ပေါ်ဆန်းမွှေးဆန်ကို နိုင်ငံတကာ တင်ပို့နိုင်သည့် တံဆိပ်ရရှိရေး ဆွေးနွေး

ပြည်တွင်း၌ စိုက်ပျိုးထွက်ရှိသည့် ပေါ်ဆန်းမွှေးဆန်ကို နိုင်ငံတကာတင်ပို့နိုင်သည့် တံဆိပ်ရရှိရေး ဆောင်ရွက်ရန် ဆွေးနွေးခဲ့ကြောင်း သိရသည်။

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနနှင့် မြန်မာနိုင်ငံဆန်စပါးအသင်းချုပ်တို့၏ ပူးပေါင်းစီစဉ်မှုဖြင့် ဆန်စပါး မျိုးစေ့ထုတ်လုပ်ငန်းများ ဖွံ့ဖြိုးတိုးတက်ရေးနှင့် Export Zone များ ဖော်ဆောင်ရေးအတွက် အစိုးရ-ပုဂ္ဂလိက တွေ့ဆုံဆွေးနွေးပွဲတွင်ထည့်သွင်းဆွေးနွေးခဲ့ခြင်းဖြစ်သည်။

အဆိုပါ ဆွေးနွေးပွဲမှ ပြည်ပသို့ ဆန်တင်ပို့သည့် ကုမ္ပဏီများအနေဖြင့် တောင်သူလယ်သမားများနှင့် ပူးပေါင်းလျက် ကန်ထရိုက်လယ်ယာကို Export Zone အဖြစ် သတ်မှတ်ဆောင်ရွက်ပေးကြရန်၊ အဆိုပါ ဇုန်များတွင် ပြည်ပတင်ပို့မည့် စပါးမျိုးများကို သတ်မှတ်စိုက်ပျိုးရန်၊ စိုက်ပျိုးမည့် မျိုးလိုအပ်ချက်အား သက်ဆိုင်ရာဌာနများနှင့် မျိုးစေ့ထုတ်ကုမ္ပဏီများမှ ပူးပေါင်းစီစဉ်ပေးရန်၊ Export Zone ကို ကန်ထရိုက်လယ်ယာ SOP များနှင့်အညီ စိုက်ပျိုးထုတ်လုပ်ပေးရန်၊ ပေါ်ဆန်းမွှေးဆန်ကို နိုင်ငံတကာ တင်ပို့နိုင်သည့် တံဆိပ်ရရှိရေးနှင့် တင်ပို့နိုင်ရေး ကြိုးပမ်းဆောင်ရွက်ရန်၊ တောင်သူလယ်သမားများ စီးပွားရေးတွက်ချေကိုက်သည့် စပါးဈေးနှုန်းရရှိရေးအတွက် ပို့ကုန်တိုးမြှင့်တင်ပို့နိုင်ရေး၊ သွင်းအားစု ကုန်ကျစရိတ်များ လျော့ချနိုင်ရေး၊ အထွက်နှုန်းတိုးတက်စေရေးစသည့် နည်းလမ်းပေါင်းစုံဖြင့် အစိုးရ-ပုဂ္ဂလိက ပူးပေါင်းဆောင်ရွက်ရန်တို့ကို ဆွေးနွေးခဲ့ကြကြောင်း သိရသည်။

လတ်တလော အခြေအနေအရ နိုင်ငံတကာစျေးကွက် ဆန်စျေးနှုန်းများ အလွန်ကျဆင်းနေချိန်တွင် စပါးစိုက်တောင်သူများ အတွက် သင့်တင့်မျှတသော စပါးစျေးဖြစ်စေရန် ပို့ကုန်တိုးမြှင့်တင်ပို့ရေး၊ ဘင်္ဂလားဒေ့ရှ်နိုင်ငံ၊ တရုတ်နိုင်ငံတို့သို့ အမြန်ဆုံးသွားရောက်ပြီး ဆန်တင်ပို့ရောင်းချမှုများ မြှင့်တင်ဆောင်ရွက်ရေးတို့ကိုလည်း ဆွေးနွေးခဲ့ကြကြောင်း သိရသည်။