တစ်ရက်အတွင်း ကိုဗစ်-၁၉ ပိုးတွေ့လူနာသစ် ၆၀ ကျော် တွေ့ရှိခဲ့ပြီးနောက် ပြည်သူများ ကာကွယ်ဆေးထိုးနှံရန် ကျန်းမာရေးဝန်ကြီးဌာန တိုက်တွန်း

ဇူလိုင်လ ၅ ရက် တစ်ရက်အတွင်း ကိုဗစ်-၁၉ ပိုးတွေ့လူနာသစ် ၆၀ ကျော် တွေ့ရှိခဲ့ပြီးနောက် ပြည်သူများ အထူးသဖြင့် နာတာရှည်ရောဂါခံစားနေရသူများနှင့် သက်ကြီးရွယ်အိုများ ကာကွယ်ဆေးထိုးနှံရန် ကျန်းမာရေးဝန်ကြီးဌာနက ဇူလိုင်လ ၆ ရက်(ယနေ့)တွင် တိုက်တွန်းပြောကြားထားသည်။

ဇူလိုင်လ ၄ ရက်မှ ၅ရက်အတွင်း ဓာတ်ခွဲနမူနာစုစုပေါင်း ၆၂၂၅ ခုအား စစ်ဆေးပြီးစီးခဲ့ရာ ကိုဗစ်-၁၉ ရောဂါဓာတ်ခွဲအတည်ပြုလူနာသစ် ၆၁ ဦး တွေ့ရှိခဲ့ပြီး ပိုးတွေ့နှုန်းမှာ ၀ ဒသမ ၉၈ ရာခိုင်နှုန်းရှိကြောင်း ကျန်းမာရေးဝန်ကြီးဌာန၏ အချက်အလက်အရ သိရသည်။

ဇူလိုင်လအတွင်း ကိုဗစ်-၁၉ ရောဂါပိုးတွေ့ရှိမှုအခြေအနေအရ ဇူလိုင်လ ၁ ရက်တွင် ၃၁ ဦး၊ ဇူလိုင်လ ၂ ရက်တွင် ၂၂ ဦး၊ ဇူလိုင်လ ၃ ရက်တွင် ၂၀ ဦး၊ ဇူလိုင်လ ၄ ရက်တွင် ၃၆ ဦး တွေ့ရှိခဲ့ပြီး ရက်အလိုက်ပိုးတွေ့နှုန်းမှာ တစ်ရာခိုင်နှုန်းဝန်းကျင်ရှိကြောင်း သိရသည်။

ပိုးတွေ့လူနာသစ် တွေ့ရှိမှု အနည်းငယ်တိုးလာခြင်းကြောင့် ကျန်းမာရေးဝန်ကြီးဌာနက ကာကွယ်ဆေးထိုးနှံရန် တိုက်တွန်းနှိုးဆော်ထားကြောင်းနှင့် ဆေးထိုးနှံခြင်းဖြင့် ရောဂါကူးစက်မှုနှင့် ပြင်းထန်မှုတို့ကို လျော့နည်းစေနိုင်ခြင်း (အထူးသဖြင့် နာတာရှည်ရောဂါခံစားနေရသူများနှင့် သက်ကြီးရွယ်အိုများ)၊ ရောဂါ၏ နောက်ဆက်တွဲ ပြဿနာဖြစ်သည့် ကိုယ်တွင်းအင်္ဂါများ ထိခိုက်ပျက်စီးမှုမှ အသက်အန္တရာယ်ဆုံးရှုံးမှုဖြစ်သည်အထိ ဖြစ်ပေါ်ခြင်းမှ လျှော့ချနိုင်ခြင်းတို့ကြောင့် အသက် ငါးနှစ်နှင့်အထက်ရှိသော ပြည်သူများအားလုံး ကျန်းမာရေးဌာနနှင့်ဆက်သွယ်၍ ကိုဗစ်-၁၉ ရောဂါကာကွယ်ဆေး (ပထမအကြိမ်၊ ဒုတိယအကြိမ်နှင့် ထပ်ဆောင်းကာကွယ်ဆေး) များကို မဖြစ်မနေ သွားရောက်ထိုးနှံကြရန် တိုက်တွန်းနှိုးဆော်ထားသည်။

အာရှနိုင်ငံအချို့တွင် COVID-19 န၀မလှိုင်း စတင်ဖြစ်ပွားမှုများရှိ၍ ကာကွယ်ဆေးထိုးနှံခြင်းနှင့် ရောဂါကာကွယ်ရေးနည်းလမ်းများ မြှင့်တင်ဆောင်ရွက်ရန် ဇွန်လ ဒုတိယပတ်အတွင်းက ကမ္ဘာ့ကျန်းမာရေးအဖွဲ့ (WHO)မှ သတိပေးပြောကြားထားသည်။

လက်ရှိ ဂျပန်နိုင်ငံတွင် ကိုဗစ်-၁၉ ရောဂါကူးစက်မှု န၀မလှိုင်း စတင်ဖြစ်ပွားမှုများရှိနေ၍ ကာကွယ်ဆေးထိုးနှံမှုများနှင့် ရောဂါကာကွယ်ရေးနည်းလမ်းများကို မြှင့်တင်ဆောင်ရွက်ရန် ဂျပန်နိုင်ငံအစိုးရက လုပ်ဆောင်လျက်ရှိကြောင်းနှင့် ရောဂါကူးစက်ခံရသူအရေအတွက်သည် ဂျပန်နိုင်ငံအနှံ့ တဖြည်းဖြည်း မြင့်မားလာခြင်းကြောင့် ဂျပန်အစိုးရအနေဖြင့် ယင်းကဲ့သို့ လုပ်ဆောင်ခဲ့ခြင်းဖြစ်ကြောင်း သိရသည်။

နိုင်ငံအချို့တွင် ရောဂါကူးစက်မှုလှိုင်းသစ်များ စတင်ဖြစ်ပွားနေ၍ စမ်းသပ်စစ်ဆေးခြင်း၊ ကာကွယ်ဆေးထိုးနှံခြင်း အပါအဝင် ရောဂါကာကွယ်ရေးနည်းလမ်းများကို တိုးမြှင့်လုပ်ဆောင်ကြရန် ကမ္ဘာ့ကျန်းမာရေးအဖွဲ့က သတိပေးပြောကြားထားသည်။