စက်သုံးဆီ သယ်ယူပို့ဆောင်နေသည့် ယာဉ်များတွင် GPS တပ်ဆင်ကြရန် နစက ညွှန်ကြားချက်ထုတ်
ပြည်တွင်း၌ စက်သုံးဆီ သယ်ယူဖြန့်ဖြူးနေသည့် ယာဉ်များအား GPS စနစ် မဖြစ်မနေ တပ်ဆင်ကြရန် နစက လက်အောက်ခံ ရေနံထွက်ပစ္စည်း ကြီးကြပ်စစ်ဆေးရေးဦးစီးဌာနက ညွှန်ကြားထားကြောင်း စက်သုံးဆီ တင်းသွင်း ဖြန့်ဖြူးသူများထံမှ သိရသည်။
အဆိုပါ ညွှန်ကြားချက်မှာ လျှပ်စစ်နှင့် စွမ်းအင်ဝန်ကြီး ဌာန၊ ရေနံထွက်ပစ္စည်း ကြီးကြပ်စစ်ဆေးရေးဦးစီးဌာန၏ ဇူလိုင်လ (၁၄) ရက် ရက်စွဲပါ ညွှန်ကြားချက်ကို ဇူလိုင်လ (၂၀) ရက် ရက်စွဲဖြင့် မြန်မာနိုင်ငံစက်သုံးဆီတင်သွင်းရောင်းချဖြန့်ဖြူးရေးအသင်းက ထပ်ဆင့်ညွှန်ကြားခဲ့ခြင်း ဖြစ်သည်။
ယင်း ညွှန်ကြားချက်အရ ဆီတင် ရေယာဉ်များနှင့် ဆီဘောက်ဆာ ယာဉ်များ အားလုံး ဩဂုတ်လ ၅ ရက်အမီ အမြန်ဆုံး တပ်ဆင်ရမည် ဖြစ်ပြီး ယခင် တပ်ဆင်ထားသည့် ကုမ္ပဏီများအနေဖြင့် ဇူလိုင်လ ၂၈ ရက် နောက်ဆုံးထားကာ ရေနံထွက်ပစ္စည်း ကြီးကြပ်စစ်ဆေးရေးဦး စီးဌာနသို့ အချက်အလက်များ ပေးပို့ရမည် ဖြစ်ကြောင်း သိရသည်။
ယခုလို ညွှန်ကြားရခြင်းမှာ ယာဉ်မတော်တဆမှုနှင့် ထူး ခြားမှုများကို အချိန်နှင့် တပြေးညီသိရှိနိုင်ရန်နှင့် ဆီတင် ရေယာဉ်များနှင့် ဆီဘောက်ဆာယာဉ်များ၏ တစ်နေရာမှ တစ်နေရာသို့ သယ်ယူပို့ဆောင်ခြင်း ၊ လက်ခံ ဖြည့်တင်းခြင်းများကို သက်ဆိုင်ရာဌာန၊ အဖွဲ့အစည်းများမှ လိုအပ်သလို စိစစ်ကြပ်မတ်ဆောင်ရွက်သွားနိုင်ရန် ရည်ရွယ်ကြောင်း သိရသည်။
” ဟုတ်ပါတယ်။ GPS တပ်ဖို့ ညွှန်ကြားချက် ရပါတယ်။ ဒါဟာ ဆီအရောင်းအဝယ်နဲ့ သယ်ယူတဲ့ ကိစ္စတွေကိုပါ ထိန်းချုပ်ဖို့ ကြိုးစားလာတယ်လို့မြင်တယ်။ ဘယ်ကို မသယ်ရဘူး ၊ ဘယ်ကို မပို့ရဘူးဆိုတာမျိုးတွေ ထပ်ဖြစ် လာနိုင်တယ်လို့ မြင်တယ်လေ ” ဟု စက်သုံးဆီ တင်သွင်း ဖြန့်ချီရောင်းချနေသည့် လုပ်ငန်းစုတစ်ခုမှ အကြီးတန်းအရာရှိ တစ်ဦးက ၎င်း၏ အမြင်ကို ပြောပြသည်။
ဆီတင်ရေယာဉ်နှင့် ဆီဘောက်ဆာ ယာဉ်များတွင် လုပ် ငန်းလိုင်စင်၊ ကြီးကြပ်လက်မှတ်နှင့် GPS စနစ် တပ်ဆင်ထားခြင်း မရှိကြောင်း စိစစ်တွေ့ရှိပါက စက်သုံးဆီ သယ် ယူပို့ဆောင်သည့် လုပ်ငန်းများ ဆက်လက်လုပ်ဆောင်ခွင့် ပြုမည် မဟုတ်ကြောင်း ညွှန်ကြားချက်တွင် ဖော်ပြပါရှိသည်။
ထို့အပြင် အဆိုပါ ညွှန်ကြားချက်သည် စက်သုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်းဆောင်ရွက်သည့် ကုမ္ပဏီများ၊ သယ်ယူပို့ဆောင်သည့် ကုမ္ပဏီများ၊ အခြားပုဂ္ဂလိက လုပ်ငန်းရှင်များ ပိုင်ဆိုင်သည့် ရေယာဉ်နှင့် ဘောက်ဆာယာဉ်များ အားလုံးအကျုံးဝင်ကြောင်း သိရသည်။