လုံခြုံရေးအဖွဲ့ဝင်များပါဝင်သော ပူးပေါင်းအဖွဲ့ဝင်များက ရှမ်းပြည်နယ်၊ တန့်ယန်းမြို့နယ်နှင့် မူဆယ်မြို့တို့၌ အွန်လိုင်းလိမ်လည်လောင်းကစားမှုလုပ်ကိုင်နေသည့် တရုတ်နိုင်ငံသားများနှင့် မြန်မာနိုင်ငံသားများကိုဖမ်းဆီးရမိခဲ့ကြောင်း သိရသည်။
ယနေ့ ဧပြီ ၄ ရက်နံနက်ပိုင်းက တန့်ယန်းမြို့နယ်၊ ကောင်းဆန်ကျေးရွာအနီးရှိ အဆောက်အအုံ(၁၅)လုံးအတွင်းမှ အွန်လိုင်းလိမ်လည်လောင်းကစားမှုများလုပ်ကိုင်နေသည့် တရုတ်နိုင်ငံသား(၁၀၁)ဦး၊ မြန်မာနိုင်ငံသား(၂၀)ဦးတို့အား All in One ကွန်ပျူတာ(၂)လုံး၊ Desktop ကွန်ပျူတာ(၁)စုံ၊ Laptop (၂၁)လုံး၊ ဖုန်းမျိုးစုံ(၁၁၈)လုံး၊ Starlink (၁၆)ခု၊ Wireless Router (၁၃) လုံး၊ မီးစက်(၂)လုံးတို့နှင့်အတူဖမ်းဆီးရမိခဲ့ကြောင်း သိရသည်။
ထို့ပြင် ညနေပိုင်း၌ မူဆယ်မြို့၊ စွမ်စော်ရပ်ကွက်၊ မန်ဝိန်းနယ်မြေအတွင်းမှ အွန်လိုင်းလိမ်လည်လောင်းကစားလုပ်ကိုင်သူ တရုတ်နိုင်ငံသား(၇)ဦးအား ဖုန်းမျိုးစုံ(၃၆) လုံး၊ ကွန်ပျူတာ(၂၃)လုံးတို့နှင့်အတူ ထပ်မံဖမ်းဆီးရမိခဲ့ကြောင်း သိရသည်။
ထို့ကြောင့် ဖမ်းဆီးရမိသူများအား လိုအပ်သည့် စစ် ဆေးမှုများဆောင်ရွက်ပြီးပါက တည်ဆဲဥပဒေများနှင့်အညီ ထိရောက်ပြင်းထန်စွာအရေးယူသွားမည်ဖြစ်ကာ သိမ်းဆည်းရမိခဲ့သည့် ဆက်စပ်ပစ္စည်းများကိုလည်း လုပ်ထုံးလုပ်နည်းများနှင့်အညီ ဆက်လက်ဆောင်ရွက်သွားမည်ဖြစ်ကြောင်း သိရသည်။