မလေးရှားရင်းဂစ်၊ တရုတ်ယွမ်နှင့် ဂျပန်ယန်းတို့အား ရောင်းဝယ်ရန်ခွင့်ပြုထားသည်။

မြန်မာနိုင်ငံသားများ ပြည်ပသို့ထွက်ခွာရာတွင် နိုင်ငံတကာငွေပေးချေမှုကတ်များ(Debit Card နှင့် Credit Card)အပြင် အသေးသုံးနိုင်ငံခြားငွေ ငွေသားဆောင်ယူသွားနိုင်ရန်၊ဈေးကွက်အတွင်း လွယ်ကူစွာဝယ်ယူနိုင်ရန်နှင့်တရားမဝင်ငွေလဲလှယ်နေသူများက ဈေးကစားခြင်းကိုထိန်းသိမ်းရန် ရန်ကုန်လေဆိပ်(သို့) AD လိုင်စင်ရဘဏ်များ၏ Money Changer ကောင်တာများတွင် ပြည်ပသို့ သွားရောက်အလုပ်လုပ်ကိုင်မည့်သူ၊ဆေးကုသရန်သွားရောက်မည့်သူနှင့်ပညာသင်သွားရောက်မည့်သူများအား တစ်ဦးလျှင် နိုင်ငံခြားငွေ ငွေသား အမေရိကန်ဒေါ်လာ ၃၀၀ မှ ၅၀၀ ခန့် (ယင်းနှင့်ညီမျှသောနိုင်ငံခြားငွေ ငွေသား)ရောင်းချခြင်းကို မေ ၃၁ ရက်မှစတင်ဆောင်ရွက်လျက်ရှိသည်။

ထို့ပြင် ပြည်ပသို့ထွက်ခွာသူများအနက် ဘုရားဖူးထွက်ခွာသူများ၊ပြည်ပနိုင်ငံအစိုးရနှင့်အသင်းအဖွဲ့များ၏ ဖိတ်ကြားချက်အရ အစည်းအဝေးတက်ရောက်ရန် ထွက်ခွာသူများကိုလည်း ရောင်းချပေးသွားမည်ဖြစ်သည်။