ရန်ကုန်မြို့အား Smart City စီမံကိန်းအဖြစ် အကောင်အထည်ဖော်ဆောင်ရွက်ရာတွင် ကဏ္ဍအလိုက် တိုးတက်မှုအဆင့် (Star Rating System) စနစ်သတ်မှတ်၍ ပြည်သူလူထုထံ ပွင့်လင်းမြင်သာစွာ ထုတ်ပြန်ပေးနိုင်ရေးအတွက် တိုက်တွန်းသည့်အဆိုကို ရန်ကုန်တိုင်းဒေသကြီးလွှတ်တော်တွင် ဇွန် ၁၅ ရက်က တင်သွင်းခဲ့ကြောင်း သိရသည်။
အဆိုကို ဗဟန်းမြို့နယ် တိုင်းဒေသကြီးလွှတ်တော်ကိုယ်စားလှယ် အမှတ်(၂) ဒေါ်ခိုင်ဆုရည်ဇော်က တတိယအကြိမ် ရန်ကုန်တိုင်းဒေသကြီးလွှတ်တော် ဒုတိယပုံမှန်အစည်းအဝေးတွင် တင်သွင်းခဲ့ခြင်းဖြစ်ပြီး လှိုင်မြို့နယ် တိုင်းဒေသကြီးလွှတ်တော်ကိုယ်စားလှယ် အမှတ်(၂) ဦးကျော်စံက ထောက်ခံဆွေးနွေးခဲ့သည်။
ဒေါ်ခိုင်ဆုရည်ဇော်က “ပြည်သူလူထုအနေဖြင့် မိမိတို့မဲဆန္ဒနယ်အတွင်း စမတ်စီးတီးလုပ်ငန်းစဉ်များကို စဉ်ဆက်မပြတ် စောင့်ကြည့်ခွင့်ရရှိကာ ပွင့်လင်းမြင်သာပြီး တာဝန်ခံမှုရှိသော အစိုးရစနစ်ကို ဖော်ဆောင်နိုင်မှာဖြစ်ပါတယ်” ဟု လွှတ်တော်တွင် ပြောကြားခဲ့သည်။
ထို့အပြင် ရန်ကုန်တိုင်းဒေသကြီး Smart City စီမံကိန်းကို Smart Mobility၊ Smart Government၊ Smart Environment နှင့် Smart Economy စသည့် ကဏ္ဍများအလိုက် တိုးတက်မှုအခြေအနေများကို Star Rating System ဖြင့် သတ်မှတ်ကာ Public Dashboard မှတစ်ဆင့် ပြည်သူထံ ပုံမှန်ထုတ်ပြန်ပေးနိုင်ရေးအတွက် တိုင်းဒေသကြီးအစိုးရအဖွဲ့မှ အလေးထားဆောင်ရွက်ပေးရန် တိုက်တွန်းခဲ့သည်။
အဆိုတင်သွင်းရာတွင် Star Rating System နှင့်ပတ်သက်၍ ကြယ်ငါးလုံးကို စံပြအဆင့်၊ ကြယ်လေးလုံးကို ကောင်းမွန်အဆင့်၊ ကြယ်သုံးလုံးကို အလယ်အလတ်အဆင့်၊ ကြယ်နှစ်လုံးကို လိုအပ်ချက်ရှိသည့်အဆင့်နှင့် ကြယ်တစ်လုံးကို စိုးရိမ်ရသည့်အဆင့်အဖြစ် သတ်မှတ်ထားကြောင်း ရှင်းလင်းပြောကြားခဲ့သည်။
“ဒီစနစ်ဟာ ပြည်သူတွေရဲ့အသံကို နားထောင်ပြီး လိုအပ်ချက်ရှိနေတဲ့ ကဏ္ဍတွေကို အလွယ်တကူသိနိုင်တဲ့ အကဲဖြတ်စနစ်ဖြစ်ပါတယ်” ဟုလည်း ဒေါ်ခိုင်ဆုရည်ဇော်က ဆက်လက်ပြောကြားခဲ့သည်။
ယင်းအဆိုအား လက်ခံဆွေးနွေးရန် သင့်/မသင့်ကို ရန်ကုန်တိုင်းဒေသကြီးလွှတ်တော်ဥက္ကဌ ဦးဌေးအောင်က လွှတ်တော်၏ အဆုံးအဖြတ်ရယူခဲ့ရာ လွှတ်တော်ကိုယ်စားလှယ်များက သဘောတူညီခဲ့သဖြင့် အဆိုကို လက်ခံဆွေးနွေးရန် ဆုံးဖြတ်ခဲ့ကြောင်း သိရသည်။
အဆိုနှင့်ပတ်သက်၍ ဆွေးနွေးလိုသည့် လွှတ်တော်ကိုယ်စားလှယ်များအနေဖြင့် အမည်စာရင်းတင်သွင်းနိုင်ကြောင်း ကြေညာထားပြီး ဇွန် ၁၉ ရက်တွင် ဆက်လက်ဆွေးနွေးသွားမည်ဖြစ်ကြောင်း သိရသည်။