ဆဋ္ဌသင်္ဂါယနာတင်အောင်ပွဲ နှစ် (၇၀) ပြည့် အထိမ်းအမှတ် နှစ်ရာ ကျပ်တန် အထူးထုတ် စာပို့တံဆိပ်ခေါင်းသစ် (၇)မျိုးရောင်းမည် ဟု သိရသည်။
ရောင်းချမည့်နေ့သည် ဧပြီ (၃၀)ရက်၊ ကဆုန်လပြည့်နေ့ နံနက် ကိုးနာရီခွဲမှ စ၍ သီရိမင်္ဂလာကမ္ဘာအေးကုန်းမြေ ရှိ မဟာမင်္ဂလာ အခမ်းအနား၏ အထိမ်းအမှတ် ပစ္စည်းအရောင်းဆိုင်နှင့် နေပြည်တော် ဗဟိုစာတိုက်ကြီး၊ ရန်ကုန်စာတိုက်ကြီး၊ မန္တလေးစာတိုက်ကြီးများတွင် ရောင်းချပေးမည် ဖြစ်သည်။
ထိုရောင်းချမှုကို ဒီဂျစ်တယ်ဖွံ့ဖြိုးတိုးတက်ရေး နှင့် ဆက်သွယ်ရေးဝန်ကြီးဌာန၊ မြန်မာ့စာတိုက်လုပ်ငန်းမှ ဆောင်ရွက်ခြင်းလည်း ဖြစ်သည်။
ထိုတံဆိပ်ခေါင်းသစ် (၇)မျိုးကို သာသနာရေးဝန်ကြီးဌာနမှ အတည်ပြုထားပြီး ဓာတ်ပုံ ဒီဇိုင်း ဦးအောင်ဇော်မြတ်(ကျော့သီသ) မှ ဒီဇိုင်းရေးဆွဲထားခြင်း ဖြစ်သည်။
အထူးအစီအစဉ်အနေဖြင့် နေပြည်တော် ဗဟိုစာတိုက်ကြီး၊ ရန်ကုန်စာတိုက်ကြီး၊ မန္တလေးစာတိုက်ကြီးများတွင် ဧပြီ(၃၀)တွင် ဝယ်ယူသော စာပို့တံဆိပ်ခေါင်းများနှင့်ပထမနေ့စာအိတ်များ (Firstday cover)များပေါ်၌ နေ့စွဲ အမှတ်အသားတံဆိပ် ရိုက်နှိပ်ပေးသွားမည်လည်း ဖြစ်သည်။