တရုတ်နိုင်ငံ ယူနန်ပြည်နယ် ကူမင်းမြို့၌ ၁၀ ကြိမ်မြောက် တရုတ်-တောင်အာရှ ကုန်စည်ပြပွဲ (10th China-South Asia Expo) ကို ဇွန် ၁၁ ရက်တွင် စတင်ဖွင့်လှစ်လိုက်ပြီး နိုင်ငံနှင့် ဒေသပေါင်း ၆၈ ခုမှ လုပ်ငန်းပေါင်း ၂,၃၀၀ ကျော် ပါဝင်ပြသလျက်ရှိကြောင်း သိရသည်။
“စည်းလုံးညီညွတ်မှုနှင့် ပူးပေါင်းဆောင်ရွက်ရေးမှတစ်ဆင့် ဘုံဖွံ့ဖြိုးတိုးတက်ရေး” (Unity and Cooperation for Common Development) ခေါင်းစဉ်ဖြင့် ကျင်းပသည့် ယခုနှစ် ပြပွဲသည် တရုတ်နိုင်ငံနှင့် တောင်အာရှ၊ အရှေ့တောင်အာရှနိုင်ငံများအကြား ကုန်သွယ်ရေး၊ ရင်းနှီးမြှုပ်နှံမှုနှင့် ဒေသတွင်းပူးပေါင်းဆောင်ရွက်မှု မြှင့်တင်ရေးအတွက် အရေးပါသည့် နိုင်ငံတကာပလက်ဖောင်းတစ်ခုအဖြစ် ရပ်တည်လျက်ရှိသည်။
ပြပွဲစီစဉ်သူများ၏ ထုတ်ပြန်ချက်အရ ယခုနှစ် Expo တွင် ပြည်ပလုပ်ငန်းများ၏ ပါဝင်မှုသည် စုစုပေါင်း၏ ၄၂ ရာခိုင်နှုန်းရှိပြီး နိုင်ငံတကာ ဝယ်ယူသူ ၁,၅၀၀ ကျော် မှတ်ပုံတင်ထားကာ ယင်းတို့အနက် ၆၀ ရာခိုင်နှုန်းကျော်မှာ ပြည်ပဝယ်ယူသူများဖြစ်ကြောင်း သိရသည်။
ထို့ပြင် ဂျာမနီ၊ ဘရာဇီး၊ ပီရူးနှင့် တူရကီနိုင်ငံတို့အပါအဝင် နိုင်ငံ ၄၅ နိုင်ငံမှ ဝယ်ယူရေးကိုယ်စားလှယ်အဖွဲ့များ ပထမဆုံးအကြိမ် ပါဝင်တက်ရောက်လာခြင်းက Expo ၏ နိုင်ငံတကာလွှမ်းမိုးမှု တိုးမြင့်လာမှုကို ပြသနေသည်။
ပြပွဲတွင် တောင်အာရှပြခန်းနှစ်ခု၊ အရှေ့တောင်အာရှပြခန်းတစ်ခုနှင့် နိုင်ငံတကာပြခန်းတစ်ခုအပြင် ဝန်ဆောင်မှုကုန်သွယ်ရေး၊ အစိမ်းရောင်စွမ်းအင်၊ ကုန်ထုတ်လုပ်မှု၊ ကျန်းမာရေး၊ ယဉ်ကျေးမှုနှင့် ခရီးသွားလုပ်ငန်း၊ ခေတ်မီစိုက်ပျိုးရေးနှင့် ကော်ဖီလုပ်ငန်းဆိုင်ရာ အထူးပြခန်းများကို ထည့်သွင်းပြသထားသည်။
ယခုနှစ် ပြပွဲ၏ ထူးခြားချက်များအနက် မြန်မာ့ကျောက်စိမ်းလေလံပွဲ (Myanmar Jade Auction) ကို ပထမဆုံးအကြိမ် ထည့်သွင်းကျင်းပခြင်းလည်း ပါဝင်ပြီး မြန်မာကျောက်စိမ်းအကြမ်းထည်နှင့် အချောထည် လက်ဝတ်ရတနာများကို နိုင်ငံတကာဝယ်ယူသူများထံ မိတ်ဆက်ပြသသွားမည်ဖြစ်သည်။
တရုတ်နိုင်ငံနှင့် တောင်အာရှနိုင်ငံများအကြား ကုန်သွယ်မှုပမာဏသည် ၂၀၂၅ ခုနှစ်တွင် အမေရိကန်ဒေါ်လာ ဘီလီယံ ၂၀၀ ကျော်အထိ ပထမဆုံးအကြိမ် ရောက်ရှိခဲ့ပြီး ယခု Expo သည် ဒေသတွင်း စီးပွားရေးပူးပေါင်းဆောင်ရွက်မှုနှင့် ချိတ်ဆက်မှုများ ပိုမိုတိုးတက်လာစေရန် အထောက်အကူပြုမည်ဟု မျှော်လင့်ထားကြသည်။
10th China-South Asia Expo ကို ဇွန် ၁၁ ရက်မှ ၁၆ ရက်အထိ ကျင်းပသွားမည်ဖြစ်ပြီး ကုန်သွယ်ရေးချိတ်ဆက်မှု၊ ရင်းနှီးမြှုပ်နှံမှုမြှင့်တင်ရေးနှင့် နိုင်ငံတကာစီးပွားရေး ပူးပေါင်းဆောင်ရွက်မှုများ တိုးချဲ့နိုင်ရန် ရည်ရွယ်ထားကြောင်း သိရသည်။