ရန်ကုန်တိုင်းဒေသကြီး ယာဉ်အန္တရာယ်၊ လမ်းအန္တရာယ် ကင်းရှင်းရေးကောင်စီအနေဖြင့် ပါဝါ အိတ်ဇောတပ်ဆင်ထားသည့် အိမ်စီးကား၊ ပြိုင်ကား၊ မော်တော်ဆိုင်ကယ်များကို ဒီဇင်ဘာမှ စတင်၍ ပြင်းထန်စွာအရေးယူအပြစ်ပေးသွားမည်ဟု အသိပေးထားသည်။
အသိပေးချက်တွင် ရန်ကုန်တိုင်းဒေသကြီးအတွင်း အများပြည်သူသွားလာသည့် လမ်းများပေါ်၌ ပါဝါ အိတ်ဇောတပ်ဆင်ထားသည့် အိမ်စီးကား၊ ပြိုင်ကားနှင့် မော်တော်ဆိုင်ကယ်များ မောင်းနှင်သွားလာနေကြောင်း စစ်ဆေးတွေ့ရှိပါက တည်ဆဲဥပဒေအရ အဆိုပါပြစ်မှုကျူးလွန်သူကို တစ်လထက်မပိုသော ထောင်ဒ-ဏ်ဖြစ်စေ၊ ကျပ်တစ်သိန်းထက်မပိုသော ငွေဒ-ဏ်ဖြစ်စေ၊ ဒ-ဏ်နှစ်ရပ်လုံးကိုဖြစ်စေချမှတ်မည်ဟု ဖော်ပြထားသည်။
ထိုနည်းတူ နောက်တစ်ကြိမ်ထပ်မံကျူးလွန်ပါက သုံးလထက်မပိုသည့် ထောင်ဒ-ဏ်ဖြစ်စေ၊ ကျပ်သုံးသိန်းထက်မပိုသည့် ငွေဒ-ဏ်ဖြစ်စေ၊ ဒ-ဏ်နှစ်ရပ်လုံးဖြစ်စေ ပြစ်ဒ-ဏ်ချမှတ်မည်ဟုလည်း ဖော်ပြထားသည်။
ယာဉ်စည်းကမ်း ထိန်းသိမ်းကြီးကြပ်ရေးပူးပေါင်းအဖွဲ့များအနေဖြင့် ၂ဝ၂၅ ခုနှစ်၊ ဇွန်လမှ နိုဝင်ဘာလလယ်အထိ ပါ ဝါ အိပ်ဇောတပ်ဆင်ထားသည့် ပြိုင်ကား(၇) စီး၊ လူစီးယာဉ် (၇၁)စီး၊ မော်တော်ဆိုင်ကယ် (၂)စီး၊ စုစု ပေါင်း(၈ဝ)စီးကို ဖမ်းဆီး၊ ဒ-ဏ်ရိုက်၊ လိုင်စင်ပိတ်သိမ်းပညာပေးခဲ့ပြီးဖြစ်ကြောင်းလည်း သိရသည်။
ထိုနည်းတူ ပါဝါအိတ်ဇောရောင်းချသည့် ဆိုင်များ၊ ပါဝါအိတ်ဇောတပ်ဆင်ပေးသည့် ဝပ်ရှော့များကိုပါ သက်ဆိုင်ရာဌာနများ၏ ဥပဒေအရ ပြင်းထန်စွာ အရေးယူခံရမည်ဖြစ်ကြောင်း ဖော်ပြအသိပေးထားသည်။
ဓာတ်ပုံ- လူမှုကွန်ရက်