ပြည်တွင်းသုံးသဘာဝဓာတ်ငွေ့၏ (၈၅)ရာခိုင်နှုန်းကို လျှပ်စစ်ဓာတ်အားကဏ္ဍ၊ (၈)ရာခိုင်နှုန်းကို စက်မှု/ကုန်ထုတ်လုပ်မှုကဏ္ဍ၊ (၇)ရာခိုင်နှုန်းကို သယ်ယူပို့ဆောင်ရေးကဏ္ဍတို့၌ အသုံးပြုလျက်ရှိသည်။
မော်တော်ယာဉ်များတွင် CNG သုံးစွဲခြင်းသည် ဓာတ်ဆီ၊ ဒီဇယ်ဆီသုံးစွဲခြင်းများထက် ကုန်ကျစရိတ်များစွာသက်သာပြီး ကာဗွန်ထုတ်လွှတ်မှုလျော့နည်းသဖြင့် သယ်ယူပို့ဆောင်ရေးကဏ္ဍတွင် CNG သုံးစွဲမှုကို မြှင့်တင်နိုင်ရေးဆောင်ရွက်လျက်ရှိကာ နိုင်ငံတော်မှ ခရီးသွားများ ဈေးနှုန်းသက်သာစေရန် CNG ကို YBS ယာဉ်များနှင့် အငှားယာဉ်(Taxi)များကိုဦးစားပေး၍ အထူးသက်သာသောဈေးနှုန်းဖြင့် စိုက်ထုတ်ရောင်းချပေးလျက်ရှိသည်။
အများပြည်သူသယ်ယူပို့ဆောင်ရေးကဏ္ဍ အဆင်ပြေချောမွေ့စေရေးအတွက် ဖိအားမြှင့်သဘာဝ ဓာတ်ငွေ့(Compressed Natural Gas–CNG) ဖြန့်ဖြူးပေးခြင်းကို စွမ်းအင်ဝန်ကြီးဌာနမှ ဆောင်ရွက်ပေးလျက်ရှိသည်။
ထို့အတူ စွမ်းအင်ဝန်ကြီးဌာနမှ ထွက်ရှိလာသည့် သဘာဝဓာတ်ငွေ့ကို ပြည်ပသို့တင်ပို့ဖြန့်ဖြူးရောင်းချခြင်းအပြင် ပြည်တွင်း၌ လျှပ်စစ်ဓာတ်အားထုတ်လုပ်နိုင်ရေးနှင့် စက်ရုံအလုပ်ရုံများ၏ ကုန်ထုတ်လုပ်မှုလုပ်ငန်းများဆောင်ရွက်နိုင်ရန် ဖြန့်ဖြူးပေးလျက်ရှိသည်။
ထို့ကြောင့် နိုင်ငံ့စီးပွားဖွံ့ဖြိုးတိုးတက်ရေးအတွက် ပြည်တွင်းသဘာဝဓာတ်ငွေ့သုံးစွဲမှုအား အကျိုးရှိထိရောက်စွာအသုံးပြုနိုင်ရေးညှိနှိုင်းအစည်းအဝေးကို သြဂုတ် ၃၁ ရက်က ရန်ကုန်မြို့၌ကျင်းပရာ စွမ်းအင်ဝန်ကြီးဌာန ပြည်ထောင်စုဝန်ကြီးဦးကိုကိုလွင်တက်ရောက်ခဲ့သည်။