မကွေးတိုင်းဒေသကြီး၊ စလင်းမြို့နယ် မြန်မာ့လယ်ယာဖွံ့ဖြိုးရေးဘဏ်မှ ၂၀၂၆ ခုနှစ် မိုးသီးနှံစပါးစိုက်ပျိုးစရိတ် ချေးငွေများကို ယနေ့ (မေလ ၁၂ ရက်) နံနက် ၉ နာရီက စတင်ထုတ်ချေးပေးခဲ့ရာ ပုထိုးဖြူရပ်ကွက်မှ တောင်သူ (၄၀) ဦးအား ငွေကျပ် (၃၇၈) သိန်းကို ပထမဦးဆုံး ထုတ်ချေးပေးခဲ့ကြောင်း သိရသည်။
ချေးငွေထုတ်ချေးမှု အစီအစဉ်
ယခုထုတ်ချေးပေးသည့် စိုက်ပျိုးစရိတ်ချေးငွေသည် ပုထိုးဖြူရပ်ကွက်အတွင်းရှိ တောင်သူ (၄၀) ဦး၏ မိုးစပါးစိုက်ဧက (၁၂၆) ဧကအတွက် ဖြစ်ပြီး၊ တစ်ဧကလျှင် ငွေကျပ် (၃) သိန်းနှုန်းဖြင့် တွက်ချက်ထုတ်ချေးပေးခဲ့ခြင်း ဖြစ်သည်။
ထုတ်ချေးသည့် စနစ်
တောင်သူများအနေဖြင့် လယ်ယာလုပ်ငန်းသုံး သွင်းအားစုများကို အချိန်မီ ကြိုတင်ဝယ်ယူအသုံးပြုနိုင်ရန်အတွက် –
တောင်သူများပိုင်ဆိုင်သည့် (ပုံစံ-၇) မူရင်းများကို ဘဏ်အပေါင်အဖြစ် ရယူခြင်း၊ တောင်သူတစ်ဦးချင်းစီ ကိုယ်တိုင်အာမခံသည့်စနစ် (Individual Guarantee) ဖြင့် လွယ်ကူလျင်မြန်စွာ ထုတ်ချေးပေးခဲ့ခြင်းဖြစ်သည်။
မြို့နယ်မြန်မာ့လယ်ယာဖွံ့ဖြိုးရေးဘဏ်အနေဖြင့် ၂၀၂၆ ခုနှစ် မိုးသီးနှံစပါးစိုက်ပျိုးစရိတ် ချေးငွေများကို ယခုမေလမှစတင်ကာ အရှိန်အဟုန်ဖြင့် ထုတ်ချေးပေးလျက်ရှိပြီး၊ ကျန်ရှိနေသည့် ရပ်ကွက်နှင့် ကျေးရွာအုပ်စုများမှ တောင်သူများကိုလည်း အလှည့်ကျ ဆက်လက်ထုတ်ချေးပေးသွားမည်ဖြစ်ကြောင်း သတင်းရရှိသည်။