ပေါ်ဆန်းမွေးကို ဧရာဝတီတိုင်း၏ Brand တစ်ခုအဖြစ် ဆောင်ရွက်ရမည်ဟု မြန်မာနိုင်ငံတော် ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်မှ ယနေ့ အောက်တိုဘာ ၁၉ ရက်မွန်းလွဲပိုင်းက ဧရာဝတီတိုင်း၊ ပုသိမ်မြို့ရှိ ဌာနဆိုင်ရာတာဝန်ရှိသူများ၊ ရပ်မိရပ်ဖများနှင့်တွေ့ဆုံစဥ် ပြောကြားခဲ့ခြင်းဖြစ်ကြောင်း သိရသည်။
” ဧရာဝတီတိုင်းကထွက်တဲ့ ပေါ်ဆန်းမွေးဟာ အမှန်ကတယ်ကောင်းမွန်တဲ့ အမျိုးအစားဖြစ်တာကြောင့် အဲဒီ ပေါ်ဆန်းမွေးကို တိုင်းဒေသကြီးရဲ့ Brand တစ်ခုအဖြစ် ဆောင်ရွက်ရပါမယ်”ဟု ယာယီသမ္မတက ပြောကြားခဲ့သည်။
ဧရာဝတီတိုင်းအတွင်းစိုက်ပျိုးသည့် စပါးများ၏ Eating Quality များ ကောင်းမွန်ရန်၊ အရေအတွက် ပိုမိုတိုးတက်ထုတ်လုပ်ရန်၊ စိုက်ပျိုးရေးလုပ်ငန်းသည် ဧရာဝတီတိုင်း၏ အဓိကစီးပွားရေးလုပ်ငန်းဖြစ်၍ အောင်မြင်ဖြစ်ထွန်းအောင်ဆောင်ရွက်ရန်၊ အထွက်နှုန်းများကောင်းမွန်အောင်ဆောင်ရွက်ရန်လည်း မှာကြားခဲ့ကြောင်း သိရသည်။
” အထွက်နှုန်းပန်းတိုင်ရည်မှန်းချက်အနေနဲ့ မိုးစပါးတင်း(၁၀၀)၊ နွေစပါးတင်း(၁၁၀)ထားရှိပါတယ်။ ဒါကြောင့် စိုက်ပျိုးဧကတွေမှန်ကန်ဖို့နဲ့ အထွက်နှုန်းတွေတိုးတက်မှုရှိဖို့လိုပါတယ်။ ဧရာဝတီတိုင်းက လယ်စိုက်ပျိုးမြေရဲ့ (၁၀)ရာခိုင်နှုန်းခန့်ဟာ ရေနက်ကွင်းတွေဖြစ်တာကြောင့် အဲဒီ ရေနက်ကွင်းတွေကို မြေပြုပြင်တဲ့ လယ်စပါးစိုက်ပျိုးတာနဲ့ ငါး၊ ပုစွန်မွေးမြူရေးလုပ်ငန်းတွေဆောင်ရွက်ကြရပါမယ်”ဟု ယာယီသမ္မတကက ပြောသည်။
လယ်မြေများအား ဧကကွက်များအဖြစ် ဖော်ထုတ်နိုင်ပါက ပိုမိုအကျိုးဖြစ်ထွန်းစေမည်ဖြစ်ကာ စပါးစိုက်ပျိုးမှုများကို ယခုထက်ပိုမိုတိုးတက်အောင်ကြိုးပမ်းဆောင်ရွက်ရန်၊ စပါးစိုက်ပျိုးမှုများကို ပင်ကြား၊ တန်းကြားမှန်မှန်ကန်ကန်နှင့် ကောက်ကွက်ပြည့်မီအောင်ဆောင်ရွက်ရန်၊ လယ်မြေများအားမြေပြုပြင်စိုက်ပျိုးရန်၊ ပန်းတိုင်ရည်မှန်းချက်ပြည့်မီအောင်ဆောင်ရွက်ရန်တို့ကိုလည်း ယာယီသမ္မတက မှာကြားခဲ့ကြောင်း သိရသည်။