လက်ရှိ ကမ္ဘာတွင် ဖန်လုံအိမ်ဓာတ်ငွေ့ ထုတ်လွှတ်မှုအမြင့်မားဆုံး နိုင်ငံဖြစ်သော တရုတ်နိုင်ငံသည် ၂၀၃၅ ခုနှစ်တွင် ၎င်း၏ ထုတ်လွှတ်မှုများကို ၇ မှ ၁၀ ရာခိုင်နှုန်းအထိ လျှော့ချရန် ရည်မှန်းထားကြောင်း ကြေညာခဲ့သည်။
ဗုဒ္ဓဟူးနေ့က နှစ်စဉ်ကျင်းပသော ကုလသမဂ္ဂအထွေထွေညီလာခံ (UNGA) အတွင်း ပြုလုပ်သည့် ကုလသမဂ္ဂ၏ အဆင့်မြင့်ရာသီဥတု ထိပ်သီးအစည်းအဝေးတွင် “ကမ္ဘာကြီး ပူနွေးလာမှုနှင့် အပူလွန်ကဲသော ရာသီဥတုကို ဖြစ်စေသည့် ဓာတ်ငွေ့များထုတ်လွှတ်မှုကို တရုတ်နိုင်ငံက လျှော့ချသွားမည်ဖြစ်ကြောင်း” တရုတ်သမ္မတ ရှီကျင့်ဖျင်က ဗီဒီယိုမိန့်ခွန်းဖြင့် အခြားခေါင်းဆောင်များသို့ ပြောကြားခဲ့သည်။
“စိမ်းလန်းပြီး ကာဗွန်ဒိုင်အောက်ဆိုဒ်ထုတ်လွှတ်မှုနည်းတဲ့ စွမ်းအင်နဲ့ ဖွံ့ဖြိုးတိုးတက်ရေး အသွင်ကူးပြောင်းမှုဟာ ကျွန်တော်တို့ခေတ်ရဲ့ လမ်းကြောင်းဖြစ်ပါတယ်” ဟု ရှီက ပြောကြားသည်။
ဤကြေညာချက်သည် အမေရိကန်နိုင်ငံက ၎င်း၏ကတိကဝတ်များအား ပြန်လည်ရုပ်သိမ်းနေချိန်တွင် ထွက်ပေါ်လာခြင်းဖြစ်သည်။ သမ္မတ ဒေါ်နယ်ထရမ့်က ရာသီဥတုပြောင်းလဲမှုကို “လှည့်ဖြားမှု” ဟု အင်္ဂါနေ့က ခေါ်ဝေါ်ခဲ့ပြီး ပြန်လည်ပြည့်ဖြိုးမြဲစွမ်းအင်နှင့် ရာသီဥတုပြောင်းလဲမှု သဘောတရားတို့ကိုလည်း အထင်သေးခဲ့သည်။
ရှီက “အချို့သောနိုင်ငံများက [ရာသီဥတုဖောက်ပြန်မှု တို-က်ဖျ-က်ရေးလမ်းကြောင်း] ကို ဆန့်ကျင်လုပ်ဆောင်နေသော်လည်း နိုင်ငံတကာအသိုင်းအဝိုင်းအနေဖြင့် မှန်ကန်သော ဦးတည်ချက်အပေါ်တွင်သာ အာရုံစိုက်နေသင့်သည်” ဟု ပြောကြားခဲ့သည်။
ရှီ၏ နောက်ဆုံးထုတ်လွှတ်မှု ကတိကဝတ်သည် ၂၀၃၀ ပြည့်နှစ်အရောက်တွင် ကာဗွန်ဒိုင်အောက်ဆိုဒ်ထုတ်လွှတ်မှုကို အမြင့်ဆုံးအဆင့်အထိ လျှော့ချရန် ယခင်ကတိပြုခဲ့သည့်အပေါ် ထပ်ပေါင်းခြင်းဖြစ်ပြီး၊ ထိုပန်းတိုင်သည် တရုတ်နိုင်ငံ၏ ကိုယ်ပိုင်စာရင်းဇယားများအရ လမ်းကြောင်းမှန်ပေါ် ရောက်ရှိနေပုံရကြောင်း သုံးသပ်ကြသည်။
Source: scmp