ပဲခူးတိုင်းတွင် ကျောင်းအပ်နှံရေးလှုပ်ရှားမှု လက်ကမ်းစာစောင်များ အရှိန်အဟုန်ဖြင့် ဖြန့်ဝေ

ပဲခူးတိုင်းဒေသကြီးအတွင်း ၂၀၂၆-၂၀၂၇ ပညာသင်နှစ်အတွက် ကျောင်းအပ်နှံရေးလှုပ်ရှားမှု လက်ကမ်းစာစောင်များ အရှိန်အဟုန်ဖြင့် ဖြန့်ဝေလျက်ရှိကြောင်း သိရသည်။

ပဲခူးတိုင်းဒေသကြီးအတွင်း ၂၀၂၆-၂၀၂၇ ပညာသင်နှစ်တွင် ကျောင်းနေအရွယ်ကလေးများအားလုံး ကျောင်းအပ်နှံနိုင်ရေးနှင့် စာသင်ခန်းတွင် ပျော်ရွှင်စွာ ပညာသင်ကြားနိုင်ရေး ရည်ရွယ်၍ “နိုင်ငံတော် စဉ်ဆက်မပြတ် ဖွံ့ဖြိုးတိုးတက်ဖို့ ကျောင်းနေအရွယ်ကလေးအားလုံး ကျောင်းအပ်နှံစို့” ဟူသော လက်ကမ်းစာစောင်များကို သက်ဆိုင်ရာစုရပ်အလိုက် ဖြန့်ဝေလျက်ရှိကြောင်း သိရသည်။

အဆိုပါလှုပ်ရှားမှုကို မေလ ၁၄ ရက်နေ့မှစတင်၍ ပဲခူးတိုင်းအတွင်းရှိ မြို့နယ် ၂၈ မြို့နယ်တွင် နေ့စဉ် ဆောင်ရွက်လျက်ရှိပြီး ဆရာ/ဆရာမများ၊ ဌာနဆိုင်ရာတာဝန်ရှိသူများနှင့် ရပ်မိရပ်ဖများ ပူးပေါင်းပါဝင် ဆောင်ရွက်နေကြောင်း သိရသည်။

ထို့အပြင် ခရိုင်နှင့် မြို့နယ်စီမံခန့်ခွဲရေးနှင့် အုပ်ချုပ်ရေးကော်မတီများမှ တာဝန်ရှိသူများကလည်း လူစည်ကားရာ ဈေးများ၊ လမ်းမများနှင့် စာသင်ကျောင်းရှေ့များတွင် လက်ကမ်းစာစောင်များ ဖြန့်ဝေခြင်းကို ဆောင်ရွက်လျက်ရှိသည်။

ရပ်ကွက်နှင့် ကျေးရွာအုပ်စု အုပ်ချုပ်ရေးမှူးများကလည်း သက်ဆိုင်ရာဒေသအလိုက် ကျောင်းနေအရွယ်ကလေးများ ကျောင်းအပ်နှံရေးနှင့် ကျောင်းနေမြဲရေးအတွက် လိုက်လံနှိုးဆော်မှုများကို အရှိန်မြှင့် ဆောင်ရွက်လျက်ရှိကြောင်း သိရသည်။