၂၀၂၃ ခုနှစ် ဇန်နဝါရီလ ၃၁ ရက်တွင် နိုင်ငံရေးပါတီများပြန်လည်မှတ်ပုံတင်ရန် ဥပဒေအသစ်ပြဋ္ဌာန်းပြီး ရက်ပေါင်း ၃၅ ရက်အတွင်း ပြည်ထောင်စုရွေးကောက်ပွဲကော်မရှင်သို့ နိုင်ငံရေးပါတီတည်ထောင်ခွင့်နှင့် ဆက်လက်တည်ထောင်ခွင့်မှတ်ပုံတင်လျှောက်ထားလာသည့် ပါတီ ၁၇ ပါတီ ရှိပြီဖြစ်ကြောင်း ပြည်ထောင်စုရွေးကောက်ပွဲကော်မရှင်က အသိပေးထုတ်ပြန်ထားသည်။
မတ်လ ၇ ရက်တွင် နိုင်ငံရေးပါတီ တည်ထောင်လိုသည့် ဝံသာနုပါတီသည် ဆက်လက်တည်ထောင်လိုသည့် ကချင်ပြည်နယ် ပြည်သူ့ပါတီ (KSPP) တို့က ပြည်ထောင်စုရွေးကောက်ပွဲကော်မရှင်ကို လာရောက်လျှောက်ထားခဲ့ခြင်းဖြစ်ကြောင်း သိရသည်။
ဖေဖော်ဝါရီလ ၁ ရက်မှ မတ်လ ၇ ရက်အထိ ပါတီအသစ်တည်ထောင်ခွင့်နှင့် မှတ်ပုံတင်ခွင့်လျှောက် ထားသည့် ပါတီ ၆ ပါတီ ရှိပြီး နိုင်ငံရေးပါတီအဖြစ် ဆက်လက်တည်ထောင်ခွင့်နှင့် မှတ်ပုံတင်ခွင့်လျှောက်ထားသည့် ပါတီ ၁၁ ပါတီ ရှိကြောင်း ဖော်ပြထားသည်။
ယင်းအပြင် လျှောက်ထားသည့်ပါတီ ၁၇ ပါတီထဲမှ ပြည်ထောင်စုတစ်ဝန်းလုံး စည်းရုံးမည့် ပါတီ ၅ ပါတီရှိပြီး တိုင်းဒေသကြီး (သို့မဟုတ်) ပြည်နယ် တစ်ခုအတွင်းမှာပင် စည်းရုံးမည့် ပါတီ ၁၂ ပါတီ ဖြစ်ကြောင်း ထုတ်ပြန်ချက်တွင် ဖော်ပြထားသည်။
လက်ရှိတွင် ပြည်ထောင်စုကြံ့ခိုင်ရေးနှင့်ဖွံဖြိုးရေးပါတီ၊ ဖက်ဒရယ်ဒီမိုကရက်တစ်ပါတီ၊ မြန်မာပြည်သူ့ဒီမိုကရက်တစ်ပါတီ (MPD)၊ ပြည်ထောင်စုဒီမိုကရေစီပါတီ (Union Democracy Party)၊ ပအိုဝ်းအမျိုးသားအဖွဲချုပ် (PNO) ၊ ဒီမိုကရက်တစ်အင်အားစုလေဘာပါတီ၊ ဒီမိုကရေစီပါတီသစ်(ကချင်) နှင့် ပြည်သူ့အကျိုးပြုကျောင်းသားများပါတီ၊ အမျိုးသားဒီမိုကရေစီပါတီသစ်၊ ဖလုံ-စဝေါ်ဒီမိုကရက်တစ်ပါတီ၊ ရှမ်းနှင့် တိုင်းရင်းသားများ ဒီမိုကရက်တစ်ပါတီ၊ တိုင်းရင်းသားစည်းလုံးညီညွတ်ရေးပါတီ၊ ရခိုင့်ဦးဆောင်ပါတီ၊ ပြည်သူ့အင်အားပါတီ၊ ဝံသာနုပါတီနှင့် ကချင်ပြည်နယ် ပြည်သူ့ပါတီ (KSPP) တို့ဖြစ်ကြောင်း သိရသည်။
