ရန်ကုန်၊ ဩဂုတ် ၃၁
ပုဂံ၊ မန္တလေးနှင့် ပဲခူးဒေသများမှ ထွက်ရှိသည့် မြန်မာ့ရိုးရာ လက်မှုပစ္စည်းများကို ရန်ကုန်မြို့တွင် တစ်နေရာတည်း လေ့လာဝယ်ယူနိုင်ရန် ပြသရောင်းချလျက်ရှိရာ တရုတ်နှင့် ကိုရီးယား ခရီးသွားများ အထူးစိတ်ဝင်စားစွာ လာရောက်ဝယ်ယူနေကြသည်။
အဆိုပါ အရောင်းဆိုင်ကို ရန်ကုန်မြို့၊ သိမ်ဖြူလမ်းရှိ အတွင်းဝန်ရုံး (ယခင် ဝန်ကြီးများရုံး) တွင် ဖွင့်လှစ်ထားခြင်းဖြစ်ပြီး ပုဂံဒေသ မြင်းကပါရွာထွက် ယွန်းထည်ပစ္စည်း အမျိုးပေါင်း ၃၀ ကျော်၊ မန္တလေးနှင့် ပဲခူးဒေသထွက် သစ်သားပစ္စည်း ၅၀ ကျော်အပြင် သဲပန်းချီ၊ ယွန်းပန်းချီ၊ ကျောက်စီပန်းချီနှင့် ရွှေချည်ငွေချည်ထိုး ပန်းချီကားများကို ပြသရောင်းချထားသည်။
ဆိုင်တွင် ဟိုတယ်၊ ကုမ္ပဏီ၊ စားသောက်ဆိုင်နှင့် နေအိမ်များ၌ အလှဆင်နိုင်သည့် ယွန်းမြန်မာ့စောင်း၊ ပတ္တလား၊ ဆွမ်းအုပ်၊ ရေနွေးအိုး၊ ဝိုင်ခွက်နှင့် လက်ဝတ်ရတနာ အသုံးအဆောင်များ ပါဝင်သည်။
ထို့ပြင် သစ်သားဖြင့် ပြုလုပ်ထားသော ကရဝိက်ဖောင်တော်၊ မြန်မာ့ဆိုင်းဝိုင်း၊ အရုပ်များနှင့် မန္တလေးတောင်၊ ဦးပိန်တံတား၊ ပုဂံနန်းတွင်းသူ ပုံရိပ်များ ရို-က်နှိပ်ထားသည့် အင်္ကျီများကိုပါ စုံလင်စွာ ခင်းကျင်းထားသည်။
ယခုကဲ့သို့ တစ်နေရာတည်းတွင် စုစည်းပြသရောင်းချခြင်းသည် မြန်မာ့ရိုးရာ လက်မှုပညာများကို ထိန်းသိမ်းမြှင့်တင်နိုင်သည့်အပြင် ဒေသထွက်လက်မှုပစ္စည်းများကို ပြည်တွင်းပြည်ပဈေးကွက်သို့ ပိုမိုရောက်ရှိစေရေးနှင့် လက်မှုပညာရှင်များအတွက် များစွာ အထောက်အကူဖြစ်စေကြောင်း သိရသည်။