ဆက်ဆံရေး ပိုမိုနက်ရှိုင်းစေရန် ဆိုးလ်နှင့် ဟနွိုင် ကတိပြုကြမည်

တောင်ကိုရီးယားနှင့် ဗီယက်နမ်တို့သည် သြဂုတ်လ ၁၁ ရက် နေ့တွင် ၎င်းတို့ခေါင်းဆောင်များ၏ ထိပ်သီးဆွေးနွေးပွဲတွင် စီးပွားရေးနှင့် မဟာဗျူဟာမြောက် ပူးပေါင်းဆောင်ရွက်မှုကို ကတိပြုကြမည်ဖြစ်သည်။ စစ်အေးခေတ် ရန်သူဟောင်းများသည် စိန်ခေါ်မှုများရှိနေသော ကမ္ဘာလုံးဆိုင်ရာ ကုန်သွယ်ရေးပတ်ဝန်းကျင်နှင့် လိုက်လျောညီထွေဖြစ်စေရန် ၎င်းတို့၏ စီးပွားရေးဆက်ဆံမှုအရှိန်မြှင့်‌ရေးအတွက် ကြိုးပမ်းလျက်ရှိသည်။

တောင်ကိုရီးယားသမ္မတ လီဂျေးမြောင်သည် ဇွန်လ ၄ ရက် နေ့တွင် သမ္မတတာဝန်ကို စတင်ထမ်းဆောင်ပြီးနောက်ပိုင်း ပထမဆုံးနိုင်ငံတော်ဧည့်သည်တော်အဖြစ် ဗီယက်နမ်ခေါင်းဆောင် တူလမ်ကို လက်ခံတွေ့ဆုံမည်ဖြစ်ကာ ဗီယက်နမ်နိုင်ငံတွင် ကုန်သွယ်ရေးနှင့်ရင်းနှီးမြှုပ်နှံမှုကို မြှင့်တင်ရန် ဆွေးနွေးသွားမည်ဖြစ်ကြောင်း မစ္စတာလီ၏ရုံးက ပြောကြားခဲ့သည်။

ဗီယက်နမ်ကွန်မြူနစ်ပါတီ အထွေထွေအတွင်းရေးမှူး မစ္စတာလမ်သည် စက်မှု၊ ကုန်သွယ်ရေး၊ နိုင်ငံခြားရေးနှင့် နည်းပညာဝန်ကြီးများ၊ ပါတီအကြီးတန်းနှင့် လွှတ်တော်အမတ်များပါဝင်သော ကိုယ်စားလှယ်အဖွဲ့ကို ဦးဆောင်ကာ ဆိုးလ်သို့ လေးရက်ကြာနိုင်ငံတော်ခရီးစဉ်ကို သွားရောက်မည်ဖြစ်သည်။

ထိပ်သီးအစည်းအဝေးတွင် နျူကလီးယား၊ ပြန်လည်ပြည့်ဖြိုးမြဲစွမ်းအင်၊ ငွေကြေးနှင့် ဘဏ္ဍာရေးမူဝါဒများ၊ သိပ္ပံနှင့် နည်းပညာကဏ္ဍများတွင် ပူးပေါင်းဆောင်ရွက်မှုဆိုင်ရာ နားလည်မှုစာချွန်လွှာ ၁၀ ခု ခန့်ကို နှစ်နိုင်ငံလက်မှတ်ရေးထိုးသွားရန် စီစဉ်ထားကြောင်း မစ္စတာလီ၏ရုံးက ပြောဆိုသည်။

ဗီယက်နမ်ခေါင်းဆောင်၏ ရှားရှားပါးပါး ခရီးစဉ်သည် ဗီယက်နမ်နိုင်ငံတွင် စီစဉ်ထားသည့် အဓိကအခြေခံအဆောက်အဦးနှင့် နျူကလီးယားစွမ်းအင်စီမံကိန်းများတွင် တောင်ကိုရီးယားစီးပွားရေးလုပ်ငန်းများ ရင်းနှီးမြှုပ်နှံနိုင်ရန်အတွက် အဆင်သင့်ဖြစ်စေမည့် အခြေအနေတစ်ရပ်ကို အထောက်အကူဖြစ်စေမည်ဟု မျှော်လင့်ကြောင်းလည်း အဆိုပါရုံးက ပြောကြားခဲ့သည်။

ဆမ်ဆောင်းအီလက်ထရောနစ်အပါအဝင် တောင်ကိုရီးယား၏ အဓိကကုမ္ပဏီကြီးအများအပြားသည် ဗီယက်နမ်ကို ပို့ကုန်ဗဟိုချက်အဖြစ် အသုံးပြုခဲ့ကြပြီး လုပ်သားစရိတ်သက်သာမှု၊ ရက်ရောသော အခွန်မက်လုံးများနှင့် ဟနွိုင်၏ ဒါဇင်နှင့်ချီသောနိုင်ငံများနှင့် မြောက်များစွာသော လွတ်လပ်စွာကုန်သွယ်မှုစာချုပ်များကြောင့် နှစ်များစွာ အကျိုးအမြတ်ဖြစ်ထွန်းခဲ့ကြသည်။

သို့ရာတွင် မကြာသေးမီရက်သတ္တပတ်များအတွင်း အာရှနိုင်ငံများအပေါ် စည်းကြပ်ခွန်အသစ်များ ချမှတ်ခဲ့သည့် အမေရိကန်သမ္မတ ဒေါ်နယ်ထရမ်ပ့်၏ ကုန်သွယ်မှုမူဝါဒသည် အနာဂတ်စီးပွားရေးဆိုင်ရာ ကတိကဝတ်များနှင့်ပတ်သက်၍ မရေရာမှုများကို တိုးလာစေပြီး ဗီယက်နမ်၏ တရားဝင်အချက်အလက်များအရ ရင်းနှီးမြှုပ်နှံမှုအသစ်များသည် နှေးကွေးသွားကြောင်း ဖော်ပြနေသည်။

Ref: သည်စထရိတ်တိုင်းမ်စ်