ထိုင်းနိုင်ငံ ဘန်ကောက်မြို့ ခေါင်ဆန်လမ်းနှင့် အနီးတဝိုက်မှ ရမ်ဘဘွတ်ထရီလမ်းများပေါ်တွင် လမ်းဘေးအစားအစာများကို တရားမဝင်ရောင်းချနေသည့် မြန်မာနိုင်ငံသား ခုနစ်ဦးနှင့် တူကီယေးနိုင်ငံသား တစ်ဦးတို့ကို ဖမ်းဆီးခဲ့ကြောင်း သိရသည်။
အဆိုပါ စီမံချက်ကို လူဝင်မှုကြီးကြပ်ရေးဌာနခွဲ(၁) နှင့် ချာနာဆွန်ကရမ်ရဲစခန်းတို့က ပူးတွဲဆောင်ရွက်ခဲ့ခြင်းဖြစ်သည်။
အဆိုပါ စီမံချက်သည် ဘန်ကောက်၏ အဓိကခရီးသွားခရိုင်များတွင် တရားမဝင် အလုပ်လုပ်ကိုင်နေသည့် နိုင်ငံခြားသားများကို နှိမ်နင်းမှု၏ တစ်စိတ်တစ်ပိုင်းဖြစ်သည်။ လူဝင်မှု ကြီးကြပ်ရေးနှင့် အလုပ်သမားဥပဒေများကို ချိုးဖောက်သည်ဟု သံသယရှိသော စီးပွားရေးလုပ်ငန်းများနှင့် ဈေးရောင်းသူများ အထူးသဖြင့် လူကု-န်ကူးမှုများနှင့် ပြည်ပအလုပ်သမားများကို ခေါင်းပုံဖြ-တ်သည့် လုပ်ရပ်များအပေါ် တာဝန်ရှိသူများက အဓိကအာရုံစိုက်သည်ဟု ဆိုသည်။
တာဝန်ရှိသူများသည် နံပြား၊ အသားကင်၊ ရေခဲမုန့်၊ သစ်သီးဖျော်ရည်နှင့် အလားတူ အစားအသောက်များရောင်းချသည့် ဆိုင်များနှင့် လမ်းပေါ် သို့မဟုတ် ဆိုင်မျက်နှာစာများတွင် အစားအစာများ ရောင်းချနေသည့် နိုင်ငံခြားသားများကို တွေ့ရှိခဲ့ကြသည်။
ဖမ်းဆီးရမိသူများတွင် မြန်မာနိုင်ငံသား ခုနစ်ဦးပါဝင်ပြီး ၎င်းတို့ထဲမှ လေးဦးသည် နိုင်ငံကူးလက်မှတ်မရှိသောကြောင့် တရားမဝင် ရွှေ့ပြောင်းနေထိုင်သူများဟု တာဝန်ရှိသူများက ယူဆထားသည်။ ၎င်းတို့ကို နိုင်ငံအတွင်း တရားမဝင် ဝင်ရောက်မှု၊ ခွင့်ပြုချက်မရှိဘဲ အလုပ်လုပ်ကိုင်မှုတို့ဖြင့် တရားစွဲဆိုခဲ့သည်။
အခြားသူများသည် အစိုးရအဖွဲ့၏ ဆုံးဖြတ်ချက်အရ နိုင်ငံတွင်နေထိုင်ရန် အထူးခွင့်ပြုချက်ရရှိထားသူများဖြစ်သည်။ သို့သော်လည်း ၎င်းတို့သည် ၎င်းတို့၏ အလုပ်ပါမစ်နှင့် ညီမျှသော သက်တမ်းတိုးရန် ပျက်ကွက်ခဲ့သောကြောင့် သက်တမ်းလွန်နေထိုင်မှုဖြင့် တရားစွဲဆိုခံရသည်။
မစ္စတာ မိုဟာမက်ဟုသာ အမည်ပေးထားသော တူကီယေးနိုင်ငံသားသည် နာမည်ကျော် တူကီယေးရေခဲ့မုန့် ကို ရောင်းချနေသူဖြစ်ပြီး ခရီးသွားဗီဇာကိုင်ဆောင်ထားသူဖြစ်သည်။ ၎င်းကိုလည်း တရားမဝင် အလုပ်လုပ်ကိုင်မှုဖြင့် တရားစွဲဆိုခဲ့သည်။
၎င်းတို့ ရှစ်ဦးစလုံးကို ထိန်းသိမ်းထားပြီးနောက် ဥပဒေအရ အရေးယူဆောင်ရွက်ရန် သက်ဆိုင်ရာ အာဏာပိုင်များထံ လွှဲပြောင်းပေးခဲ့သည်ဟု သိရသည်။
Ref: ဘန်ကောက်ပို့စ်