တောင်ပြုံးပွဲတော်၏ အကြိုပွဲတော်ဖြစ်သည့်မန္တလေးမြို့၏ ယဉ်ကျေးမှုရိုးရာဓလေ့ကို ဖော်ထုတ်ပြသသော အိုးပုတ်ပွဲတော်ကို လာမည့် သြဂုတ် (၂၃)ရက်နှင့် (၂၄) ရက်တွင် နှစ်ရက်ကြာကျင်းပသွားမည်ဖြစ်ကြောင်း ဒေသခံများ၏ ပြောပြချက်အရ သိရသည်။
“ဒီပွဲတော်ကို ဘယ်အချိန်ကတည်းက စတင်ကျင်းပလာခဲ့တယ်ဆိုတာကတော့ အတိအကျတော့မသိဘူး။ ဒါပေမဲ့ တောင်ပြုံးပွဲတော်မစခင် အကြိုပွဲတော်လို့ ပြောလို့ရပါတယ်။ အရင်က ဒီနေရာမှာ လှေဆိပ်၊ လှည်းဆိပ်ဖြစ်ခဲ့တာဆိုတော့ တောင်ပြုံးပွဲတော် အသွားမှာ ဈေးသည်တွေက ဒီနေရာမှာခဏနားပြီးရောင်းချရင်းနဲ့ မိရိုးဖလာပွဲတော် တစ်ခုဖြစ်လာတာပေါ့။ ဒါကို လက်ဆင့်ကမ်း ထိန်းသိမ်းပြီး နှစ်တိုင်းကျင်းပလာခဲ့တာပါ”ဟု မန္တလေးမှ ဒေသခံတစ်ဦးဖြစ်သူ ကိုဝင်းမင်းထွန်းက ပေါ်ပြူလာနယူးစ်သို့ပြောသည်။
အဆိုပါ ပွဲတော်တွင် မြေထည်ပစ္စည်းများဖြစ်သည့် အိုးပုတ်၊ ချိုးရုပ်၊ တိရစ္ဆာန်ရုပ်၊ ဆီမီးခွက်များနှင့် မြေအိုး၊ စဉ့်ထည်၊ ပန်းအိုး၊ ရေအိုးများကို မြို့ရွာအနှံ့မှ လာရောက်ရောင်းချကြသော ဈေးဆိုင်တန်းကြီးမှာ အိုးဘို ရွှေကျင်ရပ်၊ ဧရာဝတီတာရိုးတစ်လျှောက်မှ ရပ်ကွက်လမ်းများအထိ ရှည်လျားစွာ ရှိနေပြီး ရပ်ကွက်အတွင်းရှိ ဒေသခံများသာမက အနီးအနားမြို့နယ် ကျေးရွာများ၊ ပြည်တွင်းခရီးသွားဧည့်သည်များ လာရောက်ဝယ်ယူကြသဖြင့် အလွန်စည်ကားသော ပွဲတော်တစ်ခုဖြစ်ကြောင်း သိရသည်။
အိုးပုတ်ပွဲသည် မြန်မာနိုင်ငံတွင် တစ်ခုတည်းသော တစ်ညနေခင်းသာ ကျင်းပသည့် မြန်မာ့ရိုးရာ ပွဲတော်တစ်ခု ဖြစ်ပြီး နှစ်စဉ် ဝါခေါင်လဆန်း (၈) ရက်တွင် ကျင်းပပြုလုပ်လေ့ရှိကြောင်း သိရသည်။
ထို့ပြင်တောင်ပြုံးပွဲတော်ကို ကိုဗစ်ကပ်ရောဂါကာလ ၂၀၂၀ ပြည့်နှစ်နှင့် ပြည်တွင်းပဋိပက္ခများ စတင်လာသည့် ၂၀၂၁ ခုနှစ် ကာလတွင် တောင်ပြုံးပွဲတော်ကို မကျင်းပဖြစ်သည့်အတွက် ယခု၂၀၂၃ ခုနှစ်တွင်ရှေးရိုး အစဉ်အလာအတိုင်း သြဂုတ်လ (၂၄) ရက်မှ (၃၁) ရက်အထိ ပြန်လည်ကျင်းပသွားမည်ဖြစ်ကြောင်း သိရသည်။
Photo crd- Phoe Kyaw
