ဧရာဝတီတိုင်းဒေသကြီး၊ ကျောင်းကုန်းမြို့နယ်ရှိ GBS လယ်ယာဝန်ဆောင်မှုစခန်း၌ ဒေသတွင်းလယ်ယာကဏ္ဍ ဖွံ့ဖြိုးတိုးတက်ရေးအတွက် ရည်ရွယ်သည့် လယ်ယာထုတ်ကုန်နှင့် နည်းပညာပြပွဲကို ယနေ့ ဇူလိုင် ၅ ရက်က ကျင်းပခဲ့ကြောင်း သိရသည်။
အခမ်းအနားတွင် ဧရာဝတီတိုင်းဒေသကြီးဝန်ကြီးချုပ် ဦးအေးကျော်က ထုတ်ကုန်နှင့် နည်းပညာပြပွဲများမှတစ်ဆင့် တောင်သူများအနေဖြင့် ခေတ်မီလယ်ယာနည်းပညာများနှင့် ထုတ်လုပ်မှုစွမ်းအားမြင့် စက်ကိရိယာများကို ပိုမိုသိရှိအသုံးချနိုင်မည်ဖြစ်ပြီး ဒေသတွင်းလယ်ယာကဏ္ဍ ဖွံ့ဖြိုးတိုးတက်ရေးအတွက် အထောက်အကူဖြစ်စေမည်ဟု ပြောကြားခဲ့သည်။
ပြပွဲနှင့်အတူ Rice Export Zoneစီမံချက်အရ မိုးစပါးစိုက်ပျိုးမည့် တောင်သူများအတွက် စိုက်ပျိုးစရိတ်ချေးငွေနှင့် လယ်ယာသွင်းအားစုများကို ကျောင်းကုန်း၊ ညောင်တုန်းနှင့် ပန်းတနော်မြို့နယ်များမှ တောင်သူများထံ ဧရာဝတီတိုင်းဒေသကြီးဝန်ကြီးချုပ်နှင့် တာဝန်ရှိသူများက ထောက်ပံ့ပေးအပ်ခဲ့ကြောင်း သိရသည်။
ထို့နောက် တိုင်းဒေသကြီးဝန်ကြီးချုပ်နှင့် တာဝန်ရှိသူများသည် ပြပွဲအတွင်း ခင်းကျင်းပြသထားသည့် ပဲအမျိုးမျိုး၊ ဆန်၊ နေကြာဆီ၊ နှမ်းဆီ၊ မြေပဲဆီ၊ လယ်ယာသွင်းအားစုများ၊ ဆန်စက်ပစ္စည်းများနှင့် လယ်ယာသုံးစက်ကိရိယာများကို လှည့်လည်ကြည့်ရှုခဲ့ကြောင်း သိရသည်။