အမေရိကန်သမ္မတ ဒေါ်နယ်ထရမ့်ပ်က ယူကရိန်းသမ္မတ ဇလန်းစကီးကို အာဏာရှင်တစ်ဦးဟု ဖေဖော်ဝါရီ ၁၉ ရက်တွင် ခေါ်ဆိုလိုက်ပြီး သုံးနှစ်ကြာလာပြီဖြစ်သော ရုရှား၏ ကျူးကျော်စစ် အဆုံးသတ်ရေး ကြိုးပမ်းမှုများတွင် ပုဂ္ဂိုလ်ရေး အကွဲအပြဲ ပိုကြီးလာစေခဲ့သည်။
အမေရိကန်ပြည်ထောင်စုသည် ယူကရိန်းကို ငွေကြေးနှင့် လက်နက် ထောက်ပံ့ပေးခဲ့သော်လည်း ထရမ့်ပ် အာဏာရလာပြီးချိန်ကစ၍ မူဝါဒအပြောင်းအလဲဖြစ်ခဲ့ကာ ထရမ့်ပ်သည် မော်စကိုနှင့် ဆွေးနွေးမှုများ စတင်လာခဲ့သည်။
“ရွေးကောက်ပွဲမရှိတဲ့ အာဏာရှင် ဇလန်းစကီးအနေနဲ့ မြန်မြန်ဆန်ဆန် လှုပ်ရှားရပါမယ် ဒါမှမဟုတ်ရင် သူ့မှာ နိုင်ငံတစ်နိုင်ငံ ကျန်တော့မှာ မဟုတ်ပါဘူး” ဟု ၂၀၂၄ ခုနှစ်တွင် ၅ နှစ် သမ္မတသက်တမ်း ကုန်ဆုံးခဲ့သော ယူကရိန်းသမ္မတနှင့်ပတ်သက်၍ ထရမ့်ပ်က သူ၏ Truth ဆိုရှယ်မီဒီယာပေါ်တွင် ရေးသားခဲ့သည်။
၂၀၂၂ ခုနှစ် ဖေဖော်ဝါရီလတွင် ရုရှားက ယူကရိန်းကို ကျူးကျော်ခဲ့ပြီးနောက် စစ်အုပ်ချုပ်ရေး ဥပဒေပြဌာန်းခဲ့ပြီး စစ်ပွဲကာလအတွင်း ရွေးကောက်ပွဲများကို ပိတ်ပင်ထားသည်။ ဖွဲ့စည်းပုံ အခြေခံဥပဒေအရ သမ္မတသည် နောက်သမ္မတသစ် ရွေးကောက်တင်မြှောက်ခံရချိန်အထိ တာဝန်ထမ်းဆောင်နေရမည်ဖြစ်သည်။
ဖေဖော်ဝါရီ ၁၈ ရက်က သတင်းစာရှင်းလင်းပွဲတွင် ထရမ့်ပ်သည် ပဋိပက္ခနှင့်ပတ်သက်၍ ခရမ္မလင်ဇာတ်ကြောင်းများကို ထပ်ခါထပ်ခါ ပြော၍ ဇလန်းစကီးကို ဝေဖန်ခဲ့ပြီး စစ်ပွဲအဆုံးသတ်ရန်အတွက် တောင်းဆိုခဲ့သည်။
ထရမ့်ပ်သည် စစ်ပွဲစတင်ခဲ့ခြင်းတွင် ကိဗ်ကို အပြစ်ပုံချခဲ့ခြင်းနှင့် ဇလန်စကီး၏ သမ္မတတာဝန် တရားဝင်မှုအပေါ် ခရမ္မလင်၏ မေးခွန်းထုတ်မှုများအတိုင်း တစ်သံတည်းထွက်ခဲ့ခြင်းဖြင့် ရုရှား သတင်းအချက်အလက်အမှားများအတွင်း သက်ဆင်းခဲ့ရပြီဟု ဇလန်းစကီးက ပြန်လည်စွပ်စွဲခဲ့သည်။
“သူက ရွေးကောက်ပွဲလုပ်ဖို့ ငြင်းတယ်၊ ယူကရိန်း ရွေးကောက်ပွဲတွေက အရမ်းနည်းပါတယ်၊ သူကျွမ်းကျင်တဲ့ တစ်ခုတည်သောအရာက ဂျိုးဘိုင်ဒင်ကို အပျော့ဆွဲ နဲ့ ကစားတာပါပဲ” ဟု ဇလန်းစကီးနှင့် ပတ်သက်၍ ဆိုရှယ်မီဒီယာတွင် ထရမ့်ပ်က ပြောဆိုခဲ့သည်။
တစ်ချိန်တည်းတွင် စစ်ပွဲအဆုံးသတ်ရေးအတွက် ရုရှားနှင့် မိမိတို့ အောင်မြင်စွာ စေ့စပ်ဆွေးနွေးနေပြီး အားလုံးသည် ထရမ့်ပ်နှင့် ထရမ့်ပ် အစိုးရအဖွဲ့သာလျှင်လုပ်နိုင်သည်ကို ဝန်ခံသည်ဟု ထရမ့်ပ်က ဆက်လက် ပြောဆိုသည်။
Ref: သည်စထရိတ်တိုင်းမ်စ်