ရိုက်တာ (Reuters)၊ AFP နဲ့ The New York Times သတင်းဌာနတွေရဲ့ ဖော်ပြချက်အရ ဩဂုတ်လ ၁၅ ရက် စနေနေ့ မနက် ၁ နာရီကျော်လောက်မှာ နာမည်ကြီး ကမ္ဘာလှည့်ခရီးသည်တွေ လာရောက်လေ့ရှိတဲ့ စပိန်နိုင်ငံ ဂရန်နာဒါ(Granada) ပြည်နယ်ထဲက အယ်လ်ဟန်ဒင်(Alhendín) မြို့မှာ ပြင်းအား ၅.၂ ရှိတဲ့ ငလျင်တစ်ခု လှုပ်ခတ်ခဲ့ကြောင်းသိရပါတယ်။
သတင်းတွေအရတော့ ထိခိုက်ဒဏ်ရာရသူ မရှိသေးဘူးလို့ သိရပါတယ်။ အန်ဒါလူစီယာ(Andalusia) ဒေသရဲ့ အရေးပေါ်ကယ်ဆယ်ရေးဆိုင်ရာ အကြီးအကဲဖြစ်သူ အန်တိုနီယို ဆန်းဇ် ကတော့ အရေးပေါ်ကယ်ဆယ်ရေးအဖွဲ့တွေဆီကို ဖုန်းခေါ်ဆိုမှုပေါင်း ၃၀၀ လောက် လက်ခံရရှိခဲ့ပြီး အထူးသဖြင့် ဂရန်နာဒါမြို့တောင်ပိုင်းမှာ ကယ်ဆယ်ရေးလုပ်ငန်း ၈၅ ခုလောက်ကို သွားရောက်လုပ်ဆောင်ပေးခဲ့ရတယ်လို့ ရိုက်တာသတင်းဌာနကို ပြောကြားခဲ့ပါတယ်။
အန်ဒါလူစီယာ အရေးပေါ်အေဂျင်စီ (AEA) ကလည်း X (ယခင် Twitter) လူမှုကွန်ရက်ပေါ်မှာ ဖော်ပြခဲ့ရာမှာ ဂရန်နာဒါမြို့တစ်ခုတည်းကတင် ပျက်စီးဆုံးရှုံးမှုတွေအတွက် ဖုန်းဆက်အကူအညီတောင်းတာတွေ ရှိခဲ့တာမဟုတ်ဘဲ ဟွယ်လ်ဗာ (Huelva) နဲ့ ကာဒစ်ဇ် (Cádiz) မြို့တွေကလွဲလို့ ကျန်တဲ့ အန်ဒါလူစီယာ ပြည်နယ်တစ်ဝန်းလုံးကပါ ဖုန်းခေါ်ဆိုမှုတွေ ရရှိခဲ့တယ်လို့ ဆိုပါတယ်။
မျက်နှာကြက်တွေ၊ အမိုးအစွန်းပန်းတွေ၊ နံရံတွေနဲ့ အလှဆင်ထားတဲ့ အစိတ်အပိုင်းတွေ အက်ကွဲတာ၊ ပြိုကျတာတွေနဲ့ ပတ်သက်ပြီး သတင်းပို့တာတွေကို AEA က လက်ခံရရှိခဲ့ပါတယ်။ ဒါပေမဲ့ ဂရန်နာဒါမြို့ရဲ့ နာမည်အကြီးဆုံး နေရာတချို့ အပါအဝင် ကြီးကြီးမားမား အဆောက်အအုံပိုင်းဆိုင်ရာ ထိခိုက်ပျက်စီးမှုမျိုးတော့ မရှိဘူးလို့ သူတို့က မှတ်ချက်ပြုထားပါတယ်။
အဲ့ဒီအထဲမှာ အစ္စလာမ့်ဗိသုကာလက်ရာတွေကြောင့် နာမည်ကြီးပြီး ဂရန်နာဒါမြို့ကို အပေါ်စီးကနေ လှမ်းမြင်ရတဲ့ တောင်ကုန်းပေါ်မှာ တည်ဆောက်ထားတဲ့ ၁၃ ရာစုက အယ်လ်ဟမ်ဘရာ(Alhambra) နန်းတော်နဲ့ ခံတပ်လည်း ပါဝင်ပါတယ်။ ဒီနာမည်ကြီး သမိုင်းဝင်အဆောက်အအုံဟာ “ဘယ်လိုထိခိုက်မှုမျိုးမှ မရှိခဲ့ပါဘူး” လို့ ဆန်းဇ် က ရိုက်တာနဲ့ AFP ကို ပြောကြားခဲ့ပါတယ်။
ဒါပေမဲ့ အန်ဒါလူစီယာ အရေးပေါ်ဝန်ဆောင်မှုအဖွဲ့က ကျွမ်းကျင်သူတွေက “နောက်ဆက်တွဲ ငလျင်ငယ်တွေ အများကြီး” ထပ်လှုပ်နိုင်သေးပြီး အဲ့ဒီဒေသမှာ မြေငလျင်လှုပ်ခတ်မှုတွေ ဆက်ရှိနေနိုင်တယ်လို့ ခန့်မှန်းထားတာကြောင့် သူတို့အနေနဲ့ “သတိရှိရှိနဲ့ ဆက်နေကြရမယ်” လို့ ဆန်းဇ် က AFP ကို ပြောပါတယ်။ ငလျင်စလှုပ်ကတည်းက ဗဟိုချက်နေရာတဝိုက်မှာ နောက်ဆက်တွဲငလျင်ငယ်ပေါင်း ၂၀၀ လောက် လှုပ်ခတ်ခဲ့ပြီး အဲ့ဒီအထဲက အများစုကိုတော့ “လူတွေ သတိမထားလိုက်မိကြဘူး” လို့ တရားဝင်ထုတ်ပြန်ချက်တစ်ခုမှာ ဖော်ပြထားပါတယ်။