ထိုင်းတောင်ပိုင်း လုံခြုံရေးအခြေအနေ ဆွေးနွေးရန် ထိုင်းဝန်ကြီးချုပ် မလေးရှားသို့ သွားရောက်မည်

ထိုင်းနိုင်ငံ တောင်ပိုင်းနယ်စပ်ဒေသများတွင် မကြာသေးမီက အကြမ်းဖက်ဖြစ်စဉ်များ မြင့်တက်လာမှုနှင့် နယ်စပ်ဖြတ်ကျော် လုံခြုံရေးဆိုင်ရာ ပူးပေါင်းဆောင်ရွက်မှုများ တိုးမြှင့်နိုင်ရေးအတွက် ထိုင်းဝန်ကြီးချုပ် အနူတင် ချန်ဗီရာကူလ်သည် ဇူလိုင် ၉ ရက်မှ ၁၀ ရက်အထိ မလေးရှားနိုင်ငံသို့ သွားရောက်မည်ဖြစ်ကြောင်း သိရသည်။

ခရီးစဉ်အတွင်း ထိုင်းဝန်ကြီးချုပ်သည် မလေးရှားဝန်ကြီးချုပ် အန်ဝါ အီဘရာဟင်မ်နှင့် တွေ့ဆုံကာ ထိုင်းနိုင်ငံတောင်ပိုင်း သူပုန်ထမှုအခြေအနေ၊ နယ်စပ်ဖြတ်ကျော် စစ်သွေးကြွလှုပ်ရှားမှုများ ထိန်းချုပ်ရေးနှင့် နှစ်နိုင်ငံ လုံခြုံရေးပူးပေါင်းဆောင်ရွက်မှု တိုးမြှင့်ရေးကိစ္စရပ်များကို ဆွေးနွေးမည်ဖြစ်ကြောင်း ထိုင်းနိုင်ငံတော်လုံခြုံရေးကောင်စီ (NSC) အတွင်းရေးမှူးချုပ် ချတ်ချိုင်း ဘန်ချွက်က ပြောကြားသည်။

မလေးရှားနိုင်ငံက တရားမဝင်နယ်စပ်လမ်းကြောင်းများမှ ထိုင်းနိုင်ငံအတွင်း ဝင်ရောက်လာသူများကို နှိမ်နင်းဆောင်ရွက်နေမှုသည် ထိုင်းတောင်ပိုင်း လုံခြုံရေးအခြေအနေအပေါ် ပိုမိုအလေးထားလာသည့် အပြုသဘောဆောင်သည့် လက္ခဏာတစ်ရပ်ဖြစ်ကြောင်းလည်း ၎င်းက ပြောကြားခဲ့သည်။

ထိုင်းအာဏာပိုင်များ၏ အဆိုအရ စစ်သွေးကြွအဖွဲ့ဝင်အချို့သည် ထိုင်း-မလေးရှား နယ်စပ်ဒေသကို ယာယီခိုလှုံရာအဖြစ် အသုံးပြုလေ့ရှိပြီး အချို့မှာ နှစ်နိုင်ငံသားခံယူထားခြင်း သို့မဟုတ် မလေးရှားနိုင်ငံတွင် ဆွေမျိုးသားချင်းများရှိနေခြင်းကြောင့် နယ်စပ်ဖြတ်ကျော် သွားလာရန် လွယ်ကူကြောင်း သိရသည်။

ထို့ပြင် မလေးရှားနိုင်ငံ၏ ကြားဝင်စီစဉ်ပေးမှုဖြင့် ကျင်းပလျက်ရှိသော ထိုင်းအစိုးရနှင့် ငြိမ်းချမ်းရေးဆွေးနွေးပွဲများတွင် ပါဝင်သည့် အဓိကသူပုန်အဖွဲ့ဖြစ်သော BRN (Barisan Revolusi Nasional) အဖွဲ့၏ ခေါင်းဆောင်ပိုင်းအဖွဲ့ဝင်အချို့သည် မလေးရှားနိုင်ငံတွင် နေထိုင်နေကြသည်ဟု ယုံကြည်ရကြောင်း သိရသည်။

ယခုခရီးစဉ်သည် ထိုင်းနိုင်ငံတောင်ပိုင်း နယ်စပ်ပြည်နယ်များတွင် အစိုးရအရာရှိများနှင့် အများပြည်သူဆိုင်ရာ အခြေခံအဆောက်အအုံများကို ပစ်မှတ်ထားသည့် ဗုံးခွဲတိုက်ခိုက်မှုများနှင့် ပစ်ခတ်မှုများ မြင့်တက်လာနေသည့် အခြေအနေအတွင်း ထွက်ပေါ်လာခြင်းဖြစ်ကြောင်း သိရသည်။

Ref: Thai PBS World