တရုတ်၊ မက္ကဆီကိုနှင့် ကနေဒါတို့ကိုအခွန်သစ် စည်းကြပ်မည်–ထရမ့်ပ်

တရားမဝင် လူဝင်ရောက်မှုများနှင့် တရားမဝင် မူးယစ်ဆေးဝါး ကုန်သွယ်မှုများကို စိုးရိမ်ရသည်ဟုဆိုကာ သူ သမ္မတတာဝန်ထမ်းဆောင်သည့် ပထမရက်တွင်ပင် မက္ကဆီကိုနှင့် ကနေဒါနိုင်ငံများမှ သွင်းကုန်အားလုံးအပေါ် အခွန်စည်းကြပ်မှု ၂၅ ရာခိုင်နှုန်းနှင့် တရုတ်နိုင်ငံမှ သွင်းကုန်များအပေါ်တွင် ထပ်တိုးစည်းကြပ်ခွန် ၁၀ ရာခိုင်နှုန်း ချမှတ်သွားမည်ဟု အမေရိကန်ရွေးကောက်ခံသမ္မတ ဒေါ်နယ်ထရမ့်ပ်က နိုဝင်ဘာ ၂၅ ရက်တွင် ကတိပြုလိုက်သည်။

“ဇန်နဝါရီ ၂၀ ရက်နေ့တွင် ကျွနု်ပ်၏ ပထမဆုံးသော သမ္မတအမိန့်များထဲမှ တစ်ခုအနေဖြင့် အမေရိကန်ပြည်ထောင်စုအတွင်း ဝင်ရောက်သော မက္ကဆီကိုနှင့် ကနေဒါနိုင်ငံတို့မှ ထုတ်ကုန်အားလုံးအပေါ် ၂၅ ရာခိုင်နှုန်း အခွန်ကောက်ခံသွားရန်နှင့် အဆင်ခြင်မဲ့စွာ နယ်စပ်ဖွင့်ထားမှုများကို စီမံဆောင်ရွက်ရန် လိုအပ်သော စာရွက်စာတမ်းအားလုံးကို ကျွန်တော် လက်မှတ်ရေးထိုးသွားမယ်” ဟု Truth ဆိုရှယ်မီဒီယာပေါ်တင်ခဲ့သော ပို့စ်၌ သူက ပြောဆိုခဲ့သည်။

အဆိုပါ အခွန်းစည်းကြပ်မှုသည် အထူးသဖြင့် ဖန်တာနိုင်းမူးယစ်ဆေးဝါးများနှင့် တရားမဝင် နယ်စပ်ဖြတ်ကျော် လူဝင်ရောက်မှုများကို ယင်းနှစ်နိုင်ငံက မနှိမ်နင်းမချင်း ပြဌာန်းထားမည်ဖြစ်သည်ဟု ထရမ့်ပ်ကပြောကြားခဲ့သည်။

မက္ကဆီကိုနှင့် ကနေဒါတို့သည် အမေရိကန်ပြည်ထောင်စု၏ အကြီးဆုံးကုန်သွယ်ဖက်နိုင်ငံများဖြစ်ကြပြီး ၂၀၂၃ ခုနှစ်တွင် မက္ကဆီကို ပို့ကုန်များ၏ ၈၃ ရာခိုင်နှုန်းကျော် သည် အမေရိကသို့ တင်ပို့ခဲ့ခြင်းဖြစ်သကဲ့သို့ ကနေဒါ ပို့ကုန်များ၏ ၇၅ ရာခိုင်နှုန်းသည် အမေရိကသို့ ဝင်ရောက်ခဲ့ခြင်းဖြစ်သည်။

တရုတ်နှင့် ပတ်သက်၍မူ ပေကျင်းသည် မက္ကဆီကိုမှ အမေရိကသို့ နယ်စပ်ဖြတ်ကျော်ဝင်ရောက်သော တရားမဝင် မူးယစ်ဆေးဝါးများ စီးဝင်မှုကို တားဆီးရန် လုံလောက်သည့် ထိရောက်သော အရေးယူဆောင်ရွက်မှုမရှိဟု ရွေးကောက်ခံသမ္မတက စွပ်စွဲသည်။

အဆိုပါဖြစ်စဉ်ကို အရေးယူတားမြစ်မှုမလုပ်မချင်း အမေရိကန်ပြည်ထောင်စုကို ဝင်ရောက်သည့် ၎င်းတို့၏ ကုန်ပစ္စည်း အားလုံးအပေါ် မည်သည့်ထပ်လောင်းအခွန်းစည်းကြပ်မှုများထက်မဆိုမြင့်မားသော နောက်တိုးအခွန်စည်းကြပ်မှု ၁၀ ရာခိုင်နှုန်း တရုတ်ကို ကောက်ခံသွားမည်ဖြစ်သည်ဟု ထရမ့်ပ်က ပြောဆိုခဲ့သည်။

ကုန်သွယ်ရေးစစ်ပွဲတစ်ခုတွင် အမေရိကလည်း နိုင်မည်မဟုတ်သကဲ့သို့ တရုတ်လည်း နိုင်မည်မဟုတ်ဟု ဝါရှင်တန်ရှိ တရုတ်သံရုံးက နိုဝင်ဘာ ၂၅ ရက်တွင် ပြောဆိုခဲ့သည်။

“တရုတ်အပေါ် အမေရိကရဲ့ အခွန်စည်းကြပ်မှုကိစ္စနဲ့ပတ်သက်လို့တော့ တရုတ်-အမေရိက စီးပွားရေးနဲ့ ကုန်သွယ်ရေးပူးပေါင်းဆောင်ရွက်မှုဟာ သဘာဝအားဖြင့် အပြန်အလှန်အကျိုးဖြစ်ထွန်းမှုရှိတယ်လို့ တရုတ်နိုင်ငံက ယုံကြည်ပါတယ်” ဟု တရုတ်သံရုံး ပြောရေးဆိုခွင့်ရှိသူ Liu Pengyu က သတင်းထုတ်ပြန်ချက်တွင် ဖေါ်ပြထားသည်။

Ref: သည်စထရိတ်တိုင်းမ်စ်