နန်စီပေလိုစီ ထိုင်ဝမ်သွားပါက ပြင်းထန်စွာ အရေးယူမည်ဟု တရုတ် သတိပေး

နန်စီပေလိုစီ ထိုင်ဝမ်သွားပါက ပြင်းထန်စွာ အရေးယူမည်ဟု တရုတ် သတိပေး

ပေကျင်း၊ ဇူလိုင် ၁၉ ရက်

အမေရိကန် အောက်လွှတ်တော်ဥက္ကဋ္ဌ နန်စီပေလိုစီ သည်ထိုင်ဝမ်သို့ သွားရောက်လည်ပတ်ပါက ပြင်းထန်သော အရေးယူမှုများ ပြုလုပ်မည်ဖြစ်ကြောင်း တရုတ်အစိုးရက ဇူလိုင်လ ၁၉ ရက် အင်္ဂါနေ့ တွင် သတိပေးခဲ့သည်။

အဆိုပါ သတိပေးချက်သည် Financial Times သတင်းဌာနက နန်စီပေလိုစီသည် နောက်လတွင် ထိုင်ဝမ်သို့ သွားရောက်မည်ဟု ကြေငြာပြီးနောက်ပိုင်း ထွက်ပေါ်လာခဲ့သည်။

နန်စီပေလိုစီနှင့် ၎င်း၏ကိုယ်စားလှယ်အဖွဲ့သည် အင်ဒိုနီးရှား၊ ဂျပန်၊ မလေးရှားနှင့် စင်္ကာပူ နိုင်ငံများသို့လည်း သွားရောက်မည်ဖြစ်ပြီး အမေရိကန် အင်ဒို-ပစိဖိတ်ဒေသ ကွပ်ကဲမှုဌာနချုပ်ရှိရာ ဟာဝိုင်ယီတွင်လည်း အနားယူသွားမည်ဖြစ်ကြောင်း အဆိုပါ ကြေငြာချက်တွင် ထည့်သွင်းဖော်ပြထားသည်။

နန်စီပေလိုစီ၏ ရုံးနှင့် အမေရိကန် နိုင်ငံခြားရေးဌာနသည် ရိုက်တာသတင်းဌာန၏ မှတ်ချက်ပေးရန် တောင်းဆိုချက်များကို ချက်ချင်း တုံ့ပြန်ခြင်းမရှိခဲ့ပေ။ ထိုင်ဝမ် နိုင်ငံခြားရေး ဝန်ကြီးဌာနကလည်း ၎င်းခရီးစဉ်နှင့် ပတ်သက်၍ သက်ဆိုင်ရာမှ ပေးပို့သည့် သတင်းအချက်အလက်များ မရရှိသေးကြောင်း ပြောကြားခဲ့သည်။

နန်စီပေလိုစီ၏ ထိုင်ဝမ်ခရီးစဉ်သည် ကိုဗစ်-၁၉ ကပ်ရောဂါကူးစက်ခံရကြောင်း စစ်ဆေးတွေ့ရှိခဲ့သည့် ဧပြီလမှစ၍ နောက်သို့ရွှေ့ဆိုင်းထားခဲ့ခြင်းဖြစ်သည်။

တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ကျောင်းလီကျန်းက နန်စီပေလိုစီ၏ ခရီးစဉ်တိုင်းသည် တရုတ်နိုင်ငံ၏ အချုပ်အခြာအာဏာနှင့် နယ်မြေစိုးမိုးရေးကို ဆိုးရွားစွာ ထိခိုက်စေလိမ့်မည်ဟု ပေကျင်းတွင် ပြောကြားခဲ့သည်။

အမေရိကန်ဘက်မှ ယင်းခရီးစဉ်ကို ဆက်လက်ပြုလုပ်သွားပါက တရုတ်နိုင်ငံဘက်မှ ပြတ်ပြတ်သားသားနှင့် ပြင်းပြင်းထန်ထန် အရေးယူသွားမည်ဖြစ်ပြီး ထိုအရေးယူမှု၏ အကျိုးဆက်တိုင်းအတွက် အမေရိကသည် အပြည့်အဝ တာဝန်ယူသွားရမည်ဖြစ်ကြောင်း ၎င်းက ပြောကြားခဲ့သည်။

နန်စီပေလိုစီသည် တရုတ်နိုင်ငံနှင့် စပ်လျဉ်း၍ အချိန်အတန်ကြာ ဝေဖန်ခဲ့သူဖြစ်ပြီး ပေကျင်း၌ ပြုလုပ်ခဲ့သည့် ၂၀၂၂ ခုနှစ် ဆောင်းရာသီ အိုလံပစ်ပြိုင်ပွဲကိုလည်း သံတမန်ရေးအရ ဆန္ဒပြရန် လွှတ်တော်၌ တင်သွင်းခဲ့ဖူးသည်။

Source: CNA