ရန်ကုန်၊ စက်တင်ဘာ ၁၉
ထောပတ်သီး ရာသီပေါ်ချိန်ရောက်ရှိလာပြီး ပြည်တွင်းဈေးကွက်သို့ ထောပတ်သီးများ လှိုင်လှိုင်ဝင်ရောက်လာသဖြင့် ဈေးနှုန်းများ သက်သာလျက်ရှိကာ စားသုံးသူများအနေဖြင့် သင့်တင့်သည့်ဈေးနှုန်းဖြင့် ဝယ်ယူစားသုံးနိုင်ကြောင်း ထောပတ်သီးရောင်းဝယ်ရေးလုပ်ငန်းရှင်များထံမှ သိရသည်။
လက်ရှိ ပြည်တွင်းထောပတ်သီး လက္ကားဈေးကွက်တွင် ပြည်ပတင်ပို့ရန် အဓိကထားစိုက်ပျိုးသည့် Hass အမျိုးအစား ထောပတ်သီး အကြီး၊ အလတ်အရော တစ်ကီလိုလျှင် ကျပ် ၁,၉၀၀ ခန့် ဈေးပေါက်နေပြီး အနည်းဆုံး ၃၅ ကီလိုမှ စတင်ဝယ်ယူနိုင်ကြောင်း သိရသည်။
Hass ထောပတ်သီး အကြီးသီးသန့်မှာ တစ်ကီလိုလျှင် ကျပ် ၂,၅၀၀ မှ ၃,၀၀၀ ခန့်အထိ ဈေးရှိပြီး အနည်းဆုံး ငါးကီလိုမှ စတင်ဝယ်ယူရကြောင်း သိရသည်။
“အခုက ထောပတ်သီးခူးဆွတ်တဲ့ရာသီနဲ့ တိုက်ဆိုင်နေတာကြောင့် ပွဲရုံတွေကို ထောပတ်သီးတွေ လှိုင်လှိုင်ဝင်နေပါတယ်။ ထောပတ်သီးက လတ်ဆတ်ချိန်မှာ ရောင်းချနိုင်မှ အဆင်ပြေတာကြောင့် ရောင်းချသူတွေဘက်ကလည်း သက်သာတဲ့ဈေးနဲ့ ရောင်းပေးနေကြပါတယ်” ဟု ထောပတ်သီးရောင်းချသူတစ်ဦးက ပြောသည်။
ယခုနှစ်တွင် ပြည်တွင်းထောပတ်သီးစားသုံးမှုပမာဏမှာ တန်ချိန် ၅,၀၀၀ ဝန်းကျင်ရှိပြီး ပြည်ပသို့ တင်ပို့နိုင်ခြင်းမရှိသေးသဖြင့် ပိုလျှံထောပတ်သီး တန်ချိန် ၁၅,၀၀၀ ဝန်းကျင်ရှိနေကြောင်းလည်း သိရသည်။