ထိုင်းနိုင်ငံသို့ ပြောင်းတင်ပို့ရန် တစ်လသာကျန်ရှိတော့သည့် အချိန်တွင် ပြည်တွင်းပြောင်းတင်ပို့မှု စျေးကောင်းရနေကြောင်း ပြောင်းကုန်သည်များထံမှ သိရသည်။
ထိုင်းနိုင်ငံသို့ အခွန်ကင်းလွတ်ခွင့်ဖြင့် ပြောင်းတင်ပို့မှုမှာ ဇွန်လကုန်တွင် ပြီးဆုံးမည်ဖြစ်သဖြင့် လက်ရှိကာလတွင် ပြောင်းတင်သင်္ဘောများဖြင့် အလုအယက် တင်ပို့နေကြကြောင်း သိရသည်။
လက်ရှိတွင် သီလဝါဆိပ်ကမ်း၌ ပြောင်းတစ်ပိဿာလျှင် ကျပ် ၁၉၅၀ ခန့်ပေါက်ဈေးရှိနေပြီး ရန်ကုန်မြို့တွင်း ဆိပ်ကမ်းများတွင် တစ်ပိဿာလျှင် ကျပ် ၁၉၂၀ မှ ၁၉၃၀ အထိ ပေါက်ဈေးရှိနေကြောင်း သိရသည်။
“ရန်ကုန်ဈေးကွက်မှာတော့ ဈေးကောင်းနေပေမယ့် နယ်ဈေးကွက်တွေမှာတော့ ပုံမှန်ဈေးတန်းပဲရှိပါတယ်” ဟု ပြောင်းကုန်သည်တစ်ဦးကပြောသည်။
ထိုင်းနိုင်ငံသို့ အခွန်ကင်းလွတ်ခွင့်ဖြင့် ပြောင်းတင်ပို့မှုကို ယခင်က ပင်လယ်ရေကြောင်းမှသာ အဓိကတင်ပို့နေခဲ့သော်လည်း မေလကုန်ပိုင်းမှစတင်ကာ နယ်စပ်ကုန်သွယ်ရေးလမ်းကြောင်းဖြစ်သည့် တာချီလိတ်မှလည်း အနည်းငယ် ပြန်လည်တင်ပို့လာကြောင်း သိရသည်။
ထိုင်းနိုင်ငံတွင် ပြောင်းလိုအပ်ချက် မြင့်တက်နေပြီး မြန်မာပြောင်းဝယ်ယူမှု တိုးလာနိုင်သဖြင့် ပြောင်းတင်ပို့မှုကာလပြီးဆုံးသည့်နောက်ပိုင်းတွင်လည်း နယ်စပ်မှတစ်ဆင့် ဆက်လက်တင်ပို့နိုင်ခြေရှိကြောင်း ပြောင်းကုန်သည်များက သုံးသပ်ထားသည်။
မေ ၃၀ ရက်တွင် FOB ပြောင်းတစ်တန်လျှင် အမေရိကန်ဒေါ်လာ ၂၇၀ ကျော်မှ ၂၈၅ ဒေါ်လာကျော်အထိ ပေါက်ဈေးရှိလာပြီး ရန်ကုန်ဆိပ်ကမ်းဈေးတွင် ပြောင်းတစ်ပိဿာလျှင် ကျပ် ၁၉၂၀ မှ ၁၉၅၀ အထိ ဈေးမြင့်တက်လာကြောင်း သိရသည်။
မန္တလေးပြောင်းဈေးကွက်တွင်လည်း ပြောင်း (ရှမ်း) ၅၄ ပိဿာ တစ်အိတ်လျှင် ကျပ် ၈၄,၀၀၀ မှ ၈၅,၀၀၀ အထိရှိနေပြီး ပြောင်း (စီပီ) တစ်အိတ်လျှင် ကျပ် ၈၆,၀၀၀ မှ ၈၇,၀၀၀ အထိ ပေါက်ဈေးရှိနေကြောင်း သိရသည်။