ဆေးရုံကြီးများတွင်သာမက မြို့နယ်ဆေးရုံများနှင့် တိုက်နယ်ဆေးရုံများအထိ ဆရာဝန်များ ချထားနိုင်ရေးအတွက် စီမံချက်များ ချမှတ်ဆောင်ရွက်လျက်ရှိ

ဆေးရုံတိုင်း ဆရာဝန်ရှိစေရေးအား အကောင်အထည်ဆောင်ရွက်နိုင်ရေးအတွက် ဆေးရုံကြီးများတွင်သာမက မြို့နယ်ဆေးရုံများနှင့် တိုက်နယ်ဆေးရုံများအထိ ဆရာဝန်များ ချ ထားနိုင်ရေးအတွက် စီမံချက်များ ချမှတ်ဆောင်ရွက်လျက်ရှိကြောင်း ကျန်းမာရေးဝန်ကြီးဌာန၊ ပြည်ထောင်စုဝန်ကြီး ဒေါက်တာသက်ခိုင်ဝင်းကပြောသည်။

ကျန်းမာရေးဝန်ကြီးဌာန၊ အစည်းအ‌ဝေးခန်းမ၌ ကျင်းပပြုလုပ်သည့် နေပြည်တော်/တိုင်း‌ဒေသကြီး/ပြည်နယ်ပြည်သူ့ကျန်းမာရေး/ ကုသရေးဦးစီးဌာနမှူးများနှင့် လုပ်ငန်းညှိနှိုင်းအစည်းအဝေးတွင် ထည့်သွင်းပြောကြားခဲ့သည်။

ကိုဗစ်-၁၉ ကပ်ရောဂါကာလတွင်လည်း ဆေးရုံ၊ ဆေးခန်းများတွင် ဝန်ထုပ်ဝန်ပိုးဖြစ်ခဲ့ကြသော်လည်း ဖြေရှင်းဆောင်ရွက်နိုင်ခဲ့ပြီး အခက်အခဲများကြားမှ ပြည်သူ့ဆေးရုံများ၏ လုပ်ငန်းများပြန်လည် လည်ပတ်ဆောင်ရွက်နိုင်ခဲ့ကြောင်း ပြည်ထောင်စုဝန်ကြီးက ဆိုသည်။

နိုင်ငံတော်၏ မူဝါဒဖြစ်သော ဆေးရုံတိုင်း ဆရာဝန်ရှိစေရေးအား အကောင်အထည်ဆောင်ရွက်နိုင်ရေးအတွက် ဆေးရုံကြီးများတွင်သာမက မြို့နယ်ဆေးရုံများနှင့် တိုက်နယ်ဆေး ရုံများအထိပါ ဆရာဝန်များ တာဝန်ချထားနိုင်ရေးအတွက် သက်ဆိုင်ရာပြည်နယ်/ တိုင်းဒေသကြီးအစိုးရအဖွဲ့များနှင့်ညှိနှိုင်းပြီး အသေးစိတ်စီမံချက်များအကောင်အထည်ဖော် ဆောင်ရွက်ရန်လိုအပ်ကြောင်း ပြည်ထောင်စုဝန်ကြီးကပြောသည်။

ထို့ပြင် ကုသရေးလုပ်ငန်းများကိုသာမက ပြည်သူ့ကျန်းမာရေးလုပ်ငန်းများဖြစ်သည့် ကာကွယ်ဆေးထိုးလုပ်ငန်းများ၊ကူးစက်ရောဂါကုသရေးလုပ်ငန်းများကို တိုင်းဒေသကြီး/ ပြည်နယ် ပြည်သူ့ကျန်းမာရေးနှင့်ကုသရေးဦးစီးဌာနမှူးများအနေဖြင့် ကြပ်မတ်ဆောင်ရွက်ပေးစေလိုကြောင်း၊ ပြည်သူ့ဆေးရုံများကို ပြည်သူလူထုက အားကိုးလာသည်နှင့် အမျှ ကျန်းမာရေး ဝန်ထမ်းများအနေဖြင့် ပြည်သူလူထုနှင့် ဆက်ဆံရေးကောင်းမွန်စေရေးအတွက် သင်တန်း ဆောင်ရွက်နေမှုများကို စဉ်ဆက်မပြတ် ဆောင်ရွက်စေလိုကြောင်း၊ ကျန်းမာရေးစောင့်ရှောက်မှုတွင် ပြည်သူလူထုကျခံသုံးစွဲရသည့် ကုန်ကျစရိတ် သက်သာစေရေးအတွက် အားဖြည့် ဆောင်ရွက်လျက်ရှိကြောင်း ၎င်းကဆက်လက်ပြောကြားခဲ့သည်။

ပုဂ္ဂလိကဆေးရုံ၊ ဆေးခန်းများကိုလည်း လုပ်ထုံးလုပ်နည်း/ဥပဒေများနှင့်အညီ စိစစ်ကြပ်မတ်လျက်ရှိကြောင်း၊ ဆေးပညာ ကျင့်ဝတ်မလိုက်နာမှုများ၊ ထုတ်ပြန်ထားသည့် စည်းကမ်းများမလိုက်နာမှုများနှင့်ပတ်သက်၍ အခါအားလျော်စွာ အရေးယူဆောင်ရွက်လျက်ရှိကြောင်း၊ စည်းမျဉ်းစည်းကမ်း ဥပဒေနှင့်အညီ ဆောင်ရွက်နေသည့် ပုဂ္ဂလိကဆေးရုံ၊ ဆေးခန်းများကိုလည်း လုပ်ငန်းလိုင်စင်များထုတ်ပေးခြင်းနှင့် သက်တမ်းတိုးခြင်းကို အချိန်နှင့်တပြေးညီ ဆောင်ရွက်ပေးလျက်ရှိကြောင်း သိရသည်။