ထရမ့်ပ်ကို သတ်ရန် မည်သည့်အခါကမျှ မကြံစည်ခဲ့– အီရန်သမ္မတ

အီရန်သည် အမေရိကန်ရွေးကောက်ခံသမ္မတ ဒေါ်နယ်ခရမ့်ပ်ကို သတ်ဖြတ်ရန် မည်သည့်အခါကမျှ ကြံစည်ခဲ့ခြင်းမရှိဟု အီရန်သမ္မတ မာဆွတ် ပီဇက်ရှ်ကီယန်က အင်န်ဘီစီသတင်းဌာနနှင့် ဇန်နဝါရီ ၁၄ ရက်က အင်တာဗျူးတွင် ပြောဆိုလိုက်ပြီး ထရမ့်ပ်နှင့် အမေရိကန်အစိုးရ၏ အခိုင်အမာစွပ်စွဲခဲ့မှုများကို ငြင်းဆိုသွားခဲ့သည်။

ထရမ့်ပ်ကို လုပ်ကြံသတ်ဖြတ်ရန် အီရန်တော်လှန်ရေးတော်လှန်ရေးအစောင့်တပ်က ညွှန်ကြားခိုင်းစေခဲ့သည့် အစီအစဉ်တစ်ခုနှင့် ဆက်နွယ်သည်ဆိုကာ ၂၀၂၄ ခုနှစ် နိုဝင်ဘာလတွင် အမေရိကန်တရားရေးဌာနက အီရန်အမျိုးသားတစ်ဦးကို စွဲချက်တင်ခဲ့သည်။ တိုက်ခိုက်မှုများ အကောင်အထည်မဖော်သေးမီတွင် တရားဥပဒေစိုးမိုးရေးအဖွဲ့များက အဆိုပါအကြံအစည်ကို ဟန့်တားနိုင်ခဲ့သည်ဟု ဆိုသည်။

သူ့ကို သတ်ဖြတ်ရန် ကြိုးပမ်းမှုများ၏နောက်ကွယ်တွင် အီရန်ပါဝင်နိုင်သည်ဟု ပြီးခဲ့သည့်နှစ် အမေရိကန်ရွေးကောက်ပွဲ မဲဆွယ်စည်းရုံးမှုအတွင်း၌ ထရမ့်ပ်ကိုယ်တိုင်ကလည်း ပြောဆိုထားသည်။

“ဘာမှမရှိပါဘူး၊ ဒါကို ကျွန်တော်တို့ ဘယ်တုန်းကမျှ မကြိုးစားခဲ့သလို လုပ်ချင်တဲ့ စိတ်လည်း လုံး၀ မရှိပါဘူး” ဟု မစ္စတာ ပီဇက်ရှ်ကီယန်က အင်န်ဘီစီကို ပြောဆိုခဲ့သည်။

၂၀၂၄ ခုနှစ် အမေရိကန်ရွေးကောက်ပွဲတွင် အနိုင်ရခဲ့ပြီး ဇန်နဝါရီ ၂၀ ရက်တွင် ရာထူးတာဝန်ယူမည့် ထရမ့်ပ်သည် မဲဆွယ်စည်းရုံးရေးကာလအတွင်း လုပ်ကြံသတ်ဖြတ်ရန် ကြိုးပမ်းမှု နှစ်ကြိမ်ကြုံခဲ့ကာ အသက်ရှင်လွတ်မြောက်ခဲ့သည်။ ပထမတစ်ကြိမ်သည် ၂၀၂၄ ခုနှစ် စက်တင်ဘာလက ဖလော်ရီဒါတွင် သူ ဂေါက်ကစားနေစဉ် ကြုံခဲ့ရခြင်းဖြစ်ပြီး နောက်တစ်ကြိမ်သည် ၂၀၂၄ ခုနှစ် ဇူလိုင်လအတွင်းက ပင်ဆယ်ဗေးနီးယား မဲဆွယ်စည်းရုံးပွဲတစ်ခုတွင် ကြုံတွေ့ခဲ့သည်။ ယင်း လုပ်ကြံရန် ကြိုးပမ်းမှုများတွင် အီရန် ပတ်သက်ဆက်နွယ်သည့် အထောက်အထား မတွေ့ရဟု စုံစမ်းစစ်ဆေးသူများက ပြောဆိုထားသည်။

Ref: သည်စထရိတ်တိုင်းမ်စ်