ဆီသယ်ယာဉ်များတွင် GPS တပ်ဆင်ပြီးပါက စက်သုံးဆီတင်သွင်းဖြန့်ဖြူးသည့် စနစ်တစ်ခုလုံးအား Digital စနစ်ဖြင့်ထိန်းချုပ်မည်ဟု လျှပ်စစ်နှင့်စွမ်းအင်ဝန်ကြီးဌာန ပြည်ထောင်စုဝန်ကြီးဦးကိုကိုလွင်က ပြောသည်။
မေ ၄ ရက်ကပြုလုပ်သည့် အများပြည်သူသယ်ယူပို့ဆောင်ရေးလုပ်ငန်းများသို့ စက်သုံးဆီများအဆင်ပြေချောမွေ့စွာဖြန့်ဖြူးပေးနိုင်ရေးနှင့် ပြည်တွင်းစက်သုံးဆီတင်သွင်းသိုလှောင်ဖြန့်ဖြူးရောင်းချမှုအခြေအနေများဆိုင်ရာ လုပ်ငန်းညှိနှိုင်းအစည်းအဝေးတွင် ပြောကြားခဲ့ခြင်းဖြစ်သည်။
ဆိပ်ကမ်းရှိ သိုလှောင်ကန်စခန်းများတွင် Auto Tank Gauging စနစ်တပ်ဆင်ခြင်း၊ ဆီသယ်ယာဉ်များတွင် GPS တပ်ဆင်ခြင်းတို့ပြီးပါက စက်သုံးဆီတင်သွင်းဖြန့်ဖြူးသည့် စနစ်တစ်ခုလုံးအား Digital စနစ်ဖြင့် ထိန်းချုပ်မည်ဖြစ်ရာ နိုင်ငံတော်အနေဖြင့် စက်သုံးဆီဝယ်ယူတင်သွင်းရမှုများစွာလျော့နည်းသွားမည်ဟု ပြောသည်။
ထို့ပြင် စက်သုံးဆီသယ်ယူဖြန့်ဖြူးမှုပိုမိုစနစ်ကျစေရန် မျှောစာထုတ်ပေးရာ၌ Application ရေးဆွဲကာ QR Code စနစ်အသုံးပြုနေရာ စစ်ဆေးရေးဂိတ်များတွင် Scan ဖတ်စစ်ဆေးနေပြီး မြစ်တွင်းသွားရေယာဉ်များအတွက် စက်သုံးဆီဖြန့် ဖြူးပေးရန် စံလုပ်ထုံးလုပ်နည်းများကိုရေးဆွဲပြီးဖြစ်သည်ဟု ပြောသည်၊
” နိုင်ငံတော်ဖွံ့ဖြိုးတိုးတက်ဖို့အတွက် ပြည်သူလူထုရဲ့ ပူးပေါင်းပါဝင်ဆောင်ရွက်မှုဟာ အဓိကဖြစ်တာကြောင့် ပြည်သူလူထုအကျိုးဖြစ်ထွန်းမှသာ ပြည်သူလူထု လေးစားအားကိုးယုံကြည်မှုရရှိမှာဖြစ်တဲ့အတွက် နိုင်ငံ တော်အတွက် တစ်ထောင့်တစ်နေရာက အကျိုးပြုနေတဲ့ဝန်ထမ်းတွေ၊ Stakeholder တွေအနေနဲ့ စေတနာထားဆောင်ရွက်ကြပါ”ဟု ပြည်ထောင်စုဝန်ကြီးဦးကို ကိုလွင်က ပြောသည်။
ထို့ပြင် CNG သုံး Taxi ယာဉ်များကိုသုံးစွဲခြင်းဖြင့် လောင်စာဆီကုန်ကျမှုသက်သာသဖြင့် CNG သုံး Taxi ယာဉ်များအနေဖြင့် နိုင်ငံတော်မှစိုက်ထုတ်ပေးထားသည့်အခွင့်အရေးကို ပြည်သူများခံစားခွင့်ရရှိစေရန် ပူးပေါင်းဆောင်ရွက်ကြစေလိုပြီး YBS ယာဉ်များအနေဖြင့် အများပြည်သူသယ်ယူပို့ဆောင်ရေးအတွက် ခွင့်ပြုထားသည့်လမ်းကြောင်းများအတွင်း၌သာမောင်းနှင်ဝန်ဆောင်မှုပေးနိုင်ရေးအတွက် တာဝန်ရှိသူများကကြပ်မတ်ဆောင်ရွက်ရန်လည်း ပြည်ထောင်စုဝန်ကြီးဦးကိုကိုလွင်က မှာကြားခဲ့သည်။