ဂါဇာကမ်းမြောင်ဒေသတွင် ၁၅ လကြာ စစ်ပွဲများဖြစ်ပွားခဲ့ပြီးနောက် ဟားမတ်စ်နှင့် အစ္စရေးတို့ကြား အပစ်အခတ်ရပ်စဲရေး သဘောတူညီချက်ကို စေ့စပ်ညှိနှိုင်းသူများမှ သဘောတူ အတည်ပြုလိုက်ကြပြီဖြစ်ပြီး၊ ယင်း အပစ်အခတ်ရပ်စဲရေးသည် ဇန်နဝါရီ ၁၉ ရက် တနင်္ဂနွေနေ့တွင် စတင်အသက်ဝင်မည်ဖြစ်သည်။
သို့သော်လည်း အစ္စရေးတပ်ဖွဲ့များသည် သဘောတူညီချက်ကို ထုတ်ပြန်ကြေညာပြီးကတည်းက ဂါဇာကမ်းမြှောင်တစ်လျှောက် တိုက်ခိုက်မှုများကို ဆက်လက်လုပ်ဆောင်နေပြီး ပါလက်စတိုင်းအသိုက်အဝန်းအတွင်း အနည်းဆုံး ပါလက်စတိုင်း ၃၀ ဦး ထပ်မံသေဆုံးခဲ့သည်။
ကာတာနိုင်ငံ၏မြို့တော် ဒိုဟာမြို့တွင် ချုပ်ဆိုခဲ့သော အဆိုပါသဘောတူညီချက်သည် အစ္စရေးတပ်ဖွဲ့များ အပြည့်အဝဆုတ်ခွာရေး၊ နေရပ်စွန့်ခွာသွားသူများ ပြန်လည်ရောက်ရှိရေးနှင့် စစ်ပွဲများကို ထာဝရအဆုံးသတ်ရေးအပါအဝင် ပါလက်စတိုင်းအဖွဲ့က လိုလားသောအခြေအနေများနှင့် ကိုက်ညီကြောင်း ဟားမတ်စ်အရာရှိ Izzat al-Risheq က ပြောကြားခဲ့သည်။
အစ္စရေးဝန်ကြီးချုပ် ဘင်ဂျမင်နေတန်ယာဟုက အမေရိကန်သမ္မတ ဂျိုးဘိုင်ဒင် နှင့် ရွေးကောက်ခံသမ္မတ ဒေါ်နယ်ထရမ့်တို့အား “ဓားစာခံများစွာနှင့် ၎င်းတို့၏ မိသားစုများ” ခံစားနေရသော အဆိုးများကို အဆုံးသတ်ရေး သဘောတူညီချက်အောင်မြင်မှုအတွက် ၎င်းတို့၏ ကြိုတင်ကူညီမှုများအတွက် ကျေးဇူးတင်ရှိကြောင်း ပြောကြားခဲ့သည်။
၂၀၂၃ ခုနှစ် အောက်တိုဘာ ၇ ရက်နေ့က စတင်ဖြစ်ပွားခဲ့သည့် ဂါဇာကမ်းမြောင်ဒေသစစ်ပွဲများ ကြောင့် ပါလက်စတိုင်း ၄၆၇၀၇ ဦးထက်မနည်း သေဆုံးပြီး ၁၁၀,၂၆၅ ဦး ဒဏ်ရာရရှိခဲ့ကာ၊ ဟားမတ်စ်ဦးဆောင်သော တိုက်ခိုက်မှုများအတွင်း အစ္စရေးတွင် အနည်းဆုံး လူ ၁,၁၃၉ ဦး သေဆုံးပြီး ၂၀၀ ကျော်ကို ဖမ်းဆီးခံခဲ့ရသည်။