ဒီကနေ့ အကယ်ဒမီ မနက်ခင်းမှာတော့ နေပြည်တော်က ပိတောက်ပင်တချို့လည်း အဖူးကျန်လို့ ပွင့်ဖို့အားယူနေကြပါတယ်။
ပြီးခဲ့တဲ့ (၄)ရက်နေ့ ညနေစောင်းတုန်းက မိုးဖျောက်ဖျောက်ကြောင့် ပိတောက်တွေက ကြပါတော့မယ်။
ဒီလိုသာ ပိတောက်တွေ ကခဲ့ရင်
ဘယ်သူတွေ ပျော်ကြမလဲ ။ ပျော်ရသူတွေက ဘယ်သူတွေဖြစ်မလဲ ၊ ပိတောက် ချစ်သူတို့ကတော့ မျှော်နေကြပါပြီတဲ့နော် ။
ဟုတ်ပါတယ် ၊ နေပြည်တော်မှာ ပိတောက်က ဖို့ “ပိတောက်ကတဲ့ ဂီတ” ကို ဒီကနေ့ညအတွက်ရင်ခုန်နေကြသူတွေ ရှိပါတယ်။
တခြားတော့ မဟုတ်ပါဘူး ။
Frenzon Production က စီစဉ်ထုတ်လုပ်ကာ ဒါရိုက်တာ မီးပွားက ဖန်တီးပုံဖော် ရိုက်ကူးထုတ်လုပ်ပြီး အဆိုတော်၊ သရုပ်ဆောင် စိုင်းစိုင်းခမ်းလှိုင်၊ အေးမြတ်သူ၊ ပိုးမမှီသာတို့ အဓိက ပါဝင်သရုပ်ဆောင်ထားတဲ့ “ပိတောက်ကတဲ့ ဂီတ” ရုပ်ရှင်ဇာတ်ကားဟာ ၂၀၂၀ ခုနှစ် မြန်မာ့ရုပ်ရှင် ထူးချွန်ဆု ဆန်ကာတင်စာရင်းမှာ ပါဝင်ပြီး ပျိုမေတို့ အသည်းကျော် စိုင်းစိုင်းတစ်ယောက် အကယ်ဒမီ ရွှေစင်ရုပ်ထုကြီး လက်ဝယ်ပိုင်ပိုင် အရယူနိုင်တော့မယ်လို့ သတင်းစကားတွေ ကြားနေရတာပဲ ဖြစ်ပါတယ်။
ဒီ “ပိတောက်ကတဲ့ ဂီတ” ရုပ်ရှင်ဇာတ်ကားဟာ သင်္ကြန်နောက်ခံ အချစ်ဇာတ်လမ်းဖြစ်ပြီး ဂီတနဲ့ သုံးပွင့်ဆိုင်အချစ်တွေအကြားက ဖြစ်လေ့ဖြစ်ထ သဘောသဘာဝတွေကို ပီပီပြင်ပြင် ရိုက်ကူးပုံဖော်ပြထားတာ ဖြစ်သလို ပရဟိတမင်းသားကြီး အကယ်ဒမီကျော်သူ၊ အကယ်ဒမီဇဝင်ဝိုင်း၊ အကယ်ဒမီချိုပြုံး၊ အကယ်ဒမီစိုးမြတ်သူဇာ ၊ အကယ်ဒမီ မေသဉ္ဇာဦးနဲ့ ဝါရင့်အနုပညာရှင်တွေကလည်း ပါဝင်အားဖြည့်ထားတဲ့အတွက် ရုံတင်စဉ်မှာ စံချိန်တင် အားပေးခံခဲ့ရတဲ့ ဇာတ်ကားကောင်း တစ်ကားပဲ ဖြစ်ပါတယ်။
အခုဆိုရင်တော့ “ပိတောက်ကတဲ့ ဂီတ” နဲ့ အကယ်ဒမီ တစ်ပြေးနေတဲ့ စိုင်းစိုင်းခမ်းလှိုင်ဟာလည်း အကယ်ဒမီပွဲတက်ဖို့ နေပြည်တော်မှာရောက်ရှိနေပြီဖြစ်ပါတယ်။
အဲ့ကားမှာပါဝင်တဲ့ သရုပ်ဆောင် ပိုးမမှီသာလည်း စိုင်းစိုင်း တည်းတဲ့ နေပြည်တော်ကဟော်တယ်မှာပဲ မိသားစုနဲ့ ရောက်ရှိတည်းခိုနေပါတယ်။
