ပဲခူးတိုင်းဒေသကြီး တောင်ငူမြို့၌ အကောင်အထည်ဖော် ဆောင်ရွက်လျက်ရှိသော ဖွံ့ဖြိုးရေးစီမံကိန်းများကို နိုင်ငံတော်သမ္မတ ဦးမင်းအောင်လှိုင်က ဇွန် ၆ ရက်တွင် သွားရောက်ကြည့်ရှုစစ်ဆေးခဲ့ပြီး မီးရထားပို့ဆောင်ရေးနှင့် အားကစားအခြေခံအဆောက်အအုံများ ရေရှည်ဖွံ့ဖြိုးတိုးတက်စေရေးအတွက် လိုအပ်သည့် လမ်းညွှန်မှာကြားမှုများ ပြုလုပ်ခဲ့ကြောင်း သိရသည်။
စစ်ဆေးမှုအတွင်း နိုင်ငံတော်သမ္မတသည် နေပြည်တော်–တောင်ငူ မီးရထားလမ်းပိုင်း အဆင့်မြှင့်တင်ထားမှုများ၊ မီးရထားလမ်းတစ်လျှောက် သန့်ရှင်းသာယာလှပရေးနှင့် စိမ်းလန်းစိုပြည်ရေးလုပ်ငန်းများ၊ စိုက်ပျိုးရေးလုပ်ငန်းများ ဆောင်ရွက်ထားရှိမှုနှင့် ဘူတာဝင်ထွက်နေရာများကို စနစ်တကျ စီမံခန့်ခွဲထားမှုတို့ကို လေ့လာကြည့်ရှုခဲ့သည်။
ယင်းနောက် မီးရထားပို့ဆောင်ရေးလုပ်ငန်းဥပဒေနှင့်အညီ လမ်းပိုင်းများကို စနစ်တကျ ထိန်းသိမ်းဆောင်ရွက်ရန်၊ အသုံးမပြုသည့် မီးရထားသံလမ်းများကိုလည်း ထိန်းသိမ်းထားရှိရန်နှင့် ရထားသွားလာရေးစနစ်၏ အခြေခံအုတ်မြစ်ဖြစ်သည့် မီးရထားလမ်းများ အရည်အသွေးကောင်းမွန်စေရေး အထူးအလေးထားဆောင်ရွက်ရန် တာဝန်ရှိသူများအား မှာကြားခဲ့သည်။
ထို့ပြင် တောင်ငူမြို့ရှောင် မီးရထားလမ်းစီမံကိန်းနှင့် တောင်ငူဘူတာအသစ် တည်ဆောက်မည့်နေရာများကိုလည်း ကြည့်ရှုစစ်ဆေးခဲ့ပြီး ရထားလမ်းဖောက်လုပ်ရာတွင် ရေစီးရေလာစနစ်ကောင်းမွန်ရေး၊ ရထားလမ်းတာဘောင်များ ခိုင်မာမှုရှိစေရေးနှင့် အင်ဂျင်နီယာစံချိန်စံညွှန်းများနှင့်အညီ ဆောင်ရွက်ရန် မှာကြားခဲ့သည်။
တောင်ငူဘူတာအသစ် တည်ဆောက်ရာတွင်လည်း အနာဂတ်တွင် တိုးတက်လာနိုင်သည့် မီးရထားခရီးစဉ်များနှင့် ခရီးသည်အရေအတွက်ကို ကြိုတင်တွက်ချက်ကာ ရေရှည်အသုံးပြုနိုင်မည့် ဘူတာစနစ်တစ်ခုအဖြစ် တည်ဆောက်ရန်၊ မီးရထားစင်္ကြန်များနှင့် ယာဒ်ဝန်းများကို စနစ်တကျ အကောင်အထည်ဖော်ဆောင်ရွက်ရန် ညွှန်ကြားခဲ့ကြောင်း သိရသည်။
ထို့နောက် တောင်ငူခရိုင် အားကစားကွင်း အဆင့်မြှင့်တင်ရေးလုပ်ငန်းများကိုလည်း သွားရောက်ကြည့်ရှုစစ်ဆေးခဲ့ပြီး ပွဲကြည့်ပရိသတ် အရေအတွက်နှင့် ကိုက်ညီသည့် အဆင့်မီပွဲကြည့်စင်များ တည်ဆောက်ရန်၊ အနာဂတ်မြို့ပြဖွံ့ဖြိုးတိုးတက်မှုနှင့် လူဦးရေတိုးတက်လာမှုကို ထည့်သွင်းစဉ်းစားကာ တိုးချဲ့အဆင့်မြှင့်တင်နိုင်မည့် စီမံကိန်းပုံစံဖြင့် ဆောင်ရွက်သွားရန် မှာကြားခဲ့ကြောင်း သိရသည်။