မကွေးတိုင်းဒေသကြီးရှိ ၁၃၂ ကေဗွီ မကွေး-တောင်တွင်းကြီး ဓာတ်အားလိုင်းအား နည်းပညာမြင့် ဖိုင်ဘာအူတိုင် အလူမီနီယံကြိုး (ACCC) ဖြင့် အစားထိုးလဲလှယ်ခြင်းလုပ်ငန်းကို မေ ၂၂ ရက်မှ စတင်ဆောင်ရွက်လျက်ရှိရာ မေ ၃၁ ရက်အထိ ၁၀ ရက်အတွင်း လုပ်ငန်းတိုးတက်မှု ၁၂ ဒသမ ၇၉ ရာခိုင်နှုန်း ပြီးစီးခဲ့ကြောင်း သိရသည်။
အဆိုပါ နည်းပညာမြင့် ဖိုင်ဘာအူတိုင် အလူမီနီယံကြိုးသည် လက်ရှိအသုံးပြုနေသည့် ကြိုးများထက် ဝန်အား နှစ်ဆကျော် သယ်ဆောင်နိုင်မည်ဖြစ်ပြီး မကွေးတိုင်းဒေသကြီးအတွင်း တည်ဆောက်ပြီးနှင့် တည်ဆောက်ဆဲ ဓာတ်အားပေးစက်ရုံများမှ ထုတ်လုပ်သည့် လျှပ်စစ်ဓာတ်အားများကို နိုင်ငံတော်ဓာတ်အားစနစ်ကွန်ရက်သို့ ပိုမိုပို့လွှတ်နိုင်ရန်၊ ဓာတ်အားစနစ် တည်ငြိမ်ကောင်းမွန်စေရန်နှင့် ဗို့အားအရည်အသွေး မြှင့်တင်နိုင်ရန် ရည်ရွယ်ဆောင်ရွက်ခြင်းဖြစ်ကြောင်း သိရသည်။
ယင်းလုပ်ငန်းအတွက် လက်ရှိအသုံးပြုနေသည့် ACSR ဓာတ်အားလိုင်းကြိုးများကို အစားထိုးလဲလှယ်လျက်ရှိပြီး လုပ်ငန်းဆောင်ရွက်စဉ်ကာလအတွင်း ဓာတ်အားပိတ်၍ ဆောင်ရွက်လျက်ရှိကြောင်း သိရသည်။
ထို့ပြင် ကျန်ရှိနေသည့် ဓာတ်အားလိုင်းအပိုင်းများကို ဆက်လက်အစားထိုးလဲလှယ်ရန် ဇွန် ၅ ရက် နံနက် ၆ နာရီမှ ဇွန် ၇ ရက် ညနေ ၆ နာရီအထိ ဆောင်ရွက်သွားမည်ဖြစ်ကြောင်း သိရသည်။
အဆိုပါ လုပ်ငန်းဆောင်ရွက်နေစဉ်အတွင်း လိုအပ်ပါက ဓာတ်အားဝန်အား ထိန်းညှိဆောင်ရွက်မှုများ ပြုလုပ်ရနိုင်ကြောင်း လျှပ်စစ်နှင့် စွမ်းအင်ဝန်ကြီးဌာနက အသိပေးထားသည်။