ယခု ၂၀၂၄-၂၀၂၅ ဘဏ္ဍာနှစ်တွင် ပြည်ပသို့ ဆန်နှင့်ဆန်ကွဲတန်ချိန် ၂ သန်းခွဲတင်ပို့ရန်လျာထားပြီး ယင်းထက်ပိုမိုတင်ပို့နိုင်မည်ဖြစ်ကြောင်း မြန်မာနိုင်ငံဆန်စပါးအသင်းချုပ်(MRF) နှစ်ပတ်လည်အစည်းအဝေးနှင့် အထွေထွေညီလာခံတွင် ထုတ်ပြန်သည့် မြန်မာနိုင်ငံဆန်စပါးအသင်းချုပ်၏ ၂၀၂၄ ခုနှစ် အစီရင်ခံစာတွင် ဖော်ပြထားသည်။
ဆန်တင်ပို့မှုအနေဖြင့် ယခုဘဏ္ဍာနှစ် ဧပြီလမှ ဒီဇင်ဘာလအထိ ၉ လအတွင်း တန်ချိန် ၂ သန်းကျော်တင်ပို့မှုမှ ဒေါ်လာသန်း ၉၅၀ ခန့်အထိ ရရှိထားကြောင်း ၊ ထို့ပြင် ၂၀၂၄ ခုနှစ် ဇန်နဝါရီလမှ ဒီဇင်ဘာလကုန်အထိ တစ်နှစ်အတွင်း ပြည်ပသို့ ဆန်နှင့်ဆန်ကွဲ တန်ချိန် ၂ ဒသမ ၇၆၇ သန်းတင်ပို့မှုမှ ဒေါ်လာ ၁ ဒသမ ၃၃၂ ဘီလီယံရရှိခဲ့ကြောင်းလည်း သိရသည်။
ယခုဘဏ္ဍာနှစ်တွင် ပြည့်သို့ ဆန်နှင့်ဆန်ကွဲတန်ချိန် ၂ ဒသမ ၅ သန်း (တစ်လလျှင် တန်ချိန် ၂ သိန်းကျော်) တင်ပို့ရန်လျာထားသော်လည်း ဘဏ္ဍာနှစ်အစ လေးလဆက်တိုက် တင်ပို့မှုဆလျာ့ကျခဲ့ကြောင်း၊ သို့သော် ပို့ကုန်ရငွေ ၇၅ ရာခိုင်နှုန်းအထိ လွတ်လပ်စွာရောင်းဝယ်ခွင့်ပြုခဲ့သည့် ၂၀၂၄ ခုနှစ် ဩဂုတ်လမှ စတင်ပြီး လစဉ်တင်ပို့ရမည့် ဆန်နှင့်ဆန်ကွဲတန်ချိန် ၂ သိန်းကျော် တင်ပို့နိုင်ခဲ့ပြီးနောက် ငါးလဆက်တိုက် လျာထားချက်ပြည့်မီခဲ့ကြောင်း သိရသည်။