ထိုင်းနိုင်ငံရောက် မြန်မာလုပ်သားများ နိုင်ငံအတွင်းသို့ ငွေလွှဲရာတွင် ၀န်ဆောင်ခသက်သာစွာဖြင့် တရား၀င်လွှဲပြောင်းနိုင်မည့် DeeMoney Application မိတ်ဆက်ပွဲကို ဇူလိုင်လ ၁၉ရက် (ယမန်နေ့)က ထိုင်းနိုင်ငံရှိ Solitaire Bangkok Hotel တွင် ကျင်းပခဲ့သည်။
အခမ်းအနားသို့ DeeMoney Application မှ တာ၀န်ရှိသူများ၊ မြန်မာသံရုံးမှတာ၀န်ရှိသူများ၊ မြန်မာအလုပ်သမားသံအရာရှိနှင့် ဖိတ်ကြားထားသည့် ထိုင်း၊ မြန်မာမီဒီယာများ တက်ရောက်ခဲ့ကြသည်။
“အလုပ်သမားတွေက မြန်မာပြည်ကို ငွေလွှဲရင်အိမ်တိုင်ရာရောက် (တရားမ၀င်)ငွေလွှဲတဲ့စနစ် သုံးတဲ့အခါ စာရွက်စာတမ်းမလိုအပ်တော့ လွယ်ကူအဆင်ပြေပေမဲ့ လုံခြုံမှုမရှိဘူး။ အဲဒီတော့ သူတိုရဲ့ ကိုယ်ပိုင်ငွေကြေးစနစ် မပြနိုင်တော့ နောက်ပိုင်း ရင်းနှီးမြှုပ်နှံတာမျိုး၊ ငွေချေးတာမျိုးဆို ယုံကြည်မှုလျော့နိုင်တယ်။ DeeMoney ကဆိုရင် အထောက်အထားကျန်တော့ နောင်မှာချေးငွေအတွက် ပြနိုင်မယ်။ ဟွန်ဒီ (တရားမ၀င်ငွေလွှဲ)က လွယ်ကူပေမဲ့ ဒေတာမကျန်ဘူး။ DeeMoney ကို သုံးရင်တော့ ငွေလွှဲချိန်မှာလည်း ဒေတာကျန်နေမယ်။ ဘယ်ဟာနဲ့လွှဲရင် အကျိုးပိုရှိနိုင်တယ်ဆိုတာ နောင်သိလာနိုင်ပါတယ်” ဟု Co-founder and CEO of Deemoney ၏ Khun Aswin Phalaphongphanich က ပြောကြားသည်။
ယင်း Application သည် ထိုင်းနိုင်ငံရောက်မြန်မာလုပ်သားများအနေဖြင့် မြန်မာနိုင်ငံသို့ တရား၀င်ငွေလွှဲနိုင်မည့် ထိုင်းနိုင်ငံ၏ ပထမဆုံး နိုင်ငံဖြတ်ကျော် Mobile Application ဖြစ်ကြောင်း၊ ငွေလွှဲပြောင်းမှုကို ထိုင်းနှင့်မြန်မာ နှစ်နိုင်ငံ ဗဟိုဘဏ်များထံမှ ၂၀၂၃ ခုနှစ်အတွင်း တရား၀င်ရရှိခဲ့ကြောင်းနှင့် လက်ရှိတွင် ထိုင်းနိုင်ငံမှ နိုင်ငံပေါင်း ၄၃ နိုင်ငံသို့ ငွေလွှဲပြောင်းခြင်းဝန်ဆောင်မှုပေးနေကြောင်း သိရသည်။
“Deemoney ကို သုံးချင်ရင် ထိုင်းဘက်မှာရော မြန်မာဘက်ပါမှာ ဘဏ်အကောင့်ဖွင့်ထားရမယ်။ သူက ၂၄နာရီ ၇ ရက်လုံး အလုပ်လုပ်နေပြီး ပိုက်ဆံကို ဒီနေ့လွှဲရင် မနက်ဖြန်ရောက်မယ်။ ဒီထဲမှာ ကျောင်းသားတို့လို အထူး Customer တို့အတွက် ပရိုမိုးရှင်းကုဒ်ပါတယ်။ တကယ်လို့ ကိုယ်က ဒီကုဒ်ကိုမသုံးဖြစ်ရင် တခြားသူကိုပေးသုံးလို့ရတယ်။ ကန့်သတ်ထားတာမျိုးမရှိဘူး” ဟု မစ္စတာ Aswin ကဆိုသည်။
တစ်ကြိမ်ငွေလွှဲလျှင် အများဆုံး မြန်မာကျပ်ငွေသိန်း (၁၀၀) နှင့်ညီမျှသည့် ထိုင်းဘတ်ငွေ လွှဲပြောင်းနိုင်ကြောင်း၊ အခြားနိုင်ငံများထက် မြန်မာနိုင်ငံသို့ လွှဲမည်ဆိုပါက ပမာဏမည်မျှလွှဲသည်ဖြစ်စေ ၀န်ဆောင်ခမှာ ၄၉ ဘတ်သာကျသင့်မည်ဖြစ်ပြီး ငွေလွှဲပြောင်းစဉ် အမှားအယွင်းတစ်စုံတစ်ရာဖြစ်၍ ထုတ်ယူသူထံမရောက်ရှိခဲ့ပါက လိုအပ်သည်များ စိစစ်ကာ တစ်ပတ်အတွင်း လွှဲပြောင်းသူထံ လွှဲပြောင်းခဲ့သည့် စျေးနှုန်းအတိုင်း ပြန်လည်ပေးအပ်သွားမည် ဖြစ်ကြောင်း သိရသည်။
