နှစ်နိုင်ငံ ခရီးသွားကုမ္ပဏီများ၏ စီစဉ်ဆောင်ရွက်မှုဖြင့် မြန်မာနိုင်ငံအတွင်းသို့ လေကြောင်းခရီးစဉ်ဖြင့် ဝင်ရောက်လာသည့် တရုတ်နိုင်ငံသား ခရီးသွားများကို ဟိုတယ်နှင့် ခရီးသွားလာရေး ဝန်ကြီးဌာန နီလာခန်းမတွင် ပြည်ထောင်စုဝန်ကြီးက ကြိုဆိုလက်ခံတွေ့ဆုံခဲ့ကြောင်း သိရသည်။
အဆိုပါ တရုတ်ခရီးသွားများသည် Package Tour အစီအစဉ်ဖြင့် ပြည်တွင်းသို့ ဝင်ရောက်လာခြင်းဖြစ်ပြီး ပြည်ထောင်စုဝန်ကြီး ဒေါက်တာသက်သက်ခိုင်က လက်ခံတွေ့ဆုံခဲ့ခြင်း ဖြစ်ကြောင်းလည်း သိရသည်။
ယင်းတွေ့ဆုံမှုတွင် ပြည်ထောင်စုဝန်ကြီးက “တရုတ်နိုင်ငံက အစိုးရအနေနဲ့ တရုတ်ခရီးသွားတွေကို အဖွဲ့လိုက် ခရီးသွားခွင့်ပြုတဲ့ နိုင်ငံတွေစာရင်းမှာ မြန်မာနိုင်ငံပါရှိတဲ့အတွက်ကျေးဇူးတင်ရှိပါတယ်”ဟု ပြောကြားခဲ့သည်။
တရုတ်ခရီးသွားအဖွဲ့ ခေါင်းဆောင် Mr. Dao Chengfu မှ တရုတ်နိုင်ငံ၏ လူမှုကွန်ရက်စာမျက်နှာများတွင် ဖော်ပြနေသည့် မြန်မာနိုင်ငံနှင့် ပတ်သက်သော သတင်းတု သတင်းအမှားများကို ချေဖျက်လို၍ ယခုခရီးစဉ်ကို စီစဉ်ဆောင်ရွက်ခြင်းဖြစ်ပြီး ခရီးစဉ်ပြီးဆုံးပါက မြန်မာနိုင်ငံရှိ ခရီးစဉ်ဒေသများ၏ ကောင်းမွန်သောအတွေ့အကြုံများနှင့် အေးချမ်းသာယာမှုရှိကြောင်း သတင်းစကားများကိုဖြန့်ဝေပေးသွားမည်ဖြစ်ကြောင်း ပြည်ထောင်စုဝန်ကြီးနှင့်တွေ့ဆုံစဉ်ပြောကြားခဲ့သည်။
ထို့အပြင် ခရီးသွားများ ပိုမိုလာရောက်ရန် ဆောင်ရွက်သွားမည်ဖြစ်ပြီး တရုတ်-မြန်မာနှစ်နိုင်ငံ ဆွေမျိုးပေါက်ဖော်ချစ် ကြည်ရေးခိုင်မြဲသည့်အတွက် တရုတ်ခရီးသွားများ မြန်မာနိုင်ငံသို့ ပိုမိုဝင်ရောက်လာရန် ဆောင်ရွက်သွားမည်ဟုလည်းဆွေးနွေးပြောကြားခဲ့သည်။
အဆိုပါ တရုတ် ခရီးသွားအဖွဲ့သည် စက်တင်ဘာ (၃၀) ရက်တွင် တရုတ်နိုင်ငံ မန်စီမြို့မှ မန္တလေးမြို့သို့ လေကြောင်းခရီးဖြင့် ရောက်ရှိလာပြီး မြန်မာနိုင်ငံရှိ ခရီးစဉ်ဒေသများကို လည်ပတ်ရန် စီစဉ်ထားကြောင်း သိရသည်။
